Isikeli 40 - Vakavakadewa Makawa

A raivotu ni koro ni Kalou, kei koya na agilose sa vakarauta na kena veimatamata-ni-koro, kei na tepeli-ni-soro, kei na nodra veivale na dau-ni-meke kei na bete, kei nai curucuru ni vale tabu, 1-49.

¹ E nai karuasagavulu ka lima ni yabaki ni neimami tiko vakabobula, e nai vakatekivu ni yabaki, e nai katini ni siga ni vula, sa oti e katinikava na yabaki ni kena samu na koro, e na siga dina ko ya sa tiko vei au na liga i Jiova, ka sa kauti au ki kea.

² E na raivotu ni Kalou sa kauti au mai ki na nodra vanua na Isireli, ka vakatikori au ki na dua na dela ni ulu-ni-vanua cecere sara, ka sa vaka e tu maikina e dua na koro sa tara rawa tu ki na mata ni ceva.

³ A sa kauti au ki kea ko koya, ka raica, sa dua na tamata, ka sa rairai ko koya me vaka sa parasa, ka dua na dali laino e na ligana, ka dua na gasau i vakarau; ka sa wavu tu ko koya e na matamata-ni-koro.

⁴ A sa kaya vei au na tamata oqori, Ko iko na luve ni tamata, mo vakaraica mada e na matamu, ka rogoca mada e na daligamu, ka vakasara ga na lomamu ki na ka kecega ka'u na vakaraitaka vei iko; ni ko sa kau mai ki ke me'u vakaraitaka vei iko na ka oqo: tukuna na ka kece ko sa raica vei ira na mataqali i Isireli.

⁵ Ka raica, sa dua na bai mai taudaku ni vale ka vakavolivolita, ia sa dua na gasau i vakarau e na ligana na tamata, na kena balavu e ono na kiupiti, ka dua na tikina, a sa vakarauta na kena raraba ni bai, ka sa dua ga na gasau: kei na kena cecere, a sa dua ga na gasau.

⁶ Sa qai lako mai ko koya ki na matamata-ni-koro sa qara donu vaka ki na tu-i-cake, ka sa cabeta na kenai kabakaba, ka vakarauta e dua nai lago ni matamata-ni-koro, a sa dua ga na gasau na kena raraba; kei na lago kadua, a sa dua ga na gasau na kena raraba.

⁷ Ia na kena veivalevale sa dui yadua na gasau na kena balavu, ka dui yadua na gasau na kena raraba; ia na kena tadrua ni veivalevale sa dui lima na kiupiti; ia nai lago ni matamata-ni-koro e nai curucuru ni matamata-ni-koro ki loma, sa dua ga na gasau.

⁸ Sa vakarautaka talega ko koya nai curucuru ni matamata-ni-koro ki loma, a sa dua ga na gasau.

⁹ Sa qai vakarauta ko koya nai curucuru ni matamata-ni-koro, a sa walu na kiupiti; kei na kena duru, a sa rua na kiupiti; ia nai curucuru ni matamata-ni-koro sa tu ki loma.

¹⁰ Ia na kena veivalevale ni matamata-ni-koro ki na tu i cake sa tolu vaka, ka tolu vaka; sai vakarau vata tolutolu ga: ka sai vakarau vata na kena duru ni katuba e na yasana oqo kei na yasana ko ya.

¹¹ A sa vakarauta na kena raraba ni curucuru ni matamata-ni-koro, ka sa tini na kiupiti; kei na kena balavu, sa tini ka tolu na kiupiti.

¹² Ia na kedra macawa na veivalevale sa dui dua na kiupiti e na tabana oqo, ka dui dua na kiupiti e na tabana ko ya; ia na veivalevale sa dui ono na kiupiti e na tabana oqo, ka dui ono na kiupiti e na tabana ko ya.

¹³ Sa qai vakarauta ko koya na matamata-ni-koro, mai na dela ni valevale e dua ki na dela ni kenai sa: na kena raraba sa ruasagavulu ka lima na kiupiti, ka sa dui veidonui na katuba.

¹⁴ A sa cakava ko koya nai yatu duru, ka sa dui onosagavulu na kiupiti, ka yala ki na duru ni lomanibai sa tu volita na matamata-ni-koro.

¹⁵ Ia mai na mata ni matamata-ni-koro mai nai curucuru ka yala ki na mata ni curucuru ni matamata-ni-koro ki loma sa limasagavulu na kiupiti.

