Jeremaia 24 - Vakavakadewa Makawa

Sa vakatakarakarataki na Juta e na lolo vinaka kei na lolo ca, 1-3. Ko ira sa yalododonu era na maroroi tiko me lesu tale ki na nodra vanua, 4-7; ia ko Setekaia kei ira na tamata ca era na vakarusai ga, 8-10.

¹ Sa vakatakila vei au ko Jiova, ka raica, sa rua na sova lolo ka tau sobu e na mata ni vale tabu i Jiova, ni sa kauti ira vakabobula tani ko Nepukanesa na tui Papiloni, io, ko Jekonaia na luve i Jioiakimi na tui Juta, kei ira na turaga ni Juta, kei ira na matai ni kaukamea, kei ira na matai tani mai Jerusalemi, ka sa kauti ira ki Papiloni.

² E dua na sova lolo sa vinaka sara, sa vaka na lolo sa dreu taumada: ia na kenai karua sa lolo ca sara, sa sega ni laukana rawa ni sa ca ga.

³ A sa taroga vei au ko Jiova, A cava ko sa raica, Jeremaia? Au sa kaya, Na lolo, na kena lolo vinaka, sa vinaka sara; ia na kena ca, sa ca sara, ka sa sega ni laukana rawa ni sa ca ga.

⁴ Sa baci yaco tale vei au na vosa i Jiova, ka vaka,

⁵ Sa kaya vakaoqo ko Jiova na Kalou i Isireli; Me vaka na lolo vinaka oqo, ka'u na kilai ira vakakina na Juta era sa vakabobulataki, ko ira ka'u sa vakatala tani e na yasana oqo ki na nodra vanua na kai Kalitia me ra vinaka kina:

⁶ ni'u na vakaraici ira me ra vinaka kina, ka kauti ira tale mai ki na vanua oqo: ia ka'u na tarai ira cake, ka sega ni basuka sobu; ka'u na tei ira, ka sega ni cavuta:

⁷ ia ka'u na solia vei ira na yalo me ra kilai au kina, ni sai au ko Jiova: ia era na yaco me ra noqu tamata, ka'u na yaco me'u nodra Kalou: ni ra na lesu mai vei au e na lomadra dina.

⁸ Ia me vaka na lolo ca, sa sega ni laukana rawa ni sa ca ga; sa vosa dina vakaoqo ko Jiova: Ena vakakina ka'u na soli Setekaia na tui Juta, kei ira na kena turaga, kei na kedra vo ni Jerusalemi, era tiko e na vanua oqo, kei ira sa tiko mai na vanua ko Ijipita:

⁹ ia ka'u na soli ira me ra kau tani me ra ca kina, ki na veimatanitu kecega kei vuravura, me ra vakalialiai, ka vakaiboletaki, ka veiwalitaki, ka vosavosacati, e na veiyasana kecega ka'u na dui vakasevi ira kina:

¹⁰ ia ka'u na vakayacora vei ira nai seleiwau, kei na viakana, kei na mate dauveiveitauvi, me ra takali mada mai na vanua ka'u a solia vei ira, ka vei ira na nodra qase.