Isikeli 36 - Vakavakadewa Makawa

Sa vakacegui na vanua vaka-Isireli, ni ra sa cudruvi na lewe ni veivanua, sa vakacacani ira, 1-7, e na vuku talega ni vosa ni yalayala ni Kalou, 8-15. Sa ra biu na Isireli e na vuku ni nodra i valavala ca, 16-21, sa ra na kau tale mai, ka vakayalosavasavataki, ka tiko vinaka, e na vuku ni loloma ni Kalou, kei na lewa vinaka ni Mesaia, 22-38.

¹ Ia ko iko, na luve ni tamata, mo ia tale na parofisai ki na veiulu-ni-vanua ni Isireli, ka kaya, Na veiulu-ni-vanua ni Isireli, dou rogoca na vosa i Jiova:

² Sa kaya vakaoqo na Turaga ko Jiova; Ni sa kaya vei kemudou ko ira na meca, Ue, na vanua cecere makawa talega sa qai noda me da taukena:

³ o koya oqo mo parofisai kina, ka vaka ne, Sa kaya vakaoqo na Turaga ko Jiova; Ni ra sa vakacacani kemudou, ka tilomi kemudou e na veiyasana, mo dou nodra vanua na veimatanitu sa vo, ni dou sa cavuti tiko e na gusudra na dauvosa, ka vakarogocataki vei ira na tamata:

⁴ o koya oqo, koi kemudou na veiulu-ni-vanua ni Isireli, dou rogoca kina na vosa ni Turaga ko Jiova; Sa kaya vakaoqo na Turaga ko Jiova ki na ulu-ni-vanua, kei na ulu-ni-koro, ki na uciwai, kei na veibuca, ki na veitikina lala kei na veikoro sa biu, oqori ka vakacacani, ka sa ka ni veivakalialiai vei ira na kena vo ni veimatanitu sa tiko vakavolivoliti kemudou;

⁵ o koya oqo sa kaya kina na Turaga ko Jiova; E na noqu vuvu katakata ka'u sa vosataka vakaidina kina na ca vei ira na kena vo ni veimatanitu, kei Itomi kecega, era sa vota na noqu vanua me nodra ni ra reki e na vu ni yalodra, ka beca e na vu ni lomadra, me biuta ga me vakacacani.

⁶ O koya oqo, mo parofisaitaka kina na vanua ni Isireli, ka kaya ki na ulu-ni-vanua, kei na ulu-ni-koro, kei na uciwai, kei na veibuca, Sa kaya vakaoqo na Turaga ko Jiova; Raica, koi au, ni'u a vuvu ka cudru, ka'u a vosa kina, ni dou sa vakamaduataki vei ira na veimatanitu:

⁷ o koya oqo sa kaya kina na Turaga ko Jiova, Au sa dulaka na ligaqu, Sa dina ko ira na veimatanitu era sa tiko vakavolivoliti kemudou era na vakamaduataki sara.

⁸ Ia koi kemudou, na veiulu-ni-vanua ni Isireli, dou na tubura na nomudou taba ni kau, ka dou na vuataka na nomudou vua ni kau vei ira na noqu tamata na Isireli; ni ra sa voleka ni lako mai.

⁹ Raica, sai au ka totaki kemudou, ia ka'u na lesu tale vei kemudou, ka dou na wereci ka kaburaki kina:

¹⁰ ia ka'u na vakalewevuqataka na nomudou lewe ni vanua, era mataqali kece sara ga ni Isireli: ena tawa talega na veikoro, ka vakavale na veitikina lala:

¹¹ ia ka'u na vakalevutaka vei kemudou na tamata kei na manumanu; ka ra na tubu ka luvea: ka'u na vakaitaukeitaki kemudou tale me vaka na nomudou tiko eliu, ka kitaka na ka mo vinaka cake kina ka ca na nomudou tiko eliu: ia dou na kila ni sai au ko Jiova.

¹² Io, ka'u na lewa na tamata me ra lakovi kemudou tikoga, io na noqu tamata na Isireli; ka ra na taukeni iko, ia ko na nodra vanua, ka ko na sega tale ni vakaluveniyalitaki ira.

¹³ Sa kaya vakaoqo na Turaga ko Jiova; Ni ra sa kaya vei iko, Ko iko na vanua sa daukania na nomu tamata, ka sa dauvakaluveniyalitaka na nomu veimatanitu;

¹⁴ ia ko na sega tale ni kania na nomu tamata, se vakaluveniyalitaka na nomu veimatanitu, sa kaya na Turaga ko Jiova.

¹⁵ Au na sega talega ni vakarogoya tale vei iko na kedrai rogorogo ca na veimatanitu, ko na sega ni bitaki tale e na nodra veivakalialiai na veimataqali ko na sega tale ni vakabalea na nomu veimatanitu, sa kaya na Turaga ko Jiova.

¹⁶ Ka sa yaco tale vei au na vosa i Jiova, ka vaka,

¹⁷ Ko iko na luve ni tamata, ni ra a tiko e na nodra vanua ko ira na matanitu ni Isireli, era sa vakadukadukalitaka e na nodra i tovo kei na nodra i valavala: na nodra i valavala e mataqu sa vaka na nona tawa savasava na yalewa sa tawase.

