Jeremaia 43 - Vakavakadewa Makawa

Ko Joenani, ni sa sega ni vakadinata na parofisai i Jeremaia, sa kauti Jeremaia kei ira na tamata eso ki Ijipita, 1-7. Ko Jeremaia, sa parofisaitaka na ca me yacovi Ijipita maivei ira na kai Papiloni, 8-13.

¹ Ia ni sa tukuna vei ira kece na tamata ko Jeremaia na vosa kecega i Jiova na nodra Kalou, oqori sa talai koya kina vei ira ko Jiova na nodra Kalou, io na vosa kecega oqo,

² sa qai vosa ko Asaraia na luve i Osaia, kei Joenani na luve i Karea, kei ira na tamata viavialevu kecega, ka kaya vei Jeremaia, E lasu na ka ko sa vosataka: sa sega ni talai iko ko Jiova na noda Kalou me kaya, Dou kakua ni lako yani ki Ijipita me tiko vulagi ki kea:

³ ia ko Peruki na luve i Neraia sa vakauqeti iko vakaca ga vei keimami, me soli keimami ki na ligadra na kai Kalitia, me ra vakamatei keimami, ka kauti keimami ki Papiloni.

⁴ A ra sa sega ni vakarorogo ko Joenani na luve i Karea, kei ira kece na kapiteni ni valu, kei na tamata kecega, ki na vosa i Jiova, me tiko ga e na vanua ko Juta.

⁵ Ia ko Joenani na luve i Karea, kei ira na kapiteni ni valu kecega, era sa kauti ira kecega sa vo e Juta, ko ira era sa qai lesu mai na veivanua kece, era dui vakasevi kina, me mai tiko e na vanua ko Juta;

⁶ ko ira na tagane, kei na yalewa, kei na gone, kei na luvena yalewa na tui, kei na tamata kecega sa biuta ko Nipusaretani na kapiteni ni valu i vakatawa me tiko vei Kitalaia na luve i Eaikami na luve i Safani, kei Jeremaia na parofita, kei Peruki na luve i Neraia.

⁷ A ra sa yaco ki na vanua ko Ijipita: ni ra sa sega ni vakarorogo ki na vosa i Jiova: a ra sa yaco ki Tapanesi.

⁸ Sa qai yaco na vosa i Jiova vei Jeremaia mai Tapanesi, ka vaka,

⁹ Mo taura e ligamu eso na vatu lelevu, ka la'ki, vunia e na tete e na lovo ni vatu-buli, mai nai curucuru ki na vale i Fero mai Tapanesi, e na matadra na kai Juta;

¹⁰ ka kaya vei ira, Sa kaya vakaoqo ko Jiova ni lewe vuqa, na nodra Kalou na Isireli; Raica, au na talaki ka kauti Nepukanesa na tui Papiloni, na noqu tamata, ka viritura na nonai tikotiko vakaturaga e na dela ni vatu oqo ka'u sa vunia; ia ena birika na nonai vakaruru vakaturaga e cake.

¹¹ Ia ni sa lako mai ko koya, ena yavita na vanua ko Ijipita, ka soli ira sa lesi me mate me ra mate, kei ira sa lesi me ra vakabobulataki me ra vakabobulataki, kei ira era sa lesi me ra mate e nai seleiwau me ra mate ga kina.

¹² Ia ka'u na vakawaqa na buka e na nodra bure na kalou ni Ijipita, ena vakamai ira ko koya, ka kauti ira vakabobula: ia ena tutuvitaki koya e na vanua ko Ijipita, me vaka sa tutuvitaki koya nai vakatawa ni sipi e na nonai tutuvi; ena lako tani talega maikina e na vakacegu.

¹³ Ena musuka talega na duru vatu i Peci-semesi, mai na vanua ko Ijipita; ia ena vakama ko koya na nodra bure kalou na kai Ijipita.