Jeremaia 42 - Vakavakadewa Makawa

Sa masuti Jeremaia ko Joenani me tarogi koya na Kalou na ka me ra cakava, ka ra kaya era na talairawarawa vua, 1-6. Sa tukuna ko Jeremaia na lewa ni Kalou vei ira, 7-18, ka sa vunauci ira ko koya e na vuku ni nodra veivakaisini kei na nodra vosa lasu vei Jiova, 19-22.

¹ Era sa qai toro mai na kapiteni kecega ni valu, kei Joenani na luve i Karea, kei Jisanaia na luve i Osaia, kei ira na tamata kecega, na tamata wale kei ira talega na turaga,

² a ra sa kaya vei Jeremaia na parofita, Me vinaka mada na neimami vakamamasu e matamu, ia mo masulaki keimami vei Jiova na nomu Kalou, io koi keimami kecega oqo sa vo tiko; (ni ko sa raici keimami ka lewe lailai sa vo vei ira na lewe vuqa:)

³ ka me vakatakila vei keimami ko Jiova na nomu Kalou na sala me keimami lako kina, kei na ka me keimami cakava.

⁴ Sa qai kaya vei ira ko Jeremaia na parofita, Au sa rogoci kemudou; raica, au na vakamasuti Jiova na nomudou Kalou me vaka na nomudou vosa; ia ka'u na tukuna yani vei kemudou na ka kecega ena kaya mai ko Jiova vei kemudou; au na sega ni vunia e dua na ka maivei kemudou.

⁵ Era sa qai kaya vei Jeremaia, Me qai vakayacora vei keimami ko Jiova, na lewa dina ka dodonu, kevaka keimami sa sega ni cakava na ka kecega ena talai iko kina vei keimami, ko Jiova na nomu Kalou:

⁶ se vinaka, se ca ga, keimami na vakarorogo ki na vosa i Jiova na noda Kalou o koya keimami sa talai iko vua; me vinaka kina koi keimami ni keimami sa vakarorogo ki na vosa i Jiova na noda Kalou.

⁷ Sa bogi tini, sa qai yaco mai na vosa i Jiova vei Jeremaia:

⁸ ka sa kacivi Joenani na luve i Karea, kei ira kece na kapiteni ni valu era tiko vata kaya, kei ira na tamata kecega, na tamata lalai kei ira na turaga,

⁹ ka sa kaya vei ira ko koya, Sa kaya vakaoqo ko Jiova, na Kalou ni Isireli, ko koya dou sa talai au vua me'u tauca vei koya na nomudou vakamamasu;

¹⁰ Kevaka dou na tiko dina ga e na vanua oqo, au na qai tarai kemudou cake, ka sega ni talaraki kemudou sobu, au na tei kemudou, ka sega ni cavuti kemudou cake: ni'u sa veivutuni e na vuku ni ca ka'u sa cakava vei kemudou.

¹¹ Dou kakua ni rerevaki tui Papiloni, ko koya dou sa rerevaka tiko; dou kakua ni rerevaki koya, sa kaya ko Jiova: ni'u sa tiko vata kei kemudou me'u vakabulai kemudou, io me'u kaliraki kemudou mai na ligana.

¹² Ia ka'u na yalololoma vei kemudou, me yalololoma talega vei kemudou ko koya, ka vakalesui kemudou ki na nomudou vanua.

¹³ Ia kevaka dou sa kaya, Keimami na sega ni tiko e na vanua oqo, ka dou sa bese kina ni vakarorogo ki na vosa i Jiova na nomudou Kalou,

¹⁴ ka kaya, E segai; keimami na lako ga ki na vanua ko Ijipita keimami na sega ni raica kina nai valu, se rogoca na domo ni davui, se keimami mate e na via kana, io keimami na la'ki tiko ga ki kea:

¹⁵ mo dou rogoca mada kina na vosa i Jiova, koi kemudou na kena vo ni Juta: Sa kaya vakaoqo ko Jiova ni lewe vuqa, na Kalou ni Isireli; Kevaka dou sa guta sara mo dou lako ki Ijipita, ka sa la'ki tiko vulagi ki kea;

¹⁶ ena qai yacovi kemudou kina nai seleiwau dou sa rerevaka, kei na viakana, dou sa rerevaka, ena cicimuri kemudou ki Ijipita; ka dou na mate maikea.

¹⁷ Ia ena yaco vakakina vei ira kece na tamata era sa gu sara me ra lako ki Ijipita me tiko kina, era na mate ga e nai seleiwau, kei na viakana, kei na mate veiveitauvi: ena sega talega e dua vei ira me vo se me dro tani mai na ca ka'u na vakayacora vei ira.

¹⁸ Ni sa kaya vakaoqo ko Jiova ni lewe vuqa, na nodra Kalou na Isireli; Me vaka sa sovaraki na noqu cudru kei na noqu lesa vei ira na kai Jerusalemi; ena sovaraki vakakina na noqu cudru vei kemudou, ni dou sa yaco ki Ijipita: ia dou na vatonaki, ka vakurabuitaki, ka vosavosacati, ka vakalialiai; ia dou na sega ni raica tale na yasana oqo.

¹⁹ Sa kaya oti ko Jiova e na vukumudou na kena vo ni Juta; Dou kakua ni lako ki Ijipita; dou kila deivaka ni'u sa tukuna sara vei kemudou edaidai.

²⁰ Ni dou sa sega ni lomadina, ni dou sa talai au vei Jiova na nomudou Kalou, ka kaya, Mo masulaki keimami vei Jiova na noda Kalou; ia na ka kece ena kaya ko Jiova na noda Kalou, mo tukuna vei keimami, ia keimami na qai cakava vakakina.

²¹ Ia ka'u sa tukuna vei kemudou e na siga edaidai; ia dou sa sega ga ni vakarorogo ki na vosa i Jiova na nomudou Kalou, e na dua na ka sa talai au kina vei kemudou.

²² Ia dou kila vinaka mada ni dou na mate e nai seleiwau, kei na viakana, kei na mate dauveiveitauvi, e na yasana dou sa via la'ki tiko vulagi kina.