Jeremaia 28 - Vakavakadewa Makawa

Sa ia na parofisai vakailasu ko Enanaia, 1-4. Ia ko Jeremaia, sa tukuna ni sa parofita dina ga ko koya ka sa dauyaco na ka e parofisaitaka, 5-9. Sa musuka ko Enanaia nai vua i Jeremaia, 10,11. A sa kaya ko Jeremaia ni na kenai sosomi nai vua kaukamea, 12-14; ka sa parofisaitaka na mate i Enanaia, 15-17.

¹ Ia e na yabaki ko ya, e nai vakatekivu ni lewa i Setekaia na tui Juta, e nai kava ni yabaki, e nai kalima ni vula, sa qai vosa vei au ko Enanaia na luve i Asuri na parofita, na kai Kipioni, e na vale i Jiova, e na matadra na bete kei ira kece na tamata, ka kaya,

² Sa kaya vakaoqo ko Jiova ni lewe vuqa, na Kalou ni Isireli, Au sa musuka nai vua i tui Papiloni:

³ Sa bera ni oti dina e rua na yabaki, ka'u na kauta tale mai ki na yasana oqo nai yaya kece ni vale i Jiova, o koya ka kauta ko Nepukanesa na tui Papiloni mai na yasana oqo, ka sa kauta ki Papiloni:

⁴ ia ko Jekonaia na luve i Jioiakimi na tui Juta, kei ira kece na Juta era bobula, era lako ki Papiloni, ka'u na kauti ira tale mai ki na yasana oqo, sa kaya ko Jiova, ni'u na musuka nai vua i tui Papiloni.

⁵ Sa qai kaya ko Jeremaia na parofita vei Enanaia na parofita e na matadra na bete, kei na matadra na tamata kece era tiko e na vale i Jiova,

⁶ ka sa vakaemeni kina ko Jeremaia na parofita, ka kaya, Me sa ia vakakina ko Jiova: ka me vakayacora ko Jiova na vosa ko sa parofisaitaka, me kauta tale mai nai yaya ni vale i Jiova, kei na ka kece sa kau yani, mai Papiloni ki na yasana oqo.

⁷ Ia mo rogoca mada na vosa oqo ka'u sa tukuna e daligamu, kei na daligadra kece talega na tamata.

⁸ Ko ira na parofita era liu vei kedaru, era sa parofisaitaka ni na yaco ki na veivanua e vuqa, kei na veimatanitu lelevu, nai valu, kei na ca, kei na mate dauveiveitauvi:

⁹ a parofita ka parofisaitaka na sautu, ni sa yaco na vosa ni parofita ko ya, sa qai kilai kina na parofita oqori, ni sa talai koya dina ga ko Jiova.

¹⁰ Sa qai taura ko Enanaia na parofita nai vua mai na domo i Jeremaia na parofita, ka musuka.

¹¹ A sa vosa ko Enanaia e na matadra na tamata kecega, ka kaya, Sa kaya vakaoqo ko Jiova; Au na musuka tani vakaoqo mai na domodra kece na veimatanitu nai vua i Nepukanesa na tui Papiloni, ni sa bera ni oti dina e rua na yabaki. A sa lako tani yani ko Jeremaia na parofita.

¹² Sa qai yaco vei Jeremaia na vosa i Jiova, ni sa musuka tani ko Enanaia na parofita nai vua mai na domo i Jeremaia na parofita, ka vaka,

¹³ Mo la'ki tukuna vei Enanaia, Sa kaya vakaoqo ko Jiova; Nai vua kau, ko sa musuka; ia ko na cakava nai vua kaukamea me kenai sosomi.

¹⁴ Ni sa kaya vakaoqo ko Jiova ni lewe vuqa, na Kalou ni Isireli; Nai vua kaukamea, ka'u sa qai tauca ki na domodra kecega na veimatanitu oqo, me ra qaravi Nepukanesa na tui Papiloni; ia era na qaravi koya ga: ia na manumanu talega ni vanua ka'u sa solia vua.

¹⁵ Sa qai kaya ko Jeremaia na parofita vei Enanaia na parofita, Mo rogoca mada, ko iko Enanaia; Sa sega ni talai iko ko Jiova; ia ko iko ko sa vakaraviti ira na tamata oqo ki na lasu:

¹⁶ o koya oqo sa kaya ko Jiova: Raica, au na biuti iko tani mai dela ni vanua: e na yabaki oqo ko na mate ga, ni ko sa vakavulica na vuki tani maivei Jiova.

¹⁷ A sa mate ko Enanaia na parofita e na yabaki ko ya e nai kavitu ni vula.