Jeremaia 19 - Vakavakadewa Makawa

Na ca sa lewai me yacovi ira na Juta sa vakatakarakarataki e na saqa sa vorolaka ko Jeremaia, ka sa tukuna tale ni sai sau ni nodra i valavala ca, 1-15.

¹ Sa kaya vakaoqo ko Jiova, Mo la'ki kauta e dua na kena saqa qele na dautuli bilo, ka so vei ira na tamata era qase, ka so vei ira na bete era qase;

² ia dou lako vata yani ki na buca ni luve i Inomi, mai nai curucuru ki na matamata-ni-koro mai na tu-i-cake, ia mo vunautaka maikea na vosa ka'u na tukuna vei iko,

³ ka kaya, Dou rogoca na vosa i Jiova, koi kemudou na tui Juta, kei na kai Jerusalemi; Sa kaya vakaoqo ko Jiova ni lewe vuqa, na Kalou ni Isireli; Raica, au na vakayacora na ca ki na tikina oqo, ia ko ira kecega era rogoca, ena qasikanunu kina na daligadra:

⁴ ka ni ra sa biuti au, ka ra sa vakacacataka na tikina oqo, ka ra sa vakama kina na ka boi vinaka vei ira na kalou tani, era sega ni kila, se ko ira, se na nodra qase, se ko iratou na tui Juta, ka ra sa vakasinaita na yasana oqo e na kedra dra era sega ni cala;

⁵ era sa tara talega na veiyasana cecere i Peali, me vakama na luvedra tagane e na bukawaqa mei soro kama vei Peali, na ka ka'u a sega ni vakarota, se vosataka, ka sa sega talega ni tubu e lomaqu.

⁶ Sa kaya vakaoqo ko Jiova, Raica, e na vuku ni ka oqo ena yaco na gauna, ena sega ni vakatokai tale kina na yasana oqo, ko Tofeci, se Na buca ni luve i Inomi, ia, Na buca ga ni veivakamatei.

⁷ Ia ka'u na vakatawayagataka na lewa i Juta kei Jerusalemi e na yasana oqo, ka'u na lewa me ra bale e nai seleiwau e na matadra na nodra meca, e na ligadra talega era segata me ra vakamatei ira: ia ka'u na solia na yagodra me kedra na manumanu vuka, kei na manumanu ni vanua.

⁸ Ia ka'u na cakava na koro oqo me koro rusa, ka me vakasiusiutaki: ko ira kece era lako voli mai kina era na kidacala ka vakasiusiu e na vuku ni kena ca levu kecega.

⁹ Ia ka'u na biuti ira me ra kania na lewe ni luvedra tagane, kei na lewe ni luvedra yalewa, ka ra na dui kania yadua na lewe ni wekana, ni sa buku matua na druadrua ni koro, e na vuku talega ni ka rarawa sa vakararawataki ira kina na nodra meca, kei ira era sagai ira me ra vakamatea.

¹⁰ Mo qai vorota na saqa e na matadra na tamata dou sa lako vata,

¹¹ ka kaya vei ira, Sa kaya vakaoqo ko Jiova ni lewe vuqa; Au na vorolaki ira vakakina na tamata oqo kei na koro oqo, me vaka sa vorolaki na kena bilo na dautuli bilo, sa sega ni vakavinakataki rawa tale: ka ra na ia na veibulu e Tofeci, me sega na tikina e vo me veibulu kina.

¹² Au na cakacaka vakaoqo ki na yasana oqo, sa kaya ko Jiova, kivei ira talega na lewena, ia ka'u na cakava na koro oqo me vakataki Tofeci:

¹³ ena vakasisilataki talega na veivale mai Jerusalemi, kei na nodratou veivale na tui Juta, me vaka na kena vakasisila na tikina ko Tofeci, ni ra sa vakama e dela ni veivale kecega na ka boi vinaka ki na veikalokalo kecega ni lomalagi, ka livia nai sevu vei ira na kalou tani.

¹⁴ Sa qai lesu tale mai Tofeci ko Jeremaia, ka talai koya kina ko Jiova me ia na parofisai; ka sa la'ki tu e na lomanibai ni vale i Jiova, ka kaya vei ira na tamata kecega,

¹⁵ Sa kaya vakaoqo ko Jiova ni lewe vuqa, na Kalou ni Isireli; Raica, au na vakayacora ki na koro oqo kei na kena veikoro kecega na ca kecega ka'u a vosa kina e na vukuna, ni ra sa vakadomoqataki ira, me ra kakua ni rogoca na noqu vosa.