Jemesa 2 - Vakavakadewa Makawa

Me da kakua ni vakarokorokotaki ira na tamata vutuniyau ka beci ira era sa dravudravua, 1-13. Sa sega ni yaga me da vakararavi ki na noda vakabauta, kevaka eda sa sega ni valavala vinaka, 14-26.

¹ Oi kemudou na wekaqu, dou kakua ni taura vata na digitaki ira na tamata, kei na vakabauti Jisu Karisito, na noda Turaga sa vakarokorokotaki.

² Ia kevaka sa curu ki na nomudou vale-ni-lotu e dua na tamata sa vakamama koula, ka vakaisulu e nai sulu vakaiukuuku, a sa curu talega kina na tamata dravudravua, e nai sulu ca;

³ ia dou sa vakarokorokotaki koya sa vakaisulu e nai sulu vakaiukuuku, ka kaya vua, Mo tiko e na yasana vinaka oqo; ia dou sa kaya vua na tamata dravudravua, Mo mani tu yani ki kea, se mai tiko e ruku ni tutu-ni-yavaqu:

⁴ dou sa qai sega li ni ia na veidigidigi, ka sa yaco kina mo dou daulewa e na vakasama ca?

⁵ Dou rogoca, oi kemudou na wekaqu lomani, Sa sega beka ni digitaki ira na Kalou era sa dravudravua e na ka vakavuravura me ra vutuniyau e na vakabauta me ra taukena talega na matanitu sa yalataka ko koya vei ira era sa lomani koya?

⁶ Ia dou sa beca na tamata dravudravua. Era sa sega beka ni vakasaurarataki kemudou ko ira na vutuniyau, ka yarataki kemudou ki na vale ni veilewai?

⁷ Era sa sega beka ni vosavakacacataka na yaca vakarokoroko dou sa vakatokai kina?

⁸ Kevaka dou na muria sara na vunau vakaturaga me vaka nai Vola Tabu, Mo lomana na kai nomu me vakataki iko, dou na qai caka vinaka:

⁹ ia kevaka dou sa digitaki ira na tamata, dou sa qai valavala ca, ka sa beitaka vei kemudou na vunau nai valavala ca.

¹⁰ Ia ko koya ena muria na vunau taucoko, ka sa cala ga e na tikina e dua bauga, sa beitaki me vaka sa talaidredre ki na vunau kecega.

¹¹ Ni sai koya ga sa kaya, Kakua ni dauyalewa, sa kaya talega, Kakua ni laba. Ia kevaka ko sa sega ni dauyalewa, ia ko sa laba ga, ko sa qai talaidredre ki na vunau.

¹² Dou vosa vakakina, kai valavala vakakina, me vakataki ira era na lewai me vaka na vunau ni veisereki.

¹³ Ni na lewai ka sega ni lomani, ko koya sa sega ni ia na loloma; ia na dauloloma sa rawa na veilewai.

¹⁴ Ena yaga vakacava, oi kemudou na wekaqu, kevaka sa kaya e dua ni sa tu vua na vakabauta, kevaka sa sega vua na cakacaka? ena vakabulai koya beka na vakabauta?

¹⁵ Ia kevaka sa dua na veiwekani se yalewa se tagane sa sega na nonai sulu, ka sega na kena e na veisiga,

¹⁶ ia ka dua vei kemudou sa kaya vei ira, Dou lako e na vakacegu, dou tatalai ka vakamamautaki; ia dou sa sega ni solia na veika e yaga ki na yagodra; a cava na betena?

¹⁷ Sa vaka talega kina na vakabauta kevaka sa sega ni tu vata kei na cakacaka, sa mate ga, ni sa tu duaduaga.

¹⁸ Ia ena kaya beka e dua, Sa tu ga vei iko na vakabauta, sa tu ga vei au na cakacaka; mo vakatakila mai vei au na nomu vakabauta ni sa sega ga na nomu cakacaka, ia ka'u na vakatakila vei iko na noqu vakabauta e na noqu cakacaka.

¹⁹ O sa vakabauta beka ni sa dua na Kalou; o sa caka vinaka: ia ko ira talega na tevoro era sa vakabauta, a ra sa sautaninini talega.

²⁰ O sa via kila beka, o iko na tamata sesewa, ni sa mate ga na vakabauta ni sa sega na cakacaka:

²¹ e sega beka ni vakadonui ko Eparaama na tamada e na vuku ni cakacaka, ni sa vakacabora na luvena ko Aisake e dela ni cabocabo-ni-soro?

²² O sa raica beka ni sa veivuke na vakabauta kei na nona cakacaka, a sa taucoko sara mai na vakabauta e na vuku ni cakacaka?

²³ A sa vakayacori kina nai Vola Tabu o koya sa kaya, Sa vakabauta na Kalou ko Eparaama, a sa wili vua mei valavala dodonu; a sa vakatokai me Weka ni Kalou.

²⁴ Ia dou sa qai raica ni sa vakadonui na tamata e na vuku ni cakacaka, a sa sega ga e na vuku ni vakabauta duaduaga.

²⁵ Sa vaka talega kina ko Reapi na yalewa ka dautagane, sa sega li ni vakadonui e na vuku ni cakacaka, ni sa vakacegui rau nai talaki, ka vakatala yani e na sala tani?

²⁶ Me vaka sa mate na yago ni sa takali na yalo, sa mate vakakina na vakabauta ni sa takali na cakacaka.