Isikeli 9 - Vakavakadewa Makawa

E dua na raivotu, sa tukuni kina ko ira era na vakabulai, 1-4, kei na nodra cudruvi kecega era sa vo, 5-7. Sa bese na Kalou ni vakamasuti e na vukudra, 8-11.

¹ Sa qai kaci vakadomoilevu e daligaqu ko koya, ka kaya, Me ra toro mai ko ira sa vakaraica na koro, ia me ra dui taura yadua na nonai yaragi ni veivakamatei e ligana.

² Ka raica, e lewe ono na tagane eratou sa lako tu mai na sala mai na matamata-ni-koro e cake, sa donuya na tokalau a ratou sa dui taura yadua e ligana na nonai yaragi ni ravuravu; ia e dua vei iratou na tagane sa vakaisulu e na lineni, ka sa tu vua e dua na tavaya wai ni volavola: a ratou sa curu ki loma, ka tu voleka ki nai cabocabo-ni-soro parasa.

³ Ia nai ukuuku ni Kalou i Isireli sa lako cake mai na Jerupi, ka tu kina, ki nai lago ni vale. Ka sa kaci ko koya ki na tamata sa vakaisulu e na lineni, ka sa tu vua e dua na tavaya wai ni volavola;

⁴ a sa kaya vua ko Jiova, Mo lako voli yani e na loma ni koro, e na loma i Jerusalemi, ka vola nai vakatakilakila e na yadredra na tamata era sa vutugu ka qoqolou e na vuku ni ka vakasisila kecega sa caka e na loma ni koro.

⁵ Ia vei iratou tale eso sa kaya ko koya ni'u rogoca tiko, Dou la'ki muri koya yani e loma ni koro, ka ia na ravuravu: me kakua ni vosota na matamudou, kakua talega ni dou yalololoma:

⁶ dou vakamatei ira sara ga na qase, kei na cauravou: na goneyalewa, kei na gone lalai, kei na yalewa talega, ia dou kakua ni toro yani vua e dua na tamata sa volai tu; ka mo dou vakatekivu mada e na noqu vale tabu. E ratou sa qai vakatekivu ka ia vei ira na tamata qase era tu e na mata ni vale.

⁷ Ka sa kaya vei iratou ko koya, Dou vakadukadukalitaka na vale, ka vakaosoosoya na lomanibai e na moku: dou lako yani. A ratou sa lako yani ka ia na veivakamatei e na koro.

⁸ Ka sa yaco, ni ratou sa ia tiko na veivakamatei, ia ka'u sa vo tiko duaduaga koi au, ka'u sa qai bale vakatoboicu, ka tagi, ka kaya, Isa le, noqu Turaga Jiova! o ni na vakarusai ira kecega na kedra vo na Isireli ni kemuni sa sovaraka na nomuni cudru ki Jerusalemi?

⁹ Sa qai kaya vei au ko koya, A nodra caka cala na mataqali i Isireli kei Juta sa ka levu vakaidina sara, ka sa robota na vanua na dra, ia na koro sa sinai tu e na veivakaucacataki: ni ra sa kaya, Sa biuti vuravura ko Jiova, ia sa sega ni raica ko Jiova.

¹⁰ Io koi au talega, ena sega ni vosovoso na mataqu, au na sega talega ni yalololoma, a nodra i valavala ka'u na sauma sara ga ki na uludra.

¹¹ Ka raica, sa mai tukutuku na tamata sa vakaisulu e na lineni, ka sa dua na nona tavaya wai ni volavola e na tolona, ka kaya, Au sa cakava me vaka na ka ko sa vakarota vei au.