Isikeli 8 - Vakavakadewa Makawa

Sa vakatakilai vei Isikeli e na raivotu ni Kalou mai Jerusalemi, 1-4, na matakau i na Vuvu e na vale tabu, 5,6, kei na nodra vale ni ka vakalialia na qase ni vanua, 7-12, kei ira na yalewa era tagicaki Tamusi, 13,14, kei na tamata era qarava na mata-ni-siga, 15-17. Sa cudru vakalevu sara ko Jiova e na vuku ni nodra qarava na kalou lasu, 18.

¹ A sa yaco e nai kaono ni yabaki, e nai kaono ni vula, e nai kalima ni siga ni vula, ni'u a tiko e noqu vale, ia ko ira na qase ni Juta, era sa tiko e mataqu, sa qai tauci au maikea na liga ni Turaga ko Jiova.

² Au a qai vakaraica, ka raica, sa dua nai vakatakarakara ka rairai me vaka sa bukawaqa: mai na kenai rairai ni tolona ka lako sobu, sa bukawaqa; mai na tolona talega ka lako cake, sa rairai me vaka na rarama, me vaka na parasa matavinaka.

³ A sa dodoka mai na yaloyalo ni dua na liga, ka tauri au e na tobe ni uluqu; a sa laveti au cake na yalo e na maliwa kei vuravura kei lomalagi, a sa kauti au e na raivotu ni Kalou ki Jerusalemi, ki na matamata-ni-koro ki loma sa donuya na mata ni tokalau; a sa tu maikina nai tikotiko ni matakau i na Vuvu, sa vakatubura na veivakavuvutaki.

⁴ Ka raica, sa tu maikea nai ukuuku ni Kalou i Isireli, me vaka na raivotu ka'u a raica e na buca.

⁵ Sa qai kaya vei au ko koya, ko iko na luve ni tamata, mo ta cake mada ki na sala vaka ki na tokalau. Au a qai ta cake ki na sala vaka ki na tokalau, ka raica, sa tu mai na mata ni tokalau mai na matamata-ni-koro ni cabocabo-ni-soro na matakau ko ya i na Vuvu mai nai curucuru.

⁶ A sa kaya tale vei au ko koya, ko iko na luve ni tamata, ko sa kunea li na ka era cakava? io na ka sa vakasisila vakalevu era sa cakava eke ko ira na mataqali i Isireli, me'u lako tani vakayawa kina mai na noqu vale tabu? ia mo lesu tale, mo mai raica na ka sa vakasisila vakalevu cake.

⁷ A sa kauti au ko koya ki na mata ni bai; ia ni'u a vakaraica sa kune e dua na qara e na bai vatu.

⁸ Sa qai kaya vei au ko koya, Ko iko na luve ni tamata, mo kelikeli mada ki na bai oqo: ia ni'u a kelia ki na bai, raica, sa dua na katuba.

⁹ A sa kaya vei au ko koya, Mo curu mada, mo raica na ka vakasisila ca sara era sa cakava eke.

¹⁰ Au a qai curu kina ka vakaraica; ka'u sa kunea na yavusa manumanu kece sa dauqasi voli, kei na manumanu yavai va vakasisila, kei na nodra matakau kece na mataqali i Isireli, sa volai tu e na lalaga taucoko:

¹¹ a ra sa qarava ko ira e lewe vitusagavulu na tagane era qase ni mataqali i Isireli, ia ko Jeasanaia na luve i Safani sa tu e na kedra maliwa, ka ra dui taura e ligana na nona miqa ni ka boi vinaka; ka sa dua na o loaloa ni ka boi vinaka sa kuvu cake tu.

¹² Sa qai kaya vei au ko koya, Ko sa kunea li, ko iko na luve ni tamata, na ka era sa dui cakava ko ira na qase ni mataqali i Isireli e na butobuto, na tamata yadua e na bure ni nona matakau? ni ra sa kaya, Sa sega ni raici keda ko Jiova; sa biuti vuravura ko Jiova.

¹³ A sa kaya vei au ko koya, Mo baci lesu tale, mo mai raica na ka vakasisila vakalevu cake era sa cakava.

¹⁴ Sa qai kauti au ko koya ki na matamata-ni-koro ni vale i Jiova sa donuya na mata ni tokalau; ka raica, era sa tiko maikea eso na yalewa era tagicaki Tamusi.

¹⁵ Sa qai kaya vei au ko koya, Ko sa kunea li na ka oqo, ko iko na luve ni tamata? mo baci lesu tale, mo mai raica na ka vakasisila vakalevu cake e na ka oqo.

¹⁶ A sa kauti au ko koya ki na lomanibai e loma ni vale i Jiova, ka raica, sa tiko mai na mata ni vale i Jiova, e na tadrua ni curucuru kei nai cabocabo-ni-soro, e lewe ruasagavulu ka lima beka na tagane, era sa vakanadaku ki na vale i Jiova, ka vakanamata ki na tu-i-cake; a ra sa cuva ki na mata-ni-siga vaka ki na tu-i-cake.

¹⁷ Sa qai kaya vei au ko koya, Ko sa kunea li na ka oqo, ko iko na luve ni tamata? Sa ka wale beka vei ira na mataqali i Juta, ni ra cakava na ka vakasisila era sa cakava tiko eke? ni ra sa vakasinaita na vanua e nai valavala kaukauwa, a ra qai lesu tale me ra mai vakacudrui au: ka raica, era sa kauta na taba ni kau kina ucudra.

¹⁸ O koya oqo ka'u na cakacaka kina e na cudru: ena sega ni vosovoso na mataqu, au na sega talega ni yalololoma: ia ke ra tagi vakadomoilevu e na daligaqu, ka'u na sega ni rogoci ira.