¹⁸ Ia ka'u a sovaraka kina na noqu cudru vei ira e na vuku ni dra era sa vakadavea e na vanua, e na vuku talega ni nodra matakau era sa vakadukadukalitaka na vanua:

¹⁹ ia ka'u a dui vakasevi ira kina na veimatanitu tani, ka ra sa duibiubiu ki na veivanua: io ka'u a lewai ira me vaka na nodra i valavala kei na nodra cakacaka.

²⁰ Ia ni ra dui yaco ki na veimatanitu tani, era dui lakova, era sa vakacacana na yacaqu tabu, ni sa kainaki e na vukudra, Ko ira oqo na tamata i Jiova, ia era sa lako tani mai na nona vanua.

²¹ Ia ka'u a vosota ga e na vuku ni yacaqu tabu, o koya era sa vakacacana ko ira na mataqali i Isireli e na veimatanitu tani, era dui yaco yani kina.

²² O koya oqo mo kaya kina ki na mataqali i Isireli, Sa kaya vakaoqo na Turaga ko Jiova; Sa segai e na vukumudou, na mataqali i Isireli, ka'u sa cakava kina na ka oqo, au cakava ga e na vuku ni yacaqu tabu, o koya dou sa vakacacana e na veimatanitu tani, dou sa dui yaco kina.

²³ Ia ka'u na vakatabuya na yacaqu levu, o koya ka vakacacani e na veimatanitu tani, o koya dou a vakacacana e na kedra maliwa; ka ra na kila na veimatanitu ni sai au ko Jiova, sa kaya na Turaga ko Jiova, ni'u sa vakatabui vei kemudou e matadra.

²⁴ Ni'u na kauti kemudou mai na veimatanitu tani, ka vakasoqoni kemudou mai na veivanua kecega, ka kauti kemudou ki na nomudou vanua.

²⁵ Au na qai kuretaka vei kemudou na wai makare, dou na qai savasava: ka'u na vakasavasavataki kemudou mai na nomudou dukadukali kecega, kei na nomudou matakau kecega.

²⁶ Au na solia talega vei kemudou na yalo vou, io ka'u na vakacuruma ki na lomamudou na yalo vou: au na kauta tani talega maivei kemudou na yalo vatu ka solia vei kemudou na yalo vakalewe.

²⁷ Ka'u na vakacuruma ki na lomamudou na yaloqu, ka vagolei kemudou mo dou muria na noqu vunau, ia dou na vakabauta na noqu lewa ka cakava.

²⁸ Dou na tikotiko talega e na vanua ka'u a solia vei ira na nomudou qase; ia dou na vakabauti mo dou noqu tamata, koi au talega ka'u na yaco me'u nomudou Kalou.

²⁹ Ia ka'u na vakabulai kemudou mai na nomudou dukadukali kecega: ka'u na kaciva na sila, ka vakalevutaka, ka sega ni vakayacora tale vei kemudou na dausiga.

³⁰ Au na vakalevutaka talega na vua ni kau dauvua, kei na lewe ni were, mo dou kakua tale ni vakarogocataki e na veimatanitu e na vuku ni dausiga.

³¹ Dou na qai vakananuma na nomudou i valavala ca, kei na nomudou cakacaka sa sega ni vinaka, ia dou na vakasisilataki kemudou vakataki kemudou e na vuku ni nomudou caka ca kei na nomudou i valavala vakasisila.

³² Dou kila mada, ni ka'u sa sega ni cakava na ka oqo e na vukumudou, sa kaya na Turaga ko Jiova: dou madua ka taqaya e na vuku ni nomudou i valavala, koi kemudou na mataqali i Isireli.

³³ Sa kaya vakaoqo na Turaga ko Jiova; E na siga ka'u sa vakasavasavataki kemudou kina mai na nomudou i valavala ca kecega, ka'u na qai vakaitaukeitaki kemudou e na veikoro, ka na tara tale na koro e na veitikina lala.

³⁴ Ia na vanua sa lala ena wereci tale, ia eliu sa lala sara ga e matadra kece era sa lako voli kina.

³⁵ Era na qai kaya, A vanua oqo ka lala sa qai yaco me vaka na were ko Iteni; ia na veikoro sa lekutu ka lala ka rusa sa qai viribaiti, ka sa tawa tale.

³⁶ A ra na kila na kena vo ni veimatanitu sa tiko vakavolivoliti kemudou ni sai au ko Jiova ka'u sa tara na koro ka rusa, ka tea tale na vanua ka lala: koi au ko Jiova ka'u sa kaya, ka'u na cakava talega.

³⁷ Sa kaya vakaoqo na Turaga ko Jiova; Ia me ra masuti au ko ira na mataqali i Isireli, me'u cakava vei ira na ka oqo; au na vakalewevuqataki ira na tamata me ra dua nai soqosoqo levu;

³⁸ me vaka na qele ni sipi tabu, me vaka na qele ni sipi mai Jerusalemi e na kena so levu tabu; ena tawa vakakina na veikoro lala e nai soqosoqo levu ni tamata: ka ra na kila ni sai au ko Jiova.