Jeremaia 46 - Vakavakadewa Makawa

Sa parofisaitaka ko Jeremaia, na nodra vakarusai nai valu i Fero mai Papiloni, 1-12, kei na nona kabai Ijipita ko Nepukanesa, 13-26. Sa vakacegui ira na kai Juta ni ra vakararawataki, 27,28.

¹ Oqo na vosa i Jiova vei Jeremaia na parofita ka baleti ira na veimatanitu;

² io sa baleti Ijipita, kei ira nai valu i Fero-niko na tui Ijipita mai na uciwai ko Uferetisi mai Kakimisi, oqori ka yavita ko Nepukanesa na tui Papiloni e nai kava ni yabaki i Jioiakimi na luve i Josaia na tui Juta.

³ Dou vakarautaka nai sasabai kei nai vakaruru, ka toro voleka me ia nai valu.

⁴ Vauca na kedrai yaya ki na ose; ka vodo, koi kemudou sa dauvodo ose, ka dou tu yani ka vakaisala vakaivalu tu; dou solota na moto, sulumaka nai sulu ni valu.

⁵ A cava ka'u sa raici ira kina ka ra taqaya ka vuki vakanadaku? ia ko ira na nodra qaqa era sa moku, ka ra sa dro sara, ka ra sega ni rai ki muri: sa voliti ira na rere, sa kaya ko Jiova.

⁶ Kakua ni dro ko koya sa yava totolo, se dro bula ko koya sa qaqa; era na tarabe ka bale vaka ki na mata ni tokalau mai na uciwai ko Uferetisi.

⁷ Ko cei oqo sa lako cake mai vaka na waluvu, ka vaka na uciwai sa vakaua na kena wai?

⁸ Ko Ijipita sa tubu cake mai me vaka na waluvu ka vaka na uciwai sa vakaua na kena wai; a sa kaya ko koya, Au na tubu cake ka luvuca na vanua; au na vakarusa na koro kei ira sa tiko kina.

⁹ Dou lako cake mai, na ose; ka dou cici vakaca voli, na qiqi-ni-valu; ka dou cabe mai, na qaqa; koi kemudou na kai Kusi kei na kai Lipea, sa dauvakasasabai; kei kemudou na kai Litia, sa dauyavia na dakai.

¹⁰ Oqo na nona siga na Turaga ko Jiova ni lewe vuqa, na siga ni veisausaumi, me cudruvi ira kina na nona meca: ia ena kana ga nai seleiwau, ena mamau ka mateni e na kedra dra: ni sa dua na nonai madrali na Turaga ko Jiova ni lewe vuqa mai na vanua ki na tokalau, e na bati ni uciwai ko Uferetisi.

¹¹ Mo lako cake ki Kiliati, ka kauta mai na memu wainimate, ko iko na goneyalewa, ni Ijipita: ena sega ni yaga ni sa levu mai na kemui botani; ni ko na sega ni bula.

¹² Era sa rogoca ko ira na veivanua na nomu madua, ia na nomu qoqolou sa robota na vanua: ni rau sa veitarabe koi rau na qaqa, ka rau sa bale vata ruarua.

¹³ A vosa sa tukuna ko Jiova vei Jeremaia na parofita, e na vuku ni nona lako mai ko Nepukanesa na tui Papiloni, me samuta na vanua ko Ijipita.

¹⁴ Dou tukuna ki Ijipita, ka vakarogoya ki Mikitoli, kei Nofi kei Tapanesi: dou kaya, Mo tu dei ga, ka vakarau tu; ni sa kana tu nai seleiwau ka sa vakavolivoliti iko.

¹⁵ A cava era sa vakasevi tani kina na nomu qaqa? era sega ni tu rawa, ni sai Jiova sa vakasevi ira:

¹⁶ sa vakabalei ira na lewe vuqa ko koya, io era sa dui bale ka veibikabikai: a ra kaya, Tu cake, me da lesu kivei ira na kai noda, ki na vanua eda a sucu kina, mai nai seleiwau ni veivakararawataki.

¹⁷ Era a kaci maikea, Sa ue walega ko Fero na tui Ijipita; sa sivia ko koya na gauna ka lokuci.

¹⁸ Me vaka na dina ni noqu bula, sa kaya na Tui, ko Jiova ni lewa vuqa na yacana, Ni sa vakataki Tepori ni sa tu dina e na maliwa ni veiulu-ni-vanua, ka vakataki Kameli ni sa tu dina e na bati ni waitui, ena lako dina ga mai ko koya.

¹⁹ Ko iko na goneyalewa ka tiko mai Ijipita, mo vakarautaka nai yaya ni nomu lako tani vakabobula: ni na lala ko Nofi ka na vakamai me sega e dua e tiko kina.

²⁰ Sa luve ni pulumokau matavinaka sara ko Ijipita, ia sa lako mai na lago veikata mai na mata ni tokalau, sa lako mai.

²¹ Ko ira na nona tamata voli talega era tiko kina era sa vaka na pulumokau uro; ia ko ira talega era sa lesu ki muri, era sa dro vata ga: era sa sega ni tu dei, ni sa yacovi ira na siga ni nodra ca, na gauna me ra cudruvi kina.

²² A domona, ena rogo yani me vaka na domo ni gata: ni ra sa lako vakaivalu mai, era lako mai vua ka ra vakamatau tu, me vakataki ira na dauta kau.

²³ Era na taya sobu na nona veikau, sa kaya ko Jiova, ia ke dredre sara ni vakadikevi; ni ra lewe vuqa ka lewe lailai na vodre, ka ra sega ni wili rawa.

²⁴ Ena madua mai na goneyalewa ni Ijipita; ena soli ga ki na ligadra na tamata mai na mata ni tokalau.

²⁵ Sa kaya ko Jiova ni lewe vuqa, na nodra Kalou na Isireli; Raica, au na cudruvi Amoni nei No, kei Fero, kei Ijipita, kei ira na nodra kalou, kei na nodra tui: io ko Fero kei ira kecega era vakararavi vua:

²⁶ ia ka'u na soli ira ki na ligadra era sagai ira me ra vakamatea, io ki na liga i Nepukanesa na tui Papiloni, kei na ligadra na nona tamata: ka oti, ena tawa tale me vaka e na gauna eliu, sa kaya ko Jiova.

²⁷ Ia ko iko, mo kakua ni rere, Jekope na noqu tamata, io kakua ni ko taqaya, na Isireli: koi au, ka'u na vakabulai iko mai na vanua vakayawa, kei na nomu kawa mai na vanua era sa bobula kina; ia ena lesu mai ko Jekope, me tiko vakacegu ka vinaka, ka sega e dua ena vakarerea.

²⁸ Mo kakua ni rere, ko iko Jekope na noqu tamata, sa kaya ko Jiova; ni'u sa tiko vata kei iko: ni'u na vakaotia sara na veimatanitu kecega ka'u sa vakasevi iko kina, ia ko iko, ka'u na sega ni vakaotia sara: ka'u na vakanakuitataki iko vakavinaka ga, ni ko na sega ni dro bula sara.