Isikeli 41 - Vakavakadewa Makawa

Ai vakarau, kei na veitikina, kei nai ukuuku ni vale tabu, 1-26.

¹ Sa qai kauti au ko koya ki na vale tabu, ka sa vakarauta na duru, ka sa dui ono na kiupiti na kena raraba ki na tabana e dua, ka dui ono na kiupiti na kena raraba ki na tabana ka dua, na kena raraba ni vale tabu sa vaka kina.

² Ia na kena raraba ni katuba sa tini na kiupiti; ia na taba ni katuba sa lima na kiupiti vaka, ka lima na kiupiti vaka; a sa vakarauta ko koya na kena balavu, ka sa vasagavulu na kiupiti: kei na kena raraba, ka sa ruasagavulu na kiupiti.

³ Sa qai curu ki loma ko koya, ka vakarauta na duru ni sogo, a sa rua na kiupiti; kei na katuba, ka sa ono na kiupiti, kei na raraba ni katuba, ka sa vitu na kiupiti.

⁴ A sa vakarauta ko koya na kena balavu, ka sa ruasagavulu na kiupiti: kei na rabana, ka sa ruasagavulu na kiupiti e na mata ni vale tabu, a sa kaya vei au ko koya, Sai koya oqo na tikina tabu sara.

⁵ Sa qai vakarauta ko koya na lalaga ni vale, ka sa ono na kiupiti: kei na raraba ni loqi ki na sarisari ni vale, ka sa dui va na kiupiti, ka volita na vale e na veiyasana kecega.

⁶ Ia nai taba loqi e veitaqataqai, sa tolu, ka yatolusagavulu na kena loqi; a sa lagoni mai ki na lalaga ni vale sa kedra dina voli tu na loqi ki sarisari ni vale, me tauri deivaki kina ia sa sega ni sema kei na lalaga ni vale tabu.

⁷ A sa rabailevu cake tu, ni sa cabeti voli ki cake nai taba loqi: e na vuku ni sa cabeti voli tiko ki cake na vale ka volita sara na vale tabu: o koya oqo sa rabailevu cake tu kina na vale ki cake, ni sa cabeti vakaoqo nai taba loqi ki cake sara, mai na kena vale e ra sara, ka basika na kena eloma.

⁸ Au a raica talega na kena cecere ni vale e na veiyasana mai na dui kenai lago nai taba loqi, ka sa ono na kiupiti ki na kena sema kei na vale.

⁹ A kena raraba ni bai ni taba loqi ki sau, sa lima na kiupiti: ia na tikina sa vo mai ki vale sa kedra nai taba loqi sa tu mai ki loma.

¹⁰ Ia na tadrua ni yatu vale sa ruasagavulu na kiupiti ka muri volita na vale tabu e na veiyasana.

¹¹ Ia na kedra katuba nai taba loqi sa dui donuya tu na tikina sa vo, sa dua na katuba e donuya na tokalau, ka dua tale na katuba sa donuya na ceva: ia na kena raraba ni tikina sa vo sa lima na kiupiti ka volita tu.

¹² Ia na vale sa tara tu e na mata ni yasana tabu ki na tikina ki ra sa vitusagavulu na kiupiti na kena raraba; ia na lalaga ni vale e tara tu sa lima na kiupiti sa volita tu na kena vavaku, ka ciwasagavulu na kiupiti na kena balavu.

¹³ Ia sa vakarauta ko koya na vale tabu, e dua na drau na kiupiti na kena balavu; kei na yasana tabu, kei na vale sa tara tu, kei na kena veibai, e dua na drau na kiupiti na kena balavu;

¹⁴ na kena raraba talega ni mata vale, kei na yasana tabu ki na tu-i-cake, e dua na drau na kiupiti.

¹⁵ A sa vakarauta ko koya na kena balavu ni vale e tara tu ka donuya na yasana tabu mai dakuna, kei na kena varada vaka ka vaka, e dua na drau na kiupiti; kei na vale tabu ki loma, kei nai curucuru ni lomanibai;

¹⁶ kei na duru ni sogo, kei na katuba qiqo, kei na varada e dui volita nai taba loqi e tolu ka donuya na katuba, ka botani voli tu e na kau, mai na qele talega ka yala ki na katuba lalai, ia na katuba lalai sa lati tu,

¹⁷ ka yacova oqori ki dela ni katuba, ka yala sara ki na vale tabu ki loma, e taudaku talega, ka muria voli sara tu na bai e na veiyasana eloma e taudaku talega, me vaka na dui kenai vakarau.

¹⁸ A sa caka kina na jerupi kei na balabala, ia e dua na balabala sa ceuti tu ga e na maliwa ni jerupi e rua; a sa dui yarua na matadra na jerupi;

¹⁹ ia na mata vakatamata sa donuya na balabala vaka, kei na mata vaka luve ni laioni sa donuya na balabala vaka: sa caka voli tu e na veiyasana kecega ni vale tabu.

²⁰ Sa vu mai na qele ka yala ki na tikina e dela ni katuba sa caka kina na jerupi kei na balabala, e na lalaga ni vale tabu talega.

²¹ A duru ni sogo ni vale tabu sa dui ta vakarivirivi, kei na mata ni tikina tabu sara; sa rairai tautauvata ruarua.

²² Ai cabocabo-ni-soro kau sa tolu na kiupiti na kena cecere, ka rua na kiupiti na kena balavu; ia na tutuna, kei na delana, kei na sarisarina, sa kau ga: ka sa kaya vei au ko koya, Oqo na tepeli sa tu e na mata i Jiova.

²³ A sa dui yarua na kena katuba na vale tabu kei na tikina tabu sara.

²⁴ A sa dui lobi rua na katuba yadua, e dui rube tu ruarua; sa lobi rua na katuba e dua, ka lobi rua na katuba kadua.

²⁵ A sa ceuti kina, io ki na katuba ni vale tabu, na jerupi kei na balabala, me vaka sa ceuti e na lalaga; ka sa so na papa vavaku e na mata ni lalaga ni curucuru ki tuba.

²⁶ Ka sa so na kena katuba qiqo ka so na kena balabala vaka ka vaka e na yasa ni curucuru, ia nai taba loqi ni vale, sa vakapapa vavaku talega.