Jeremaia 48 - Vakavakadewa Makawa

Ena cudruvi ko ira na Moapi, 1-5, e na vuku ni nodra viavialevu, 6-10, kei na nodra tiko vakacegu wale, 11-13, kei na nodra vakararavi ki na nodra kaukauwa, 14-25, kei na nodra beci koya na Kalou kei ira na nona tamata, 26-46. Era na vinaka tale na Moapi, 47.

¹ A ka sa baleti Moapi, sa vosa kina vakaoqo ko Jiova ni lewe vuqa, na Kalou ni Isireli; Ena ca ko Nipo! ni sa vakacacani: sa madua ko Kiri-aceimi sa kabai ka rawa: sa madua ko Misikapi ka waicala.

² Ena sega tale ni vakacaucautaki ko Moapi: sa naki ca vua ko Esiponi, ka kaya, Me da mai la'ki muduka tani me kakua ni matanitu. Ko iko talega, Matimeni, ko na vagalui; ena cicimuri iko nai seleiwau.

³ A domo ni tagi sa rogo mai Oroneimi, na veivakacacani kei na rusa levu.

⁴ Sa rusa ko Moapi; sa rogo yani na nodra tagi na nona gone lalai.

⁵ Ia ni ra sa cabe cake ki Luici sa lako cake tiko na tagi levu; e na kenai sirosiro sobu ki Oroneimi sa dua na tagi ni veivakarusai era sa rogoca ko ira na meca.

⁶ Dou dro, drotaka na nomudou bula, mo dou vaka na luveniyali mai veikau.

⁷ Ni ko sa vakararavi ki na nomu cakacaka kei na nomu i yau, ko na vakabobulataki talega; ena lako tani ko Kimosi ni sa vakabobulataki: ko ira vata na nona bete kei ira na nona turaga.

⁸ Ia ena yaco na dauvakacaca ki na veikoro kecega, ena sega na koro e bula: ena ca talega na buca ka rusa na vanua cecelevu, me vaka sa kaya oti ko Jiova.

⁹ Soli taba ni manumanu vei Moapi me vuka sara yani: ia na kena veikoro sa na lala, me sega e dua e tiko kina.

¹⁰ Me cudruvi sara ko koya sa cakava vakawele na cakacaka i Jiova, ia me cudruvi sara ko koya sa tarova na nonai seleiwau mai na vakadave dra.

¹¹ Sa dautiko vakacegu ko Moapi mai na gauna sa gone kina, a sa dautiko wale e na kena soko, a sa sega ni veisovayaki mai na saqa ki na saqa, ia sa sega na gauna sa kau tani kina vakabobula: o koya oqo sa to ga vua na kena velavela, ia na kenai boiboi sa sega ni dua tani mai.

¹² O koya oqo raica, ena yaco na gauna, sa kaya ko Jiova, ka'u na talai ira kina vua na daukiliva na saqa era na kilivi koya, ka ra na sovadiva dina sara na nona saqa, ka vorolaka na nodra tavaya.

¹³ Ia ena maduataki Kimosi ko Moapi, me vaka sa maduataki Peceli era a vakararavi kina ko ira na mataqali i Isireli.

¹⁴ Dou sa kaya vakacava, Keimami sa kaukauwa ka tamata qaqa e nai valu?

¹⁵ Sa vakacacani ko Moapi, ia na nona veikoro sa lako cake, ia ko ira na nona cauravou digitaki era sa lako sobu ki na veivakamatei, sa kaya na Tui, ko Jiova ni lewe vuqa na yacana.

¹⁶ Na ka rarawa ki Moapi sa toro voleka mai, ia na kena ca sa kusarawa sara mai.

¹⁷ Dou yasovaki koya, koi kemudou kece sa tiko vakavolivoliti koya; kei kemudou kece sa rogoca na yacana, dou kaya, Na kena ramusu nai tikotiko kaukauwa, nai titoko vakaiukuuku!

¹⁸ Mo lako sobu mai na nomu lagilagi, ka tiko e ra ni ko sa viagunu, ko iko na goneyalewa sa tiko mai Taiponi; ni sa lako cake mai vei iko ko koya ka vakacacani Moapi, ka na vakarusa ko koya na nomu bai ni valu kaukauwa.

¹⁹ Mo tu ga e na sala, ka vakararai, ko iko na kai Aroeri; tarogi koya na tagane sa dro mai, kei koya na yalewa sa se mai, mo kaya, A cava na ka sa yaco?

²⁰ Sa madua ko Moapi; ni sa basuki sobu: qoqolou ka tagi; tukuna yani ki Erinoni, ni sa vakacacani ko Moapi,

²¹ ia na ka ka lewai me yaco sa yacova na vanua bucabuca; kei Oloni, kei Jeasa, kei Mefeaci,

²² kei Taiponi, kei Nipo, kei Peci-tipilaceimi,

²³ kei Kiri-aceimi, kei Peci-kamuli, kei Peci-mioni,

²⁴ kei Kirioci, kei Posira, kei na veikoro kece ni vanua vaka-Moapi, se vakayawa se voleka.

