Jeremaia 38 - Vakavakadewa Makawa

Ni sa beitaki Jeremaia vakailasu ko Malikaia, sa tukuci sobu ki nai keli, 1-6. Ko Epeti-meleki sa masulaki koya vua na tui, a sa kaya kina ko koya me yavi cake mai nai keli, 7-13. Ni rau sa veivosaki lo kei na tui, sa vakavulici koya ko Jeremaia me soro, me bula kina, 14-23. Sa vakaroti Jeremaia me kakua ni tukuna na nodrau veivosaki, 24-28.

¹ Ia ko Sefataia na luve i Matani, kei Kitalaia na luve i Pasuri, kei Jukali na luve i Selemaia, kei Pasuri na luve i Malikaia, eratou sa rogoca na vosa sa tukuna ko Jeremaia vei ira kece na tamata, ka vaka,

² Sa kaya ko Jiova, Ko koya sa tiko e na koro oqo ena mate ga e nai seleiwau, kei na viakana, kei na mate dauveiveitauvi: ia ko koya sa lako yani vei ira na kai Kalitia ena bula; ia na nona bula ena nonai toki ni valu, ena bula ga ko koya.

³ Sa kaya vakaoqo ko Jiova, Ena soli vakaidina na koro oqo ki na liga ni nonai valu ko tui Papiloni, ka ra na rawata.

⁴ A ra sa kaya vua na tui ko ira na turaga, Me vakamatei mada na tamata oqo: ni sa vakamalumalumutaka ko koya e na vosa oqo na ligadra na tamata i valu era sa vo e na koro oqo, kei na ligadra na tamata kecega: na tamata oqo sa sega ni segata na nodra vinaka na lewe ni vanua oqo, na nodra ca ga.

⁵ Sa qai kaya ko Setekaia na tui, Raica, sa tiko ga vei kemudou ko koya: ni sa sega ni cakava rawa e dua na ka vei kemudou ko koya na tui.

⁶ Era sa qai kauti Jeremaia, ka biuta ki na dua nai keli nei Malikaia na luve i Ameleki mai na lomanibai ni vale ni veivesu: ka ra sa tukuci Jeremaia sobu e na dali. Ia sa sega na wai e nai keli, na lolobo ga: a sa tu ko Jeremaia e na lolobo.

⁷ Ia ni sa rogoca ko Epeti-meleki na kai Iciopea, e dua vei ira na matanivanua e na vale ni tui, ni ra sa tukuci Jeremaia ki nai keli; ia sa tiko ga na tui e na matamata-ni-koro i Penijamini;

⁸ sa lako yani ko Epeti-meleki mai na vale ni tui, ka vosa vua ka kaya,

⁹ Kemuni na noqu turaga na tui, sa caka ca ko ira na tamata oqo e na ka kece era sa cakava vei Jeremaia na parofita, ko koya era sa biuta ki nai keli; ena sa mate ga maikea e na viakana: ni sa sega na madrai e na koro.

¹⁰ Sa qai kaya na tui vei Epeti-meleki na kai Iciopea, Mo kauta mada e lewe tolusagavulu na tamata eke, ka mo dou la'ki vueti Jeremaia na parofita mai nai keli, de sa mate sara ko koya.

¹¹ Sa qai kauti ira na tamata ko Epeti-meleki, a ra sa curu ki na vale ni tui ki ruku ni vale-ni-yau, ka kauta maikina nai sulu sa kadresu kei nai sulu vuca, ka tukuca sobu e na dali ki nai keli vei Jeremaia.

¹² A sa kaya vei Jeremaia ko Epeti-meleki na kai Iciopea, Mo kiriwana mada nai sulu oqo sa kadresu kei nai sulu vuca e na kirikiriwamu mei tatara ni dali. A sa kitaka vakakina ko Jeremaia.

¹³ A ra sa yavi Jeremaia cake e na dali, mai nai keli: ka sa tiko ga ko Jeremaia e na lomanibai ni vale ni veivesu.

