Isikeli 45 - Vakavakadewa Makawa

Ni vota na vanua me dua nai votavota tabu, 1-5, kei na kena na koro, 6, kei na nona na turaga, 7,8. Ai vakaro vua na turaga, 9-25.

¹ Ia ni dou sa vota na vanua me vakaitaukeitaki, dou na vakatabuya e dua na tikina mei sevu vei Jiova, mei votavota tabu ni vanua: na kena balavu me rua na oba ka lima na udolu na gasau, kei na kena raraba me dua na oba na gasau. Ena tabu na tikina oqo e na kenai yalayala kecega e na veiyasana.

² E na tikina oqo me dua na yasana tabu e lima na drau na kiupiti na kena balavu, ka lima na drau na kiupiti na kena raraba, ka takiveilevu na veiyasana; ka me limasagavulu na kiupiti na kenai bili e na veiyasana.

³ Ia mai na tikina oqo mo vakarauta e rua na oba ka lima na udolu na kena balavu, ka dua na oba na kena raraba: ka me tu ki loma na vale tabu io, na yasana tabu sara.

⁴ Ai votavota tabu ni vanua me sa nodra na bete era vakaitavi e na vale tabu, era toro mai me ra qaravi Jiova: ia mei tikotiko ni nodra veivale ko ya, ka dua na tikina tabu me tikina tabu sara.

⁵ Ia sa rua na oba ka lima na udolu na kena balavu, ka dua na oba na kena raraba, me nodra talega na Livai, era vakaitavi e na vale, me ra taukena vakataki ira mei tutu ni veivalevale e ruasagavulu.

⁶ Ia nai votavota ni koro mo dou solia, me lima na udolu na kena raraba, ka rua na oba ka lima na udolu na kena balavu, me donuya nai sevu tabu: ena nodra kecega na mataqali i Isireli.

⁷ Me nona talega na turaga e dua nai votavota ki na yasana vaka ka vaka ni sevu tabu, kei nai votavota ni koro, me donuya nai sevu tabu, me donuya talega nai votavota ni koro, me tekivu mai na yasana e ra ka yala sara ki ra, me tekivu talega mai na yasana e cake ka yala sara ki na tu-i-cake: ia na kena balavu me donuya e dua nai votavota, ka tekivu mai na kenai yalayala mai ra ka yala ki na kenai yalayala ki cake.

⁸ Sa na tu ga e na vanua, na nonai votavota e Isireli ia ko ira na noqu tamata turaga me ra kakua ni vakararawataki ira tale na noqu tamata; ia me ra solia na vanua vei ira na mataqali i Isireli me vaka na dui nodra veimataqali.

⁹ Sa kaya vakaoqo na Turaga ko Jiova; Me rauti kemudou mada, oi kemudou na turaga ni Isireli: dou biuta tani nai valavala kaukauwa kei na veivakacacani, ia mo dou cakava na ka vinaka ka dodonu ga me oti sara na nomudou vakasaurarataki ira na noqu tamata, sa kaya na Turaga ko Jiova.

¹⁰ Dou vakabauta ga nai vakarau ni bibi dodonu, kei na efa dodonu, kei na paca dodonu ga.

¹¹ Na efa kei na paca me sai vakarau vata ga, e dua na paca sa kenai katini ni dua na omeri, ka dua na efa sa kenai katini ni dua na omeri: na omeri ga sa na kenai vakarau vei kemudou.

¹² Ia na sikeli, sa rauta e ruasagavulu na kera: na sikeli e ruasagavulu, na sikeli e ruasagavulu ka lima, na sikeli e tinikalima, me sa dui nomudou mane ga ko ya.

¹³ Nai madrali dou na vakacabora me vaka tu oqo: nai kaono ni dua na efa mai na omeri witi e dua, nai kaono talega ni dua na efa mo dou solia mai na dua omeri parile:

¹⁴ ia na ka sa lesi e na vuku ni waiwai, na paca waiwai, na kenai katini ni dua na paca mo dou solia mai na dua na omeri waiwai, ia e tini na paca sa rauta e dua na omeri; ni sa paca e tini e dua na omeri:

¹⁵ me dua talega na lami mai na qele ni sipi e rua na drau, mai na nodra vanua veico vinaka na Isireli, mei madrali laukana, kai soro kama, kai soro ni veivinakati, me sorovaki ira, sa kaya na Turaga ko Jiova.

¹⁶ O ira kece na lewe ni vanua me ra vakaitavi vata e nai madrali oqo kei koya na turaga mai Isireli.

¹⁷ Ia sa na nonai tavi na tui nai soro kama, kei nai madrali laukana, kei nai madrali gunuvi, e na so levu, kei na vula vou, kei na siga tabu, e na nodra gauna tabu kecega na mataqali i Isireli: ena vakarautaka ko koya nai soro ni valavala ca, kei nai madrali laukana, kei nai soro kama, kei nai soro ni veivinakati, me sorovaki ira kina na mataqali i Isireli.

¹⁸ Sa kaya vakaoqo na Turaga ko Jiova: E nai matai ni vula, e nai matai ni siga ni vula, mo qai kauta e dua na luve ni pulumokau sa sega na kena ca, ka vakasavasavataka na tikina tabu:

¹⁹ ia me kauta ko koya na bete eso na dra ni soro ni valavala ca, me kureitaka ki na duru ni sogo ni vale, kei na tutuna vava ni rara ni cabocabo-ni-soro, kei na duru ni matamata-ni-koro ni lomanibai eloma.

²⁰ Ia mo kitaka vaka talega kina e nai kavitu ni siga ni vula e na vukudra yadua sa caka cala, ka vakacalaka: dou na sorovaka vakaoqo na vale.

²¹ E nai matai ni vula e nai katinikava ni siga ni vula, mo dou qai ia na kana vata ni lako-sivia, na so levu bogi vitu; me sa laukana kina na madrai sa sega ni vakaleveni.

²² Ia na turaga me qai vakarautaka e na siga ko ya e na vukuna e na vukudra kece talega na lewe ni vanua e dua na pulumokau mei soro ni valavala ca.

²³ Ia me vakarautaka ko koya e na veibogi vituvitu ni so levu mei soro kama vei Jiova, e vitu na pulumokau ka vitu na sipi tagane e sega na kena ca, e na veisiga yadua ka me bogi vitu; ka dua talega na luve ni me e na kena veisiga mei soro ni valavala ca:

²⁴ kei nai madrali laukana, e dua na efa me ia vata kei na dua na pulumokau, ka dua na efa me ia vata kei na dua na sipi tagane, ka tini na paidi waiwai me ia vata kei na dua na efa, me na vakarautaka ko koya.

²⁵ E nai kavitu ni vula, e nai katinikalima ni siga ni vula, e na kena so levu bogi vitu, me kitaka vaka talega kina ko koya, me vaka nai soro ni valavala ca, ka vaka nai soro kama, ka vaka nai madrali laukana, ka vaka na waiwai.