Jeremaia 47 - Vakavakadewa Makawa

A nodra vakacacani na kai Filisitia, 1-7.

¹ Sai koya oqo na vosa i Jiova vei Jeremaia na parofita ka baleti ira na kai Filisitia, sa yaco mai eliu a sa samuti Kesa emuri ko Fero.

² Sa kaya vakaoqo ko Jiova; Raica, sa tubu cake na wai mai na mata ni tokalau, io sa na dua na dobui levu, ena luvuca na vanua, kei na ka kecega sa tu kina; na koro, kei ira era sa tiko kina: era na qai tagi na tamata, ka ra na qoqolou ko ira kecega na lewe ni vanua.

³ E na vuku ni vadugu ni yavadra na nona ose kaukauwa, kei na rorogo ni nona qiqi-ni-valu, kei na vadugu ni yava ni nona qiqi-ni-valu, era na sega ni rai ki muri na qase vei ira na luvedra ni sa wadamele na ligadra;

⁴ e na vuku ni siga sa yaco mai me vakacacani ira kece kina na kai Filisitia, ka muduka tani mai Taia kei Saitoni nai vukevuke kecega sa vo: ni na vakacacana na kai Filisitia ko Jiova, ko ira ka vo tiko e na vanua ko Kafitori.

⁵ Sa tasi ulu ko Kesa; sa muduki laivi ko Asikiloni kei ira sa vo e na nodra buca: me bogi vica mada mo tavalaki iko tiko?

⁶ Ko iko nai seleiwau i Jiova, me bogi vica mada mo qai vakacegu? mo daramaki mada ki na nomu taga, mo cegu, ka tiko vakadua.

⁷ Me vakacegu vakaevei, ni sa vakarota vua ko Jiova me ia kivei Asikiloni, kei na baravi? sa lesia ko koya me ia ki kea.