¹⁴ A sa talaki ko Setekaia na tui, ka kauti Jeremaia na parofita vua ki nai katolu ni curucuru ki na vale i Jiova: a sa kaya vei Jeremaia ko koya na tui, Au na taroga vei iko e dua na ka; ka mo kakua ni vunia vei au e dua na ka.

¹⁵ A sa kaya vei Setekaia ko Jeremaia, Kevaka ka'u sa tukuna vei kemuni, ko ni na sega dina li ni vakamatei au? ia kevaka ka'u sa vakavulici kemuni, ko ni na sega ni vakarorogo vei au.

¹⁶ Sa qai bubului lo vei Jeremaia ko Setekaia na tui, ka kaya, Me vaka sa bula dina ko Jiova, ko koya sa cakava na yalodaru oqo, au na sega ni vakamatei iko, au na sega talega ni soli iko ki na ligadra na tamata oqo era segata me ra vakamatei iko.

¹⁷ Sa qai kaya vei Setekaia ko Jeremaia, Sa kaya vakaoqo ko Jiova, na Kalou ni lewe vuqa, na Kalou ni Isireli; Kevaka ko ni na lako dina yani vei ira na tamata turaga nei tui Papiloni, ena qai bula na yalomuni, ia na koro oqo ena sega ni vakamai e na bukawaqa; ia ko ni na bula, kei ira talega na nomuni mataqali:

¹⁸ ia kevaka ko ni na sega ni lako yani vei ira na tamata turaga nei tui Papiloni, ena qai soli na koro oqo ki na ligadra na kai Kalitia, ka ra na vakama e na bukawaqa, ia koi kemuni ena sega ni dro tani rawa mai na ligadra.

¹⁹ A sa kaya vei Jeremaia ko Setekaia na tui, Au sa rerevaki ira na Juta era sa vuki vei ira na kai Kalitia, de ra soli au ki na ligadra, ka ra vakalialiai au.

²⁰ Sa qai kaya ko Jeremaia, Era na sega ni soli kemuni. Mo ni vakarorogo mada ki na vosa i Jiova, ka'u sa tukuna vei kemuni: ko ni na qai vinaka kina, ia ena bula kina na yalomuni.

²¹ Ia kevaka ko ni sa bese ni lako yani, sai koya oqo na vosa sa vakatakila vei au ko Jiova:

²² Raica, ko ira kece na yalewa era tiko e na vale i tui Juta, era na kau yani vei ira na tamata turaga nei tui Papiloni, era na qai kaya na yalewa ko ya, Era sa vakauqeti kemuni, ka ra gumatua ko ira na wekamuni: sa lutu dromu ki na lolobo na yavamuni, ka ra qai vuki tani vei kemuni.

²³ Ia era na kauti ira kece na watimuni kei na luvemuni, vei ira na kai Kalitia: koi kemuni talega, ko ni na sega ni dro tani rawa mai na ligadra, ia ena tauri kemuni talega ko tui Papiloni: ia na koro oqo, ko ni na vakavuna na kena vakamai e na bukawaqa.

²⁴ Sa qai kaya vei Jeremaia ko Setekaia, Me kakua e dua na tamata e kila na vosa oqo, ko na qai sega ni mate.

²⁵ Ia kevaka era rogoca ko ira na turaga ni daru sa veivosaki kei iko, ka ra lako mai vei iko, ka kaya, Tukuna mada vei keitou na ka ko sa kaya vua na tui, kakua ni ko vunia vei keitou, ia keitou na sega ni vakamatei iko; ka mo tukuna talega na ka sa kaya vei iko na tui:

²⁶ mo qai kaya vei ira, Au sa vakamamasu ga vua na tui, me kakua ni vakasukai au tale ki na vale i Jonacani, de'u mate kina.

²⁷ Ka ra sa lako kece mai na turaga vei Jeremaia, ka tarogi koya: a sa tukuna vei ira me vaka na vosa kecega sa vakarota na tui. A ra sa kua ni vosa tiko vua; ni sa sega ni kilai na ka oqori.

²⁸ Ka sa tiko ga ko Jeremaia e na lomanibai ni vale ni veivesu ka yacova na siga sa kabai kina ko Jerusalemi: ka sa tiko kina ni sa rawai ko Jerusalemi.