¹⁶ A sa dui vakaduba na veivalevale, na tadrua talega ni dui kedra duru e tu voli e loma ni matamata-ni-koro, ka sa dui vaka talega kina na kedrai lolo: ia na kedra katuba lalai sa tu voli eloma; ia sa dui ceuti tu ga ki na duru yadua na balabala.

¹⁷ Sa qai kauti au ko koya ki na lomanibai ki sau, ka raica, sa tu nai yatu vale, kei na raravatu sa caka tu me volita na lomanibai: sa tolusagavulu na vale e dui donuya tu na raravatu.

¹⁸ Ia na raravatu ki taba ni matamata-ni-koro ka balavu vata kei na matamata-ni-koro, sai koya na raravatu e ra.

¹⁹ Sa qai vakarauta ko koya na kena raraba mai na mata ni matamata-ni-koro e ra ka yala ki na mata ni matamata-ni-koro ki sau ni lomanibai eloma, a sa dui dua na drau na kiupiti vaka ki na tu-i-cake, kei na tokalau.

²⁰ Ia sa vakarauta ko koya na kena balavu kei na kena raraba na matamata-ni-koro ni loma ni bai e sau, o koya sa donuya na mata ni tokalau.

²¹ Ia sa tolu na kena veivalevale e na tabana oqo ka tolu e na tabana ko ya; ia na kena duru kei na kenai lolo sai vakarau vata ga kei nai matai ni matamata-ni-koro: ia na kena balavu sa limasagavulu na kiupiti kei na kena raraba sa dui ruasagavulu ka lima na kiupiti.

²² Ia na kedra katuba lalai, kei na kedrai lolo, kei na kedra balabala, sai vakarau vata ga kei na matamata-ni-koro sa qara donu ki na tu-i-cake; ia na kenai kabakaba era sa cabe cake kina sa vitu na kenai vava; ia na kenai lolo sa tu ga e matadra.

²³ Ia na matamata-ni-koro ni lomanibai eloma sa dui donuya na matamata-ni-koro ki na mata ni tokalau, ka vaka ki na tu-i-cake; ka sa vakarauta ko koya mai na matamata-ni-koro e dua ki na matamata-ni-koro kadua, ka sa dua na drau na kiupiti.

²⁴ Sa qai kauti au ko koya vaka ki na mata ni ceva, ka raica, sa dua na matamata-ni-koro sa donuya na mata ni ceva: ka sa vakarauta na kena duru kei na kenai lolo, ka sa vaka nai vakarau ga ko ya

²⁵ A sa caka kina na katuba kei na kenai lolo sa tu voli, me vaka na katuba lalai ko ya: sa limasagavulu na kiupiti na kena balavu, ka sa ruasagavulu ka lima na kena raraba.

²⁶ Ka sa dua kina na kenai kabakaba ka sa vitu na kenai vava, ia na kenai lolo sa tu ki liu: sa vakabalabala talega, e dua vaka, ka dua vaka, e na kena duru.

²⁷ Ka sa dua na matamata-ni-koro e na lomanibai eloma vaka ki na mata ni ceva: ka sa vakarauta ko koya mai na matamata-ni-koro e dua ki na matamata-ni-koro vaka ki na ceva, ka sa dua na drau na kiupiti.

²⁸ A sa kauti au ko koya ki na lomanibai ki loma e na matamata-ni-koro ki na ceva; ka sa vakarauta na matamata-ni-koro ki na ceva, ka sa vaka ga nai vakarau ko ya;

²⁹ kei na kena veivalevale, kei na kena duru, kei na kenai lolo, ka sa vaka ga nai vakarau ko ya; ka sa so na kena katuba kei na kenai lolo sa tu voli: a sa limasagavulu na kiupiti na kena balavu, ka ruasagavulu ka lima na kena raraba.

³⁰ Ia na kenai lolo e tu volita sa dui ruasagavulu ka lima na kena cecere, ka dui lima na kiupiti na kena raraba.

³¹ Ia na kenai lolo sa donuya tu na lomanibai ki sau; ia na balabala sa ceuti tu ga ki na kena duru: ia na kenai kabakaba sa walu na kenai vava.

³² A sa kauti au ko koya ki na lomanibai ki loma vaka ki na tu-i-cake: ka sa vakarauta na kena matamata-ni-koro, ka sa vaka ga nai vakarau ko ya.

