Jeremaia 3 - Vakavakadewa Makawa

A yalololoma levu ni Kalou vei ira na Juta, ni ra sa vuki tani vua, 1-5. Era sa uasivi cake vei ira na Isireli e na ca, 6-11. Kevaka era veivutuni, era na lomani tale, 12-20. Sa ra vakaroti ko ira na Isireli me ra veivutuni, a ra sa vakatusa na nodra i valavala ca, 21-25.

¹ Sa kainaki, Kevaka e dua na tagane sa biuta na watina, a sa lako tani vua, ka sa yaco me nona na tagane tani, ena lesu tale beka vua ko koya na tagane? ena sega beka ni vakadukadukalitaki sara kina na vanua ko ya? ia ko iko ko sa cala kei ira e lewe vuqa; ia mo lesu ga vei au, sa kaya ko Jiova.

² Mo ta cake ka rai ki na veiyasana cecere, ka raica se dua na tikina dou sega ni veimoceri kina. E na gaunisala ko a waraki ira, me vaka na kai Arepea mai na veikau; ia ko sa vakadukadukalitaka na vanua e na nomu dautagane kei na nomu ca:

³ Sa bureitaki kina na uca, a sa sega kina na uca taumuri; ia na yadremu sa vaka na yadrena na yalewa dautagane, ko sa bese ni madua.

⁴ Ko na sega beka ni tagici au mai na siga oqo, ka vaka, Na tamaqu, sai kemuni sa tuberi au ni'u a gone?

⁵ ena waqa tiko beka na nona cudru ka tawa mudu? ena vakadedetaka tiko beka ka yacova nai otioti? Raica; ko sa vosataka na ka ca ka cakava talega, ka ko sa veitalia voli.

⁶ A sa kaya vei au ko Jiova e na gauna i Josaia na tui, Ko sa raica li na ka sa cakava ko Isireli na dauvuki? sa lako ko koya ki na ulu-ni-vanua kecega kei na ruku ni kau bulabula kecega, ka sa ia kina na dautagane.

⁷ Ia ka'u a kaya vua ni sa cakava oti na ka kecega oqori, Mo lesu mai vei au. A sa sega ni lesu mai. A sa kunea ko Juta na tacina daulawaki.

⁸ Ia ka'u a raica, ni sai koya dina oqo ni sa dautagane ko Isireli na dauvuki, ka'u a biuti koya tani ka solia vua nai vola ni veibiu, ka sa sega ni rere kina na daulawaki ko Juta na tacina, ia sa lako talega ko koya ka ia na dautagane.

⁹ A sa yaco e na vuku ni sa rogo na nona dautagane, sa vakadukadukalitaka kina na vanua, ka sa ia na dautagane kei na vatu kei na kau.

¹⁰ Ia e na ka kece talega oqo sa sega ni lesu kina vei au na tacina daulawaki ko Juta e na vu ni yalona, ia sa ka vakailasu ga, sa kaya ko Jiova.

¹¹ A sa kaya vei au ko Jiova, Sa dodonu ga ko Isireli na dauvuki, ka sega ko Juta na daulawaki.

¹² Mo la'ki tukuna na vosa oqo vaka ki na tokalau, ka kaya, Dou lesu mai, na Isireli sa dauvuki, sa kaya ko Jiova; ka'u na qai sega ni vakatauca na noqu cudru vei kemudou: ni'u sa yalololoma, sa kaya ko Jiova, ka'u na sega ni vakadedetaka tikoga na noqu cudru me sega ni mudu.

¹³ Me vakatusa ga na nomu caka cala, ko sa talaidredre kina vei Jiova na nomu Kalou, ka sa veibiuyaka na nomu i valavala kei ira na kai tani e na ruku ni kau bulabula kecega, ia dou a sega ni vakarorogo ki na domoqu, sa kaya ko Jiova.

¹⁴ Dou lesu mai, na gone dauvuki, sa kaya ko Jiova; ni'u sa veiwatini kei kemudou: ka'u na qai kauti kemudou, e dua mai na dua na koro, ka rua mai na dua na mataqali, ia ka'u na kauti kemudou mai ki Saioni:

¹⁵ ka'u na solia vei kemudou nai vakatawa era sa vaka na yaloqu, era na vakani kemudou vakavuku ka vakayalomatua.

¹⁶ Ia ena yaco, ni dou sa vakalevutaki ka vakaluveni e na vanua, e na gauna oqori, sa kaya ko Jiova, era na sega ni kaya tale, A kato ni veiyalayalati i Jiova: ena sega talega ni lakova na lomadra: era na sega talega ni nanuma kina; era na sega talega ni taleva; ena sega talega ni caka tale.

¹⁷ E na gauna ko ya era na vakatokai Jerusalemi mei tikotiko vakaturaga i Jiova; ka ra na soqoni vata kina na lewe ni veimatanitu kecega ki na yaca i Jiova ki Jerusalemi: ka ra na sega ni muria tale na kaukauwa ni lomadra ca.

¹⁸ E na gauna ko ya erau na lako vata na mataqali i Juta kei na mataqali i Isireli, ka ra na lako vata mai na vanua mai na tokalau ki na vanua ka'u a solia vei ira na nomudou qase me ra taukena.

¹⁹ Ia ka'u a kaya, Au na vakatikori iko vata vakaevei kei ira na luvequ, ka solia vei iko na vanua sa vinakati sara, na nodra i votavota vinaka na lewe vuqa ni veimatanitu? ka'u a vaka, Ko na kaya mai vei au, Kemuni na Tamaqu; ia ko na sega tale ni vuki tani vei au.

²⁰ E dina, me vaka na yalewa sa biuta tani vakaca na watina, dou sa biuti au vakaca vaka talega kina, koi kemudou na mataqali i Isireli, sa kaya ko Jiova.

²¹ E dua na domo sa rogo e na veiyasana cecere, na nodra tagi kei na nodra vakamamasu na Isireli: ni ra sa vakavevetaka na nodra sala, ka ra sa guilecavi Jiova na nodra Kalou.

²² Dou lesu mai, na gone sa dauvuki, ka'u na buluta na nomudou dauvuki. Mo ni raica, keimami sa lako mai vei kemuni; ni sai kemuni ko Jiova na neimami Kalou.

²³ E dina sa ka lasu na veiyasana cecere, na ulu-ni-vanua e vuqa; e dina sa maivei Jiova na neimami Kalou na neimami bula na Isireli.

²⁴ Ia na veivakamaduataki sa kania na nodra oca na neimami qase mai na gauna keimami a cauravou kina; kei na nodra qele ni sipi kei na nodra qele ni pulumokau, na luvedra tagane kei na luvedra yalewa.

²⁵ Keimami sa koto sobu e na neimami madua, ka sa luvuci keimami na kidroa: ni keimami sai valavala ca vei Jiova na neimami Kalou, koi keimami kei ira na neimami qase, mai na gauna keimami a cauravou kina ka yacova na siga oqo, ka sega ni vakarorogo ki na domo i Jiova na neimami Kalou.