Jeremaia 44 - Vakavakadewa Makawa

Sa tukuna ko Jeremaia ni ra sa ca na Juta e na vuku ni nodra qaravi ira na kalou tani, 1-10. Sa parofisaitaka na nodra ca na Juta era tiko vulagi mai Ijipita, ena qaravi ira na kalou tani, 11-14. Era sa lomakaukauwa sara na kai Juta, 15-19, a sa vunauci ira kina ko Jeremaia, 20-28, a sa parofisaitaka na ca kei Ijipita mei vakadinadina ni nona vosa, 29,30.

¹ A vosa sa yaco vei Jeremaia e na vukudra kece na Juta era tiko e na vanua ko Ijipita, ko ira sa tiko mai Mikitoli, kei Tapanesi, kei Nofi, kei na tikina ko Pacirosi, ka vaka,

² Sa kaya vakaoqo ko Jiova ni lewe vuqa, na Kalou ni Isireli; Koi kemudou, dou sa raica na ca kece ka'u sa vakayacora ki Jerusalemi, kei na veikoro vaka-Juta kecega; ka raica, sa lala e na siga edaidai, sa sega e tiko kina,

³ e na vuku ni nodra ca era sa cakava me vakacudrui au, ni ra sa la'ki vakama nai madrali boi vinaka, ka me ra qaravi ira na kalou tani, era sa sega ni kila, ko ira, se koi kemudou, se ko ira na nomudou qase.

⁴ Ia ka'u a talai ira kecega na noqu i talatala vei kemudou, ka sou e na mataka me'u tala, ka kaya, Dou kakua sara mada ni cakava na ka vakasisila oqo ka'u sa cata.

⁵ A ra sa sega ni vakarorogo, se vakatu daligadra me ra saumaki mai na nodra ca, ka me ra kakua ni vakama nai madrali boi vinaka vei ira na kalou tani.

⁶ Ka sa sovaraki kina na noqu cudru kei na noqu lesa, a sa waqa e na veikoro vaka-Juta kei na sala ni koro ko Jerusalemi; ka sa rusa mai kina ka lala, me vaka e na siga oqo.

⁷ O koya oqo sa qai kaya kina ko Jiova, na Kalou ni lewe vuqa, na Kalou ni Isireli; A cava dou sa cakava kina na ca levu oqo ki na yalomudou, me muduka tani kina vei kemudou na tagane kei na yalewa, na gone lalai kei ira sa sucu tiko, mai Juta, ka me kakua e vo vei kemudou;

⁸ ni dou sa vakacudrui au e na cakacaka ni ligamudou, ni dou sa vakama nai madrali boi vinaka vei ira na kalou tani e na vanua ko Ijipita, dou sa mai tiko kina, mo dou muduki kemudou tani, mo dou vosavosacati, ka vakalialiai e na veivanua kece e vuravura?

⁹ Dou sa guilecava li na nodra i valavala ca na nomudou qase, kei na nodra i valavala ca na tui Juta, kei nai valavala ca ni watidra, kei na nomudou i valavala ca, kei nai valavala ca ni watimudou, era sa cakava e na vanua ko Juta, kei na sala ni koro ko Jerusalemi?

¹⁰ Era sa sega ni yalomalumalumu mai ka yacova na siga oqo, era sa sega talega ni rere, se muria na noqu vunau, se na noqu i lesilesi, ka'u sa solia vei kemudou kei ira na nomudou qase.

¹¹ O koya sa kaya kina ko Jiova ni lewe vuqa, na nodra Kalou na Isireli; Raica, au na rai yani vei kemudou mo dou ca kina, me'u muduki ira kece talega na Juta.

¹² Ia ka'u na kauta na kena vo ni Juta, era sa gu sara me ra lako ki na vanua ko Ijipita me tiko vulagi kina, a ra na oti kece e na vanua ko Ijipita; ka bale e nai seleiwau kei na viakana: io ko ira na tamata wale kei ira talega na turaga era na mate e nai seleiwau kei na viakana: a ra na vatonaki, ka vakurabuitaki, ka vosavosacati, ka vakalialiai.

¹³ Ni'u na cudruvi ira sa tiko e na vanua ko Ijipita, me vaka ka'u a cudruvi Jerusalemi, e nai seleiwau, kei na viakana, kei na mate dauveiveitauvi:

¹⁴ me kakua e dua me dro tani rawa se vo tiko vei ira na kena vo ni Juta, era sa lako ki na vanua ko Ijipita me tiko vulagi mada kina, ka qai lesu mai ki na vanua ko Juta, era sa gadreva me ra lesu ka tiko tale kina: ni na sega so ena lesu tale mai, ko ira ga era sa dro bula.

