Isikeli 37 - Vakavakadewa Makawa

Ni sa vakaturi cake tale na sui mamaca, me bula, 1-10, sa na vakabulabulataki tale na nodra dinata na Isireli na vosa ni yalayala ni Kalou vei ira, 11-14. Ni sa vakauturi e rua nai titoko me dua vata ga, sa vakatakilai kina ni ra na yaco ko Juta kei Isireli, me matanitu vata tale e na gauna vinaka ni Mesaia, 15-28.

¹ Sa tiko vei au na liga i Jiova, ka sa kauti au yani e na Yalo i Jiova, ka vakatikori au e na loma ni dua na buca sa sinai tu e na sui,

² ka sa vakalakovi au voli kina me'u vakavolivolita: ka raica, sa ka levu sara na sui e na dela ni buca; ka raica, sa ra mamaca sara.

³ Sa qai kaya vei au ko koya, Ko iko na luve ni tamata, sa na bula rawa li na sui oqo? Au a kaya, kemuni na Turaga Jiova, ko ni sa kila ga.

⁴ Sa qai kaya tale vei au, Mo ia na parofisai e na vuku ni sui oqo, ka kaya, Oi kemudou na sui mamaca, dou rogoca na vosa i Jiova.

⁵ Sa kaya vakaoqo na Turaga ko Jiova ki na sui oqo; Raica, au na vakacuruma na cegu vei kemudou, dou na qai bula:

⁶ ia ka'u na solia vei kemudou na ua, ka vakatubura cake na lewemudou, ka ubi kemudou e na kulimudou, ka vakacuruma vei kemudou na cegu, dou na qai bula; ia dou na kila ni sai au ko Jiova.

⁷ Au a qai ia na parofisai me vaka sa vakaroti vei au: ia ni'u sa ia tiko na parofisai, sa dua mai na rorogo, ka raica, sa yavavala mai, ka ra sa dui veitorovi na sui ki na kenai sa.

⁸ Ia ni'u a vakaraica tiko, raica, sa tubu cake mai na kena ua kei na lewena, ka sa vakasulumi taucoko e na kulina: ia sa sega na cegu vei ira.

⁹ Sa qai kaya vei au ko koya, Mo ia na parofisai ki na cagi, mo ia na parofisai, ko iko na luve ni tamata, ka kaya ki na cagi, Sa kaya vakaoqo na Turaga ko Jiova; Mai na mata ni cagi vava mo lako maikina, na cegu, ka ceguvi ira na moku oqo, me ra bula mada.

¹⁰ Au a qai ia na parofisai me vaka sa vakaroti vei au, ka sa qai curumi ira na cegu, ka ra sa bula, ka tu cake mai e na yavadra, e dua nai valu levu sara.

¹¹ Sa qai kaya vei au ko koya, Ko iko na luve ni tamata, na suidra oqo sai koya na mataqali kecega i Isireli: raica, era sa kaya, Sa mamaca na suida, ka sa yali na ka eda a nuinui kina: eda sa drutimudulaki koi keda.

¹² O koya oqo mo ia kina na parofisai, ka kaya vei ira, Sa kaya vakaoqo na Turaga ko Jiova; Raica, au na kilica na nomudou i bulubulu, ka kauti kemudou cake na noqu tamata mai na nomudou i bulubulu, ka kauti kemudou ki na vanua ko Isireli.

¹³ Ia dou na kila ni sai au ko Jiova, ni'u sa kilica na nomudou i bulubulu, ka kauti kemudou cake mai na nomudou i bulubulu, koi kemudou na noqu tamata,

¹⁴ ka ni'u sa solia talega na Yaloqu vei kemudou, ka dou sa bula, ni'u sa vakatikori kemudou talega ki na nomudou vanua: dou na qai kila ni sai au ko Jiova ka'u sa tukuna, ka'u sa cakava talega, sa kaya ko Jiova.

¹⁵ Sa yaco tale vei au na vosa i Jiova, ka vaka,

¹⁶ Ko iko, na luve ni tamata, mo taura e dua nai titoko, ka vola kina, A nodra ko Juta, ka nodra talega na Isireli era nonai tokani: mo qai taura e dua tale nai titoko, ka vola kina, A nei Josefa, na nodra i titoko ko Ifireimi, kei ira kece na mataqali i Isireli era nonai tokani:

¹⁷ ia mo veiuturitaka mei titoko e dua bau ga; ena yaco kina me dua vata ga e na ligamu.

¹⁸ Ia ni ra sa vosa vei iko ko ira na luve ni kai nomu, ka kaya, O na sega li ni vakatakila vei keitou se cava ko nakita e na ka oqori?

¹⁹ mo qai kaya vei ira, Sa kaya vakaoqo na Turaga ko Jiova; Raica, au na taura nai titoko i Josefa, o koya ka tu e na liga i Ifireimi, kei na veimataqali i Isireli era nonai tokani, ka vakauturi ira vata kaya, io kei nai titoko i Juta, ka cakavi ira me rai titoko e dua vata ga, ka ra na yaco me ra dua bau ga e na ligaqu.

²⁰ Ia nai titoko ko sa volavola kina, ena tu ga e na ligamu e matadra.

²¹ Ia mo qai kaya vei ira, Sa kaya vakaoqo na Turaga ko Jiova; Raica, au na kauti ira na Isireli maivei ira na veimatanitu tani, era sa dui yaco yani kina, ka vakasoqoni ira mai na veiyasana, ka kauti ira ki na nodra vanua:

²² ka qisi ira me ra dua bau ga na matanitu e na vanua, e na veiulu-ni-vanua i Isireli; ia ena dua bauga na tui vei ira kecega: ka ra na sega tale ni rua na matanitu, io era na sega sara ni wase tale me rua na matanitu:

²³ ka ra na sega ni vakadukadukalitaki ira tale e na nodra matakau, se na nodra ka vakasisila, se dua na nodra talaidredre: ia ka'u na vakabulai ira mai na nodra i tikotiko kece, era sai valavala ca kina, ka vakasavasavataki ira: ka ra na vakabau me ra noqu tamata, ia koi au talega ka'u na yaco me'u nodra Kalou.

²⁴ Ia ko Tevita na noqu tamata, ena sa nodra tui ko koya; io ena dua bau ga nai vakatawa vei ira kecega: ka ra na muria talega na noqu lewa, era na vakabauta na noqu vunau ka cakava.

²⁵ A ra na tiko ga e na vanua ka'u a solia vua na noqu tamata ko Jekope, na vanua era sa tiko kina ko ira na nomudou qase; ka ra na tiko kina ko ira, kei ira na luvedra, kei na makubudra ka sega ni mudu: ia ko Tevita na noqu tamata, ena nodra turaga ko koya ka sega ni mudu.

²⁶ Ia ka'u na cakava na veiyalayalati ni veivinakati kei ira; sa na veiyalayalati ka sega ni mudu: au na vakataukeni ira talega, ka vakalewevuqataki ira, ka solia na noqu vale tabu me tu ga e na kedra maliwa ka sega ni mudu.

²⁷ Ena tu vata talega kei ira na noqu vale: io ka'u na yaco me'u nodra Kalou, ko ira talega era na vakabau me ra noqu tamata.

²⁸ Ka ra na kila na veimatanitu ni sai au ko Jiova ka vakatabui ira na Isireli, ka ni sa tu ga na noqu vale tabu e na kedra maliwa ka sega ni mudu.