Jemesa 3 - Vakavakadewa Makawa

Me da kakua ni viaviavakavuvuli; me da lewa na yameda, 1-12. O ira sa vuku dina, era sa yalo malumalumu, era sa yalovinaka, era sa sega ni dauvuvu, se dauveiba, 13-18.

¹ Oi kemudou na wekaqu, me kakua ni lewe vuqa vei kemudou mei vakavuvuli, ni dou sa kila eda na cudruvi vakalevu kina.

² Ni da sa cala kecega e na ka e vuqa. Kevaka sa sega ni cala e dua e na vosa, sa tamata uasivi sara ko koya, a sa rawarawa vua me tarova na yagona taucoko.

³ Raica, kevaka eda sa vakaciqira na kedrai tarovi na ose ki na gusudra, me ra talairawarawa kina vei keda, eda sa qai saumaka na yagodra taucoko.

⁴ Raica talega na waqa, ni sa ka levu vakaidina, a sa savu kalia e na cagi kaukauwa, ia sa saumaki ga e na uli lailai sara, ki na yasana e vinakata ko koya sa taura na uli.

⁵ Sa vaka talega kina na yameda ni sa tikida lailai ga, a sa vosa vakaviavialevu. Raica, sa vakacaudreva na buka levu na bukawaqa lailai!

⁶ ia sa bukawaqa na yameda, a ka taucoko ni ca: sa vakakina na yameda e na veitiki ni yagoda taucoko, a sa vakacaudreva nai valavala kecega ni yagoda; a sa vakacaudreva oqori ko eli.

⁷ Ni sa vakamanoataki na manumanu kecega e yavai va, kei na manumanu vakatabana, kei na ka sa qasi, kei na ka ni waitui, a sa vakamanoataki ira tu ko ira na tamata:

⁸ ia ka sa sega na tamata sa vakamanoataka rawa na yame; a ka ca sa sega ni tarovi rawa, sa sinai e na ka gaga e dauveivakamatei.

⁹ Eda sa vakavinavinaka kina vua na Turaga ko Tamada; eda sa rukaki ira talega kina na tamata, era sa buli me tautauvata kei na Kalou.

¹⁰ Sa vu mai na gusu e dua bauga, na vakavinavinaka kei na veirukaki. Oi kemudou na wekaqu, e sega ni dodonu me vakakina na veika oqo.

¹¹ E dua beka na mata-ni-wai sa vakadavea mai na matana e dua bauga na wai dranu kei na wai gaga talega?

¹² Oi kemudou na wekaqu, sa dua beka na lolo sa vuataka rawa na olive? se dua li na vaini, na lolo? sa vakakina, sa sega e dua na mata-ni-wai me tovure maikina na waitui kei na wai dranu talega.

¹³ O cei vei kemudou sa vuku ka yalomatua? me vakatakila e nai valavala vinaka na nona cakacaka e na vuku sa yalomalua.

¹⁴ Ia kevaka sa tu e na lomamudou na dauvuvu e gaga kei na dauveiba, dou kakua ni vakalevulevui kemudou, se lasutaka nai vakavuvuli dina.

¹⁵ A vuku vaka ko ya sa sega ni lako sobu maicake, sa vakavuravura ga, sa vakayalomakawa, sa vakatevoro.

¹⁶ Io, kevaka sa tu na vuvu kei na veiba, sa tu kina na veisei kei na cakacaka kecega e ca.

¹⁷ Ia na vuku maicake sa savasava mada, emuri sa dauia na veivakacegui, sa yalomalua, sa vakamasuti rawarawa, sa sinai e na loloma kei na vua vinaka, sa sega ni digitaki ira vakatani na tamata, se dauveivakaisini.

¹⁸ Ia na vua ni valavala dodonu sa kaburaki vata kei na veivakacegui vei ira era sa ia tiko na veivakacegui.