Isikeli 5 - Vakavakadewa Makawa

Sa vakatakarakarataki na nodra cudruvi vakalevu na kai Jerusalemi e na vuku ni nodra dautalaidredre ki na vunau ni Kalou, 1-10. Era na cudruvi e nai valu, kei na dausiga, kei na veivakasevi, 11-17.

¹ Ia ko iko, na luve ni tamata, mo taura e dua nai sele gata, io, e dua nai tasi ni kena dau mo taura, ka tasia kina na ulumu kei na kumimu: mo qai taura e dua nai vakarau ni bibi, ka wasea na drau ni ulumu:

² e dua na kena wase mo qai vakama e na bukawaqa e na loma ni koro, ni sa oti na veibogi sa buku kina na druadrua: ia mo taura e dua na kena wase, ka taya vakavolivolita e nai sele: ia na kenai katolu ni kena wase mo veibiuyaka ki na mata ni cagi; ia ka'u na ucuna nai seleiwau me muri ira.

³ Ia mo taura maikina e vica walega, ka vauca ki na tutu ni nomu i sulu.

⁴ Ia mo qai taura eso tale, ka biuta ki na loma ni bukawaqa, ka vakama e na bukawaqa; ni na lako maikina na bukawaqa kivei ira na mataqali kecega ni Isireli.

⁵ Sa kaya vakaoqo na Turaga ko Jiova, Oqo ko Jerusalemi: ka'u sa vakatura ena maliwa ni veimatanitu, a sa tu vakavolivoliti koya na veivanua.

⁶ Ia sa vorata vakalevu ko koya na noqu lewa ka ni uasivi cake e na ca ka sa uasivi sobu na veimatanitu, sa vorata vakalevu talega na noqu i lesilesi ko koya, ka vakalailai na veivanua sa vakavolivoliti koya: ni ra sa biuta na noqu lewa, ka ra sa sega ni muria na noqu i lesilesi.

⁷ O koya sa kaya kina vakaoqo na Turaga ko Jiova; Ni dou sa yalovakatani vakalevu ka vakalailai na veimatanitu sa vakavolivoliti kemudou, dou a sega talega ni muria na noqu i lesilesi, se vakabauta na noqu lewa, se cakava me vaka na nodra lewa dodonu na veimatanitu sa vakavolivoliti kemudou;

⁸ o koya oqo sa kaya kina vakaoqo na Turaga ko Jiova; Raica, koi au, ka'u sa nomu meca, io ka'u na ia e na kemudou maliwa na veicudruvi e matadra na veimatanitu.

⁹ Ia ka'u na cakava vei iko na ka ka'u a sega ni cakava, io na ka ka'u na sega tale ni cakava vakakina, e na vuku ni nomu i valavala vakasisila kecega:

¹⁰ io ko ira na tama ni gone era na kania na luvedra e na kemudou maliwa, o ira talega na gone era na kania na tamadra; ia ka'u na cudruvi iko, ka dui cagina kece tani na kemudou vo ki na mata ni cagi kecega.

¹¹ Ia, me vaka na dina ni noqu bula, sa kaya na Turaga ko Jiova; Ni ko sa vakadukadukalitaka na noqu vale tabu e na nomu ka velavela kecega, kei na nomu ka vakasisila kecega, oi au talega ka'u na vakalailaitaki iko; ia ka'u na sega ni vosoti iko ka'u na sega talega ni yalololoma vei iko.

¹² E dua na kemudou wase ena mate e na dauveiveitauvi, ia era na vakaoti ga e na dausiga e na kemudou maliwa: e dua tale na kemudou wase ena bale e nai seleiwau sa na vakavolivoliti iko: ia na kenai katolu ni kemudou wase ka'u na vakaseva ki na mata ni cagi kecega, ia ka'u na ucuna nai seleiwau me muri ira.

¹³ Ena vakayacori vakaoqo na noqu cudru, ia ka'u na vakatauca na noqu cudru katakata vei ira, ka'u na qai vakacegu: era na qai kila ni sai au ko Jiova ka'u sa vosa e na noqu lomakatakata, ni'u sa vakayacora na noqu cudru levu vei ira.

¹⁴ Ia ka'u na soli iko mo vakalalataki, ka vakalialiai e na kedra maliwa na veimatanitu era tiko voliti iko, e na matadra kece era lako tu yani.

¹⁵ Ia ko na yaco mo ka e vakalialiai ka vosavakacacataki, me ra vakavulici kina ka vakidacalataki ko ira na veimatanitu sa tiko voliti iko, ni'u sa ia na veicudruvi e na kemudou maliwa e na cudru, kei na lesa, kei na veivunauci vakacudrucudru. Oi au ko Jiova ka'u sa tukuna.

¹⁶ Ni'u sa tala na gasau ca ni dausiga vei ira, na ka era na rusa kina, na ka ka'u na tala me vakarusai kemudou: ia ka'u na vakaikuritaka na dausiga vei kemudou, ka muduka na kemudou kakana, io na madrai:

¹⁷ ia ka'u na vakayacora vei kemudou na dausiga kei na manumanu ca, ka ra na vakamatei ira na nomudou; ia na mate dauveiveitauvi kei na veilabati ena ia voli e na kemudou maliwa; kei nai seleiwau ka'u na vakayacora vei iko. Koi au ko Jiova ka'u sa tukuna.