Isikeli 35 - Vakavakadewa Makawa

Sa cudruvi ko Sia, na nodra vanua na kawa i Itomi, e na vuku ni nodra cati ira na Isireli, 1-15.

¹ A sa yaco vei au na vosa i Jiova, ka vaka,

² Ko iko na luve ni tamata, mo vaqara na matamu ki na ulu-ni-vanua ko Sia, ka parofisaitaka na ka ca sa na yaco kina,

³ ka kaya kina, Sa kaya vakaoqo na Turaga ko Jiova; Raica, ko iko na ulu-ni-vanua ko Sia, koi au na nomu meca, ia ka'u na dodoka yani na ligaqu me tarai iko, ka'u na vakalalataki iko sara.

⁴ Ka'u na vakacacana na nomu veikoro, ia ko iko, ko na rusa sara, ia ko na qai kila ni sai au ko Jiova.

⁵ Ni ko sa yaloca tikoga, ka sa soli ira na Isireli ki na kaukauwa ni seleiwau e na gauna ni nodra rarawa, e na gauna ka tini kina na nodra i valavala ca.

⁶ O koya oqo, sa kaya kina na Turaga ko Jiova, me vaka na dina ni noqu bula, au na vakarautaki iko vakaidina ki na vakadave dra, ia na vakadave dra ena vakasavi iko: ni ko a sega ni cata na dra, ena vakasavi iko na vakadave dra.

⁷ Ia ka'u na vakalalataka sara na ulu-ni-vanua ko Sia, ka muduki koya tani kina sa lako voli yani kei koya talega sa lako tale mai.

⁸ Ia ka'u na robota na kena veiulu-ni-vanua e na nona tamata sa vuetaki kina: e na nomu veiulu-ni-koro, kei na nomu veibuca, kei na nomu uciwai kecega, era na bale kina era vuetaki e nai seleiwau.

⁹ Au na vakalalataki iko mo vanua lala ka sega ni mudu, ia na nomu veikoro ena sega ni tawa tale: ia dou na kila ni sai au ko Jiova.

¹⁰ Ni ko a kaya, A matanitu ruarua oqo kei na vanua ruarua oqo ena noqu ga, ia keimami na taukena; ia ka sa tiko kina ko Jiova:

¹¹ o koya oqo, me vaka na dina ni noqu bula, sa kaya kina na Turaga ko Jiova, Au na kitaka talega me vaka na nomu cudru, ka vaka na nomu vuvu ko sa muria ni ko cati ira; ia ka'u na kilai vei ira, ni'u sa qai lewai iko.

¹² Ia ko na kila ni sai au ko Jiova, ka'u sa rogoca kecega na nomu vosa ca ko sa vosavakacacataka kina na veiulu-ni-vanua ni Isireli, ka kaya, Sa vakalalataki, sa soli vei keda me da kania.

¹³ Ia dou a bolei au vakaoqo e na gusumudou, ka sa vakalevutaka na nomudou vosa ca vei au: koi au ka'u sa rogoca.

¹⁴ Sa kaya vakaoqo na Turaga ko Jiova; Ni sa qai reki ko vuravura taucoko, ka'u na vakacacani iko sara.

¹⁵ Me vaka ni ko a marautaka na nodra vanua na mataqali i Isireli, ni sa lala, ka'u na kitaka vakakina vei iko: ko na vakalalataki sara, ko iko na ulu-ni-vanua ko Sia, io ko Itomi kecekece sara ga: ka ra na kila ni sai au ko Jiova.