Jeremaia 40 - Vakavakadewa Makawa

Ni sa sereki ko Jeremaia sa la'ki tiko ko koya kei Kitalaia, 1-6. Ko ira talega na Juta era dui veiseyaki era sa mai tiko kei Kitalaia, 7-12. Sa vakavotuna ko Joanani na vere i Isimeli, a sa sega ni vakadinati na nona vosa, 13-16.

¹ A vosa sa yaco vei Jeremaia maivei Jiova, ni sa vakatalai koya yani mai Rama ko Nipusaretani na kapiteni ni valu i vakatawa, ni sa tauri koya oti ka sa vesuki vata e na sinucodo kei ira kece na kai Jerusalemi kei ira na Juta era vakabobulataki, era sa kau vakabobula ki Papiloni.

² Ia na kapiteni ni valu i vakatawa sa kauti Jeremaia, ka kaya vua, Ko Jiova na nomu Kalou sa cavuta na ca oqo ki na yasana oqo:

³ ka sa vakayacora, ka sa cakava ko Jiova me vaka na nona vosa: ni dou sai valavala ca vei Jiova, ka sega ni vakarorogo ki na domona, o koya ga sa yacovi kemudou kina na ka oqo.

⁴ Ia oqo, raica, ka'u sa sereki iko edaidai mai na sinucodo sa vauci kina na ligamu. Kevaka e vinaka vei iko me daru lako ki Papiloni, daru mai lako; ka'u na vakaraici iko vinaka: ia kevaka e ca vei iko me daru mai lako ki Papiloni, sa kakua ga: raica, sa tiko e matamu na vanua kecega: ia na tikina sa vinaka ka dodonu vei iko mo lako kina, mo lako ga kina.

⁵ Ia ni sa sega ni lako ko koya, sa kaya vua, Ia mo lesu tale yani vei Kitalaia na luve i Eaikami na luve i Safani, ko koya sa lesia ko tui Papiloni me lewa na veikoro vaka-Juta, mo dou tiko vata kaya kei ira na tamata: se dua na tikina tani ko vinakata mo lako kina, mo lako ga kina. A sa solia vua na kapiteni ni valu i vakatawa e dua na kakana kei nai solisoli, ka vakatalai koya yani.

⁶ A sa lako yani ko Jeremaia vei Kitalaia na luve i Eaikami ki Misipa; ka sa tiko vata kaya kei ira na tamata era vo tiko e na vanua.

⁷ Ia ni ra sa rogoca ko ira kece na kapiteni ni valu era tiko e vanua, kei na nodra tamata, ni sa lesi Kitalaia na luve i Eaikami ko tui Papiloni me lewa na vanua, ka sa soli ira na tagane, kei na yalewa, kei na gone, kei ira eso na dravudravua ni vanua, era sa sega ni kau tani ki Papiloni, me vakaraica ko koya;

⁸ era sa qai lako mai vei Kitalaia ki Misipa, io ko Isimeli na luve i Necanaia, kei Joenani kei Jonacani koi rau na luve i Karea, kei Siraia na luve i Tanumeci, kei iratou na luve i Efei na kai Nitofa, kei Jisanaia na luvena e dua na luve i Meeka, ko ira vata kei na nodra tamata.

⁹ A sa bubului vei ira ko Kitalaia na luve i Eaikami na luve i Safani, vei ira talega na nodra tamata, ka kaya, Dou kakua ni rere ni qaravi ira na kai Kalitia: dou tiko ga e na vanua, ka qaravi tui Papiloni, dou na qai vinaka kina:

¹⁰ ia koi au, raica, ka'u na tiko ga e Misipa, me'u qaravi ira na kai Kalitia, era na lakovi keda mai: ia koi kemudou, dou kumuna na waini, kei na vuata matua, kei na waiwai, ka maroroya e na nomudou saqa, ka tiko ga e na nomudou veikoro dou sa taura.

¹¹ Ia ko ira kece na Juta mai Moapi, vei ira talega na luve i Amoni, mai Itomi talega, kei ira mai na veivanua kece, ni ra sa rogoca ni sa laiva tu yani ko tui Papiloni na kedra vo ni Juta, ka sa lesi Kitalaia na luve i Eaikami na luve i Safani, me lewai ira;

¹² era sa qai lesu kece mai ko ira na Juta mai na veiyasana kecega era sa dui vakasevi kina, ka ra sa lako mai ki na vanua ko Juta, kivei Kitalaia, ki Misipa, ka ra sa kumuna na waini, kei na vuata matua, e dua na ka levu sara.

¹³ Ia ko Joenani na luve i Karea, kei ira kece na kapiteni ni valu mai colo, era sa lako mai kivei Kitalaia ki Misipa,

¹⁴ a ra sa kaya vua, Ko sa kila dina, se segai, ni sa talai Isimeli mai na luve i Necanaia ko Pealisi na nodra tui na luve i Amoni me vakamatei iko? Ia sa sega ni vakadinati ira ko Kitalaia na luve i Eaikami.

¹⁵ Ia ko Joenani na luve i Karea sa qai kaya lo vei Kitalaia e Misipa, Me'u lako mada, me'u vakamatei Isimeli na luve i Necanaia, ia ena sega ni kila e dua na tamata: a cava me vakamatei iko kina ko koya, me ra veiseyaki kina na kai Juta era sa soqoni mai vei iko, ka rusa na kena vo ni Juta?

¹⁶ Ia sa kaya ko Kitalaia na luve i Eaikami vei Joenani na luve i Karea, Mo kakua ni cakava na ka oqo: ni ko sa lasutaki Isimeli.