¹⁵ Era sa qai vosa kece vei Jeremaia ko ira na tagane era kila ni ra vakama nai madrali boi vinaka vei ira na kalou tani, kei ira na watidra, kei ira kece talega na yalewa era tu mai, e dua nai soqosoqo levu, io ko ira kecega na tamata era tiko e na vanua ko Ijipita, mai Pacirosi, ka ra sa kaya,

¹⁶ Keimami na sega ni vakarorogo ki na vosa, ko sa mai tukuna vei keimami e na yaca i Jiova:

¹⁷ ia keimami na cakava sara ga na ka kece sa cavuta na gusu i keimami, ka me keimami vakama nai madrali boi vinaka vua na ranadi ni lomalagi, ka sova vua nai sevu, me vaka keimami sa daucakava, koi keimami, kei ira na neimami qase, kei na neimami tui, kei na neimami turaga, e na veikoro vaka-Juta, kei na sala ni koro ko Jerusalemi: ni keimami sa mamau kina e na kakana, ka bula vinaka, ia keimami sa sega ni raica kina na ka ca:

¹⁸ ia ni keimami sa kua ni vakama nai madrali boi vinaka vua na ranadi ni lomalagi, ka sega ni sova vua nai sevu, keimami sa qai dravudravua e na ka kecega, ia keimami sa vakaoti ga e nai seleiwau kei na viakana:

¹⁹ ia ni keimami sa vakama nai madrali boi vinaka vua na ranadi ni lomalagi, ka sova vua nai sevu, sa sega beka ni kauwai kina na wati i keimami ni keimami sa cakava na keki me sorovi koya kina, ka sova vua nai sevu?

²⁰ Sa qai kaya ko Jeremaia vei ira na tamata kecega, vei ira na tagane, kei ira na yalewa, kei ira kece na tamata era vosa vakaoqo, ka vaka,

²¹ Nai madrali boi vinaka dou sa vakama e na veikoro vaka-Juta, kei na sala ni koro ko Jerusalemi, koi kemudou, kei ira na nomudou qase, kei ira na nomudou tui, kei na nomudou turaga, kei na lewe ni vanua, sa sega beka ni nanuma kina ko Jiova, sa sega beka ni kasa ki na lomana?

²² Ia sa dredre ni vosota ko Jiova, e na vuku ni ca ni nomudou i valavala, kei na ka vakasisila dou sa cakava; ka sa lala kina na nomudou vanua, ka sa kurabuitaki, ka sa vosavosacati, ka sega e tiko kina, me vaka e na siga oqo.

²³ Ia ni dou sa vakama nai madrali boi vinaka, ka dou sai valavala ca vei Jiova, ka sa sega ni vakarorogo ki na vosa i Jiova, ka sa sega ni muria na nona vunau, kei na nonai lesilesi, kei na nonai tukutuku, sa qai yacovi kemudou kina na ca oqo, me vaka e na siga edaidai.

²⁴ Sa kaya tale ko Jeremaia vei ira kece na tamata, kei ira kece na yalewa, Dou rogoca na vosa i Jiova, koi kemudou kece na Juta ka tiko e na vanua ko Ijipita:

²⁵ Sa kaya vakaoqo ko Jiova ni lewe vuqa, na nodra Kalou na Isireli; Koi kemudou kei na watimudou, dou sa vosa oti e na gusumudou, ka vakayacora e na ligamudou, ka vaka, Keimami na cakava dina ga na ka keimami sa yalayala kina, me vakama nai madrali boi vinaka vua na ranadi ni lomalagi, ka sova vua nai sevu: dou na vakayacora ga na ka dou sa yalataka, ka cakava ga na ka dou sa yalayala kina:

²⁶ o koya oqo dou rogoca kina na vosa i Jiova, koi kemudou kece na Juta sa tiko e na vanua ko Ijipita; Raica, koi au ka'u sa bubului e na yacaqu levu, sa kaya ko Jiova, ena sega ni cavuti tale na yacaqu e na gusuna e dua na Juta, e na vanua taucoko ko Ijipita ka me kaya, Sa bula na Turaga ko Jiova.

²⁷ Raica, au na vakaraici ira me ra ca kina, me ra kakua ni vinaka: a ra na vakaoti kece na Juta era tiko e na vanua ko Ijipita e nai seleiwau, kei na viakana, ka me ra oti dina ga.

²⁸ Ia ko ira era bula mai nai seleiwau, era na lesu mai na vanua ko Ijipita ki na vanua ko Juta, ka lewe vica ga; ia ko ira kece na kena vo ni Juta, era sa yaco ki na vanua ko Ijipita me tiko vulagi kina, era na kila se na vosa i cei ena yaco, se na noqu, se na nodra.

²⁹ Ia sa kaya ko Jiova, oqo nai vakatakilakila vei kemudou, ni'u na cudruvi kemudou e na yasana oqo, mo dou kila ni na vakadinadinataki sara na noqu vosa vei kemudou mo dou ca:

³⁰ Raica, au na soli Ferofira na tui Ijipita ki na ligadra na nona meca, kei na ligadra era segata me ra vakamatei koya: me vaka ka'u a soli Setekaia na tui Juta ki na liga i Nepukanesa na tui Papiloni, na nona meca, o koya talega ka segata me vakamatei koya.