²⁵ Sa tamusuki nai leu i Moapi, ia na ligana sa ramusu, sa kaya ko Jiova.

²⁶ Dou vakamatenitaki koya: ni sa vakalevulevui koya vei Jiova, ia ena qiqi tu ko Moapi e na nona lua, ia ena dredrevaki talega ko koya.

²⁷ Ia ko a daudredrevaki Isireli, se segai? se sa kune beka ko koya vei ira na daubutako? ni ko sa vosataki koya, ko sa kuretaka kina na ulumu.

²⁸ Dou biuta na veikoro, koi kemudou sa tiko mai Moapi ka la'ki tiko ga ki na uluvatu, ia mo dou vaka ga na ruve sa cakava na nona sova e na bati ni gusu ni qara.

²⁹ Eda sa rogoca oti na viavialevu i Moapi, ni sa viavialevu sara na nona yalolevu, kei na nona viaviaturaga, kei na nona dokadokai koya, kei na nona yaloqaciqacia.

³⁰ Au sa kila na nona cudru levu sa kaya ko Jiova; ia ena sega ga ni yaco; a nona dauvosa, ena sega so na ka e rawa kina.

³¹ O koya ka'u na qoqolou kina e na vuku i Moapi, ia ka'u na tagi ga e na vuku i Moapi kece; ena vutugu na yaloqu e na vukudra na kai Kiri-erese.

³² Ka'u na tagicaki iko e na tagi vaka-Jaseri, ko iko na vaini ni Sipima: a tabamu sa salava na wasawasa, ka yacova sara na wasawasa vaka-Jaseri: a nomu vuata matua kei na vua ni nomu vaini sa tokitaka ko koya na dauvakacaca.

³³ A sa kau tani na marau kei na reki mai na were sa vakalewe, kei na vanua vaka-Moapi; ia ka'u sa vakaotia na waini mai nai keli-ni-waini: ena sega e kaikaila ni sa sikaraka; ena sega ni dina na nodra kaila.

³⁴ Sa ia na tagi mai Esiponi, a sa yacovi Elale kei Jeasa na nodra tabalaka na domodra, a sa ia mai Soa, a sa yacovi Oroneimi, me vaka na luve ni pulumokau sa yabaki tolu: ni na biu wale tu na wai talega mai Nimirimi.

³⁵ Ia sa kaya ko Jiova ka'u na muduka tani talega mai Moapi, na tamata sa dauvakacaboi soro e na veiyasana cecere, ka vakama nai madrali boi vinaka vei ira na nona kalou.

³⁶ Ia na lomaqu ena rorogo me vaka na bitu-ni-vakatagi e na vuku i Moapi ena rorogo talega na lomaqu me vaka na bitu-ni-vakatagi e na vukudra na kai Kiri-erese: ka ni sa yali na ka levu sa rawata ko koya.

³⁷ Ia ena tasi kece na uludra; kei na kumidra kece, ena koti; na ligadra kece, ena tava tu; ka ra na vakaisulu e nai sulu taga.

³⁸ Ena ia na tagi yaso e dela ni veivale kece ni Moapi, e na saqata ni koro talega: ni'u sa vorolaki Moapi me vaka na bilo sa sega ni vinakati, sa kaya ko Jiova.

³⁹ Na kena ramusu! era na qolouvaka; Na kena vuki vakanadaku ko Moapi, ni sa madua! ia ena yaco ko Moapi me ka e dredrevaki ka taqayataki vei ira kece era tiko vakavolivoliti koya.

⁴⁰ Ni sa kaya vakaoqo ko Jiova; Raica, ena vuka mai ko koya me vaka na ikeli, ka vakatetaba mai me ca ko Moapi.

⁴¹ Sa kabai na veikoro, ia na bai ni valu kaukauwa sa rawa sara, ia na yalodra na qaqa ni Moapi e na siga ko ya ena vaka na yalo ni yalewa sa taratara.

⁴² Ia ena rusa ko Moapi me kakua ni matanitu tiko, ni sa vakalevulevui koya vei Jiova.

⁴³ Na rere, kei nai keli, kei na tudai, sa yacovi iko na Moapi, sa kaya ko Jiova.

⁴⁴ Ko koya sa drotaka na ka rerevaki, ena lutu ki nai keli; ko koya sa cabe mai nai keli, ena coriti e nai cori: ni'u na vakayacora vei Moapi, na yabaki era na cudruvi kina, sa kaya ko Jiova.

⁴⁵ Ko ira era dro era sa mai tu ga e ruku ni yaloyalo i Esiponi ni ra sa malumalumu: ia na bukawaqa ena lako mai Esiponi, kei na yameyame ni bukawaqa mai na loma ni koro ko Sioni, ka kania nai yalayala kei Moapi, kei na buradeladra na gone dauue.

⁴⁶ Ena ca vei iko, Moapi! sa ra rusa na tamata i Kimosi: ni ra sa tauri vakabobula ko ira na luvemu tagane, kei ira talega na luvemu yalewa.

⁴⁷ Ia e na gauna maimuri ka'u na kauti ira tale mai na Moapi era vakabobulataki, sa kaya ko Jiova. Sa qai tini na lewa vei Moapi.