Isikeli 7 - Vakavakadewa Makawa

Ena cudruvi vakaoti na vanua ko Isireli, 1-15. Ena vakabulai eso na tamata, ka la'ki tagicaka na nodra i valavala ca, 16-19. Ena soli na vale tabu vei ira na meca me sa vakacacani ni sa vakacacataka oti ko ira na Isireli e na nodra matakau, 20-22. Sa vakatakarakarataki e na sinucodo na nodra vakabobulataki vakaca na lewe ni vanua, 23-27.

¹ A sa yaco tale vei au na vosa i Jiova, ka vaka,

² Ia ko iko, na luve ni tamata, sa kaya vakaoqo na Turaga ko Jiova ki na vanua vaka-Isireli; Nai otioti, sa yaco mai nai otioti ki nai yalayala vava ni vanua.

³ Sa qai yaco vei iko na kemui otioti, ia ka'u na vakayacora na noqu cudru vei iko, ka lewai iko me vaka na nomu i valavala, ka sauma vei iko na nomu i valavala vakasisila kecega.

⁴ Ia na mataqu ena sega ni vosoti iko, au na sega talega ni yalololoma vei iko: ni ka'u na sauma vei iko na nomu i valavala, ia na nomu i valavala vakasisila sa na tu ga vei iko: ia dou na kila ni sai au ko Jiova.

⁵ Sa kaya vakaoqo na Turaga ko Jiova: Na ca, na ca duaduaga, raica, sa qai yaco mai oqo.

⁶ Sa yaco mai nai otioti, sa yaco mai nai otioti: sa yadravi iko; raica, sa qai yaco mai.

⁷ Sa kida mai vei iko na kena mataka, o iko sa tiko e na vanua: sa yaco mai na kena gauna, sa voleka mai na siga ni kidroa, ka segai na kaila ni marau e na veiulu-ni-vanua.

⁸ Sa vo ga e lailai me'u qai sova yani na noqu cudru vei iko, ka vakaotia yani na noqu lesa vei iko: ia ka'u na lewai iko me vaka na nomu i valavala, ka sauma vei iko na nomu i valavala vakasisila kecega.

⁹ Ia na mataqu ena sega dina ni vosota, au na sega talega ni yalololoma: ka'u na sauma vei iko me vaka na nomu i valavala, ia na nomu ka vakasisila ena tu ga vei iko; ia dou na kila ni sai au ko Jiova sa ia na veicudruvi.

¹⁰ Dou raica na kena siga, raica, sa yaco mai: sa lako tu yani na mataka; sa seraki mai na taba ni kau, sa kubu mai na viavialevu.

¹¹ Na veivakacacani, sa tubu cake me taba ni kau ca sara: ena sega vei ira me vo tiko, se vei ira na nodra lewe vuqa, se dua na nodra i yau: ena sega talega na tagi yaso e na vukudra.

¹² Sa yaco na kena gauna, sa toro voleka mai na siga: me kakua ni reki ko koya sa voli ka: me kakua talega ni tagi ko koya sa volitaka: ni sa cudruvi kecega na kedra lewe vuqa.

¹³ Ni na sega ni taukena tale na ka sa volitaki, ko koya sa volitaka na ka, ke ra sa bula tiko: ni sa bale na raivotu oqo vei ira kecega na kedra lewe vuqa, ia ena sega me lesu mai; ena sega talega e dua vei ira sa caka cala tiko me vakaukauwataki koya kina.

¹⁴ Era sa uvuca na davui, io me ra vakarau kecega; ia sa sega e dua sa lako ki nai valu: ni'u sa cudruvi ira kecega na kedra lewe vuqa.

¹⁵ Ai seleiwau, sa tu ga mai taudaku, kei na mate dauveiveitauvi kei na dausiga, sa tu mai vale: o koya sa tiko mai na were ena mate e nai seleiwau; o koya talega sa tiko mai na koro, ena kani koya na dausiga kei na mate dauveiveitauvi.

¹⁶ A ra na dro ko ira sa dro bula, a ra na tiko e na veiulu-ni-vanua me vaka na ruve ni veibuca, ka dui tagi yadua e na vuku ni nonai valavala ca.

¹⁷ A ligadra kece ena wadamele, a durudra kece talega ena vaka na wai.

¹⁸ A ra na vauci ira e nai sulu taga, ena nodra i tutuvi talega na domobula; era na matamadua ko ira kecega, era na ulu cou ko ira kece talega.

¹⁹ A nodra siliva era na biuta ki na sala ni koro; kei na nodra koula ena vaka na ka velavela vei ira; a nodra siliva kei na nodra koula, ena sega ni vakabulai ira rawa e na siga ni cudru i Jiova: a yalodra, ena sega ni mamau kina; a ketedra talega, ena sega ni vakamamautaki kina: ni sa nodra caka cala oqo era sa tarabe kina.

²⁰ Ia na nona ka vakaiukuuku ka vakaturaga, sa vakaduria ko koya me ka lagilagi sara: ia na matakau ni nodra ka vakasisila ka velavela era sa cakava kina: o koya oqo ka'u sa cakava me ka vakasisila vei ira:

²¹ Ia ka'u na solia ki na ligadra na kai tani, me vakayanaki; vei ira talega na tamata ca kei vuravura, mei toki ni valu; a ra na vakacacana.

²² Ia ka'u na vagolea tani na mataqu vei ira, ka ra na vakacacataka na noqu yasana tabu: ni ra na curu kina na dauvakacaca, ka vakacacana.

²³ Mo cakava na sinucodo: ni sa robota na vanua na veilabati; kei na koro sa sinai tu e nai valavala kaukauwa.

²⁴ O koya oqo ka'u na kauti ira mai era ca sara vei ira na iceni, a ra na taukena na nodra veivale: ia ka'u na vakaotia na nodra viavialevu na kaukauwa: ena vakacacani talega na nodra veiyasana tabu.

²⁵ Sa yaco mai na dauveivakarusai; ka ra na ia na veisorosorovi, ka na sega ga.

²⁶ Na ca ena veitaravi kei na ca; nai rogorogo talega kei nai rogorogo; era na qai taroga vua na parofita na raivotu; ia na vunau, ena yali mai vua na bete; kei na lewa, maivei ira na qase.

²⁷ Ena tagi ko koya na tui, io ko koya na turaga ena vakaisulu e na rusa; a ligadra talega na lewe ni vanua, ena taqaya: ka'u na cakacaka vei ira me vaka na nodra i valavala; ia ka'u na cudruvi ira me vaka na ka sa dodonu vei ira; a ra na kila ni sai au ko Jiova.