³³ Ia na kena veivalevale, kei na kena duru, kei na kenai lolo, sa vaka ga nai vakarau ko ya: ka sa tu kina eso na katuba, kei na kenai lolo e tu voli: ka sa limasagavulu na kiupiti na kena balavu, ka sa ruasagavulu ka lima na kena raraba.

³⁴ Ia na kenai lolo sa donuya tu na lomanibai ki sau; ia na balabala sa ceuti tu ga ki na kena duru, e na tabana oqo kei na tabana ko ya: ka sa walu na kenai vava ki na kenai kabakaba.

³⁵ Ka sa kauti au ko koya ki na matamata-ni-koro ki na mata ni tokalau, ka sa vakarauta ko koya, ka sa vaka nai vakarau ga ko ya;

³⁶ na kena veivalevale, kei na kena duru, kei na kenai lolo, kei na kena duba lalai e tu volita: sa limasagavulu na kiupiti na kena balavu, ka ruasagavulu ka lima na kena raraba.

³⁷ Ia na kena duru sa donuya tu na lomanibai ki sau; ia na balabala sa ceuti tu ga ki na kena duru, ki na tabana oqo, kei na tabana ko ya: ka sa walu na kenai vava e na kenai kabakaba.

³⁸ Ia na kenai yatu vale, kei na kedra katuba sa volekata tu na duru ni matamata-ni-koro, era dauvakasilima kina nai soro kama.

³⁹ Ia e nai curucuru ni matamata-ni-koro sa rua kina na tepeli e na tabana oqo, ka rua na tepeli e na tabana ko ya, me vakamatei kina nai soro kama kei nai soro ni valavala ca kei nai soro ni caka cala.

⁴⁰ Ia e na tabana ki taudaku, e nai kabakaba mai na mata ni matamata-ni-koro sa donuya na tokalau, sa rua kina na tepeli; ia e na tabana talega kadua, mai na mata ni matamata-ni-koro, sa rua kina na tepeli.

⁴¹ Sa va na tepeli ka tu vaka, ka va talega na tepeli ka tu vaka, e na taba ni matamata-ni-koro; e walu na tepeli era vakamatea kina nai soro.

⁴² Ia na tepeli oqo vava, sa cabo kina na kenai soro kama, sa caka e na vatu e ta, ka sa dua na kiupiti ka dua na afa kiupiti na kena balavu, ka vakakina na kena raraba, ka dua na kiupiti na kena cecere: era daukotora talega kina nai yaya era vakamatea kina nai soro kama kei nai soro.

⁴³ A sa so na vata rabailalai sa vakarautaki voli tu ki loma: ia e na dela ni tepeli sa no kina na lewe-ni-manumanu sai soro.

⁴⁴ Ia mai taudaku ni matamata-ni-koro ki loma sa tu kina na nodra i yatu vale na dau-ni-sere, e na lomanibai ki loma, mai na taba ni matamata-ni-koro ki na mata ni tokalau; ka sa donuya tu na mata ni ceva: e dua talega ka tu ki na taba ni matamata-ni-koro ki na tu-i-cake, ka sa donuya na mata ni tokalau.

⁴⁵ A sa kaya vei au ko koya, Nai yatu vale oqo, sa donuya na mata ni ceva, sa nodra na bete, era vakaitavi e na cakacaka ni vale.

⁴⁶ Ai yatu vale talega oqo sa donuya na mata ni tokalau sa nodra na bete, era vakaitavi e na cakacaka ni cabocabo-ni-soro: ko ira oqo na luve i Setoki na luve i Livai, era torovi Jiova me cakacaka vei koya.

⁴⁷ A sa vakarauta ko koya na lomanibai, a sa dua na drau na kiupiti na kena balavu, ka dua na drau na kiupiti na kena raraba, ka sa takiveilevu na veiyasana; kei nai cabocabo-ni-soro e na mata ni vale.

⁴⁸ A sa kauti au ko koya ki nai curucuru ni vale tabu, a sa vakarauta yadua na duru ni curucuru, a sa dui lima na kiupiti na tabana oqo, ka dui lima na kiupiti ki na tabana ko ya: ia na kena raraba ni katuba sa tolu na kiupiti ki na tabana oqo, ka tolu na kiupiti ki na tabana ko ya.

⁴⁹ A kena balavu ni curucuru sa ruasagavulu na kiupiti, kei na kena raraba sa tini ka dua na kiupiti: a sa kauti au cake ko koya ki nai kabakaba era cabe kina: ka sa tu mai na duru lelevu ka volekata na duru wale, e dua vaka, ka dua vaka.