Jeremaia 21 - Vakavakadewa Makawa

Sa talaki kivei Jeremaia, ko Setekaia me taroga e na vuku ni valu i Nepukatiresa; 1,2. Ko Jeremaia sa parofisaitaka na ka rarawa levu ena yaco kina, 3-7. Sa vakavulici ira na tamata me ra dro vei ira na kai Kalitia, 8-10; ka sa vunauci ira na mataqali i tui Juta, 11-14.

¹ Sa talai Pasuri na luve i Malikaia, kei Sefanaia na luve i Meesea na bete, kivei Jeremaia, ko Setekaia na tui, me rau kaya vua,

² Mo tarogi Jiova mada e na vukuda, ni sa mai veivaluti kei keda ko Nepukatiresa na tui Papiloni, de sa na cakacaka beka mai vei keda ko Jiova me vaka na nona cakacaka vakurabui kecega, me sa lako tani mada ga kina vei keda ko koya.

³ Sa qai yaco vei Jeremaia e dua na vosa maivei Jiova, ka sa kaya kina vei rau ko Jeremaia, Drau tukuna vakaoqo vei Setekaia:

⁴ Sa kaya vakaoqo ko Jiova na Kalou ni Isireli; Raica, au na vakalesuya tani nai yaragi ni valu e na ligamudou, dou sa veivaluti kina kei tui Papiloni, kei ira na kai Kalitia, era mai kabai kemudou mai daku ni bai, ia ka'u na vakasoqoni ira mai ki loma ni koro oqo.

⁵ Ia ka'u na veivala kei kemudou koi au e na ligaqu sa dodo yani, kei na ligaqu kaukauwa, io e na cudru, kei na lesa, kei na cudru levu.

⁶ Ia ka'u na yaviti ira na lewe ni koro oqo, na tamata kei na manumanu: era na mate ga e na mate dauveiveitauvi:

⁷ ni sa oti oqori, sa kaya ko Jiova, ka'u na soli Setekaia na tui Juta, kei ira na nona tamata, kei ira na lewe ni vanua, kei ira sa vo e na koro oqo mai na mate dauveiveitauvi, kei nai seleiwau, kei na viakana, ki na liga i Nepukatiresa na tui Papiloni, kei na ligadra na nodra meca, kei na ligadra era sagai ira me ra vakamatea: ia ena yaviti ira ko koya e nai seleiwau; ena sega ni vosoti ira, ena sega talega ni yalovinaka, se yalololoma.

⁸ Ia vei ira na tamata oqo mo kaya, Sa kaya vakaoqo ko Jiova; Raica, au sa vakaraitaka vei kemudou na sala ni bula, kei na sala ni mate:

⁹ ko koya sa tiko ga e na koro oqo ena mate e nai seleiwau, kei na mate dauveiveitauvi: ia ko koya sa curu ki tautuba, ka dro vei ira na kai Kalitia era mai kabai kemudou, ena bula, ena soli vua na nona bula me nonai toki ni valu:

¹⁰ ni sa dua tani na mataqu ki na koro oqo me sa ca ga, me kakua ni vinaka, sa kaya ko Jiova: ena soli ga ki na liga i tui Papiloni, ia ena vakama e na bukawaqa ko koya.

¹¹ Ia e na vuku ni mataqali i tui Juta, mo kaya, Dou rogoca na vosa i Jiova,

¹² koi kemudou na mataqali i Tevita, sa kaya vakaoqo ko Jiova: Dou ia na lewa dodonu e na mataka, ka vakabulai koya sa vakacacani mai na liga i koya sa vakacacana, de lako yani, na noqu cudru me vaka na bukawaqa, ka sa waqa tiko, me sega e dua e bokoca, e na vuku ni kena ca na nomudou i valavala.

¹³ Raica, au sa veivala kei iko, ko iko sa tiko e na buca, e na uluvatu ni buca, sa kaya ko Jiova; koi kemudou ka kaya, Ko cei ena lako sobu mai me veivala kei keimami? se ko cei me mai curu ki na neimami tikotiko?

¹⁴ Ia ka'u na cudruvi kemudou me vaka na nomudou i valavala, sa kaya ko Jiova: ia ka'u na tutuvaka na buka e na kena veikau, ena kania na ka kecega sa tu vakavolivolita.