Jeremaia 33 - Vakavakadewa Makawa

Sa yalayala na Kalou vei ira era vakabobulataki ni ra na lesu tale mai, ka tiko dei e na nodra vanua, 1-14. Sa tukuni koya na Mesaia, na Coke ni yalododonu; kei na nona matanitu, kei na nona lesi me bete ka sega ni mudu: ka ni ra na kalougata sara ko ira na lewe ni nona matanitu, 15-26.

¹ A sa yaco tale me vakarua vei Jeremaia na vosa i Jiova, ni sa sogolati tiko ko koya e na lomanibai ni vale ni veivesu, ka sa vaka,

² Sa kaya vakaoqo ko Jiova ko koya sa cakava na koro oqo, ia ko Jiova, ko koya sa bulia, me vakataudeitaka; ko Jiova na yacana:

³ Mo tagi mai vei au, ka'u na rogo yani vei iko, ka vakatakila vei iko na ka levu ka dredre ni kilai, ko sa sega ni kila.

⁴ Ni sa kaya vakaoqo ko Jiova, na Kalou ni Isireli, e na vuku ni veivale ni koro oqo, kei na veivale i tui Juta, sa basuki sobu e na suva kei na matau:

⁵ Era sa curu yani me veivaluti kei ira na kai Kalitia, ka me ra vakasinaita na veivale oqo e na yago ni tamata sa mate, ko ira ka'u sa vakamatea e na noqu cudru kei na noqu lesa, ka e na vuku ni nodra i valavala ca kecega ka'u sa vunia kina na mataqu mai na koro oqo.

⁶ Raica, au na vakamavotaki ira na nomu mate, ia ka'u na vakabulai ira, ka vakayacora vei ira na sautu levu kei na dina.

⁷ Ia ka'u na kauti ira tale mai na Juta kei ira na Isireli era vakabobulataki, ia ka'u na vakavinakataki ira tale me vaka eliu:

⁸ ka'u na vakasavasavataki ira talega mai na nodra i valavala ca era sa cala kina vei au; ia ka'u na bokoca na nodra i valavala ca kecega, era sa cala kina ka talaidredre kina vei au.

⁹ Ia ena yaco kina me noqu na yaca rogo sa marautaki, ka vakavinavinakataki, ka vakacaucautaki, e na veimatanitu kece e vuravura, era na rogoca na ka vinaka kece ka'u sa cakava vei ira: ka ra na rere ka sautaninini e na vuku ni ka vinaka kecega kei na kena tubu cake ka'u sa vakayacora kina.

¹⁰ Sa kaya vakaoqo ko Jiova; Ena rogoci tale e na yasana oqo, dou sa kaya kina, Sa lala ga ka sega kina na tamata se na manumanu, io e na veikoro vaka-Juta, kei na sala ni koro ko Jerusalemi, sa lala tu ga, ka sega kina na tamata, se na manumanu,

¹¹ na domo ni reki, kei na domo ni marau, na domo ni tagane kei na domo ni yalewa, era sa qai vakawati; na domodra era sa kaya, Dou vakavinavinaka vei Jiova ni lewe vuqa: ni sa yalovinaka ko Jiova; ni sa sega ni mudu na nona loloma: kei na domodra talega era sa kauta mai nai madrali ni vakavinavinaka ki na vale i Jiova. Ni'u na kauti ira tale mai na lewe ni vanua era sa vakabobulataki, ka me ra sa vaka eliu, sa kaya ko Jiova.

¹² Sa kaya vakaoqo ko Jiova ni lewe vuqa; Na yasana oqo, sa lala tu ga ka sega kina na tamata se na manumanu, kei na kena veikoro kece talega, ena tawa tale e na nodra i tikotiko nai vakatawa era na vakotora kina na qele ni sipi.

¹³ E na veikoro mai na veiulu-ni-vanua, kei na veikoro mai na buca, kei na veikoro mai na mata ni ceva, kei na vanua i Penijamini, kei na yasayasa vaka-Jerusalemi, kei na veikoro vaka-Juta, ena lako voli tale yani kina na qele ni sipi e na ruku ni liga i koya sa wilika, sa kaya ko Jiova.

¹⁴ Raica, ena yaco na gauna, sa kaya ko Jiova, ka'u na vakayacora kina na ka vinaka ko ya ka'u sa yalataka ki na mataqali i Isireli, kei na mataqali i Juta.

¹⁵ E na veisiga ko ya, kei na gauna ko ya, ka'u na vakatubura kina vei Tevita na Coke yalododonu; ia ena cakava ko koya na lewa dodonu kei na cakacaka dodonu e na vanua.

¹⁶ E na veisiga ko ya, ena vakabulai ko Juta, ia ko Jerusalemi, ena tiko vinaka: ia oqo na yaca ena vakatokai kina, Ko Jiova na noda yalododonu.

¹⁷ Ni sa kaya vakaoqo ko Jiova; Ena sega ni yali vei Tevita e dua na tagane me tiko e nai tikotiko vakaturaga ni mataqali i Isireli;

¹⁸ ko ira talega na bete na kawa i Livai, ena sega ni yali vei ira e dua na tagane me tiko e mataqu me vakacabora nai soro kama, ka vakama nai madrali laukana, ka me vakacaboi soro tiko e na veisiga kecega.

¹⁹ A sa yaco vei Jeremaia na vosa i Jiova, ka vaka,

²⁰ Sa kaya vakaoqo ko Jiova; Kevaka dou sa vakacataka rawa na noqu veiyalayalati e na vuku ni siga, kei na noqu veiyalayalati e na vuku ni bogi, me kakua kina na siga kei na bogi e na kena gauna;

²¹ ena qai vakacataki rawa na veiyalayalati ka'u sa ia vata kei Tevita na noqu tamata, me sega kina na luvena tagane me lewa tiko e na nonai tikotiko vakaturaga; kei ira talega na bete na kawa i Livai, na noqu i talatala.

²² Me vaka sa sega ni wili rawa na kalokalo mai lomalagi, se vakarauti rawa na nuku ni matasawa: ka'u na vakalewevuqataka vakakina na kawa i Tevita na noqu tamata, kei na kawa i Livai era sa qaravi au.

²³ A sa yaco tale vei Jeremaia na vosa i Jiova, ka vaka,

²⁴ Ko sa vakananuma, se segai, na ka era vosataka na tamata oqo, ka kaya, Na mataqali ruarua ka digitaka ko Jiova, sa biuta tani ga ko koya? a ra sa beci ira kina na noqu tamata, me ra kakua ni matanitu tiko e matadra.

²⁵ Sa kaya vakaoqo ko Jiova; Ke sa sega ni tu ga na noqu veiyalayalati e na vuku ni siga kei na bogi, ia kevaka ka'u sa sega ni lesia nai valavala kei lomalagi kei vuravura:

²⁶ ke sa qai rawa me'u biuta tani na kawa i Jekope, kei Tevita na noqu tamata me'u kakua ni lesia e dua na nona kawa me lewai ira na kawa i Eparaama, kei Aisake, kei Jekope: ni'u na kauti ira tale mai era vakabobulataki, ka lomani ira.