Jeremaia 30 - Vakavakadewa Makawa

Na Kalou sa vakatakila vei Jeremaia na nodra lesu mai Papiloni na Juta, 1-4. Ena liu na tagi, 5-7, ena muri na bula, 8-11. Era sa vakanakuitataki e na vuku ni nodra i valavala ca, ena vakabulai ira na Kalou e na nona loloma, 12-22. Ia na cudru ni Kalou ena tauci ira sara na tamata ca, 23-24.

¹ Sa dua na vosa sa yaco vei Jeremaia maivei Jiova, ka vaka,

² Sa kaya vakaoqo ko Jiova na nodra Kalou na Isireli, Mo vola e na dua nai vola me tu vei iko na vosa kecega ka'u sa tukuna oti vei iko.

³ Ni sa kaya ko Jiova, Raica, ena yaco mai na gauna ka'u na vakalesui ira tale mai kina na noqu tamata na Isireli kei na Juta era a vakabobulataki, sa kaya ko Jiova: ia ka'u na vakalesui ira tale mai ki na vanua ka'u a solia ki na nodra qase, ka ra na taukena.

⁴ Ia oqo na vosa sa tukuna ko Jiova e na vukudra na Isireli kei na Juta.

⁵ Ni sa kaya vakaoqo ko Jiova; Na domo ni sautaninini keitou sa rogoca, sa yaco na rere, ka segai na vakacegu.

⁶ Dou veitarogi mada, ka vakaraica se dua na tagane sa taratara? a cava ka'u sa raica kina na tamata yadua ni sa dui toka na ligana e tolona, me vaka na yalewa sa taratara, ka sa matacea mai na matadra kecega?

⁷ Ulei! sa qai dua tani na siga ko ya, sa sega e dua me vakakina: io, sa kena gauna ni rarawa i Jekope: ia ena vakabulai ko koya mai na ka oqo:

⁸ Ni sa kaya ko Jiova ni lewe vuqa, Ena yaco e na siga ko ya, ka'u na musuka tani na nonai vua mai na domomu, ia ka'u na drutilaka talega na kemui vesu; ka ra na sega ni vakasaurarataki koya tiko ko ira na kai tani:

⁹ ia era na qaravi Jiova na nodra Kalou, kei Tevita na nodra tui, ko koya ka'u na vakatubura vei ira.

¹⁰ Ia ko iko Jekope na noqu tamata mo kakua ni rere, sa kaya ko Jiova; io kakua ni ko taqaya, Isireli: ni sai au, raica, ena vakabulai iko mai na vanua vakayawa, kei na nomu kawa mai na vanua era sa bobula kina; ia ena lesu mai ko Jekope, me tiko vinaka ka vakacegu, ka na sega e dua me vakarerei koya.

¹¹ Ni'u sa tiko kei iko, sa kaya ko Jiova, me'u vakabulai iko: ni'u na vakaotia sara na veimatanitu kecega ka'u sa vakasevi iko kina, ia ko iko, ka'u na sega ni vakaotia sara: ka'u na vakanakuitataki iko vakavinaka ga, ni ko na sega ni dro bula sara.

¹² Ni sa kaya vakaoqo ko Jiova, Sa sega ni bula rawa na nomu ramusu, sa ka rarawa sara na nomu mavoa.

¹³ Sa sega e dua me lewai iko vinaka, mo viviraki: sa sega ni kemuni botani mo bula kina.

¹⁴ Ko ira kece ka lomani iko era sa guilecavi iko; era sa sega ni mai raici iko; ni ka'u sa vuetaki iko e na kuita ni vakatawaloloma, me vaka ka'u sa nomu meca e na vuku ni kena levu ni nomu caka cala: ni sa vuqa tiko na nomu i valavala ca.

¹⁵ A cava ko sa tagicaka kina na nomu mavoa? sa sega ni malumu rawa na nomu rarawa e na vuku ni kena levu ni nomu caka cala: ni sa vuqa tiko na nomu i valavala ca, ka'u sa kitaka kina vei iko na ka oqo.

¹⁶ Ia ko ira era na tilomi iko era na tilomi; ko ira talega na nomu meca era na dui vakabobulataki kecega; ko ira sa vakacacani iko era na vakacacani, ko ira kece talega sa tokitaki iko, ka'u na soli ira me ra tokitaki.

¹⁷ Ni'u na vakamavotaka na nomu mavoa ia ka'u na vakabulai iko, sa kaya ko Jiova; io, ka ni ra cavuti iko mo luveniyali, Oqo ko Saioni, ka sega e dua e lakova.

¹⁸ Sa kaya vakaoqo ko Jiova; Raica, au na vakalesuya tale na nodra vale laca na Jekope ka vakabobulataki; ia ka'u na yalololoma ki na nodra i tikotiko; ena tara na koro e na kena yavu dina; ia na vale vakaturaga ena toka tale me vaka na kenai valavala:

¹⁹ ena rogo yani talega maikina na vakavinavinaka kei na domodra era marau: ia ka'u na vakalewevuqataki ira, ka ra na sega ni lewe lailai; ka'u na vakalevulevui ira, ka ra na sega ni tamata wale.

²⁰ A luvedra talega ena vaka eliu: kei na nodra i soqosoqo ena vakataudeitaki e mataqu; ia ka'u na cudruvi ira kecega era vakasaurarataki ira.

²¹ A nodra turaga talega ena tubu maivei ira: kei koya na nodra tui ena lako mai na kedra maliwa: ka'u na vakauqeti koya me toro voleka mai, ia ena toro voleka mai vei au: ia ko cei ko koya oqo sa vinakata na lomana me torovi au mai? sa kaya ko Jiova.

²² Ia dou na yaco mo dou noqu tamata, ia koi au ka'u na yaco me'u nomudou Kalou.

²³ Raica, na cava i Jiova sa lako mai ka sa cudrucudru, na cava ni veivakarusai: ena tau tiko ki na uludra na tamata ca.

²⁴ Ena sega ni malumu na cudru katakata i Jiova, ena cakava mada ga, ka vakayacora dina na ka sa nakita ko koya: ena kena gauna maimuri, dou na qai vakananuma kina.