Isikeli 34 - Vakavakadewa Makawa

Sa vunauci ko ira nai vakatawa ca, 1-6. Sa cudruvi ira na Kalou, 7-10. A nona vakaraici ira vinaka na nona sipi, 11-19. A nona matanitu na Mesaia, 20-31.

¹ Sa yaco vei au na vosa i Jiova, ka vaka,

² Ko iko na luve ni tamata, mo parofisaitaka na ca vei ira na nodra i vakatawa na Isireli, mo ia na parofisai, ka kaya vei ira, Sa kaya vakaoqo na Turaga ko Jiova vei ira nai vakatawa; Ena ca ko ira na nodra i vakatawa na Isireli era sa vakani ira ga vakataki ira! sa sega li ni dodonu me ra vakania na qele ni sipi ko ira nai vakatawa?

³ Dou sa kania na uro, kei na vutika ni sipi dou sa vakasulumi kemudou kina, dou sa vakamatea na sipi sa vakani: ia dou sa sega ni vakania na qele ni sipi.

⁴ Dou sa sega ni vakaukauwataka na sipi sa malumalumu, ka dou sa sega ni vakabula na ka sa tauvi mate, ka dou sa sega ni vauca na ka sa ramusu, ka dou sa sega ni vakauta tale mai na ka sa vakasevi, ka dou sa sega ni vakasaqara na ka sa yali; ia dou sa lewa vei ira vakayalokaukauwa, ka vakalomaqa.

⁵ A ra sa dui vakasevi tani, e na vuku ni sa sega nai vakatawa: ka sa kani ira na manumanu kecega ni vanua, ni ra vakasevi tani.

⁶ Era sa lako sese voli na noqu sipi ki na veiulu-ni-vanua kecega, kei na dela-ni-koro kecega: io, era sa dui veiseyaki na noqu qele ni sipi, e dela i vuravura taucoko, ka sa sega e dua sa taroga se vakasaqarai ira.

⁷ O koya oqo, koi kemudou nai vakatawa, dou rogoca kina na vosa i Jiova;

⁸ Me vaka na dina ni noqu bula, sa kaya na Turaga ko Jiova, ni sa tokitaki na noqu qele ni sipi, ka sa yaco me kedra kakana na manumanu kecega ni vanua, ni sa sega e dua nai vakatawa, ni ra sa sega ni vakasaqara na noqu sipi ko ira na noqu i vakatawa, ka ra sa vakani ira vakataki ira ga nai vakatawa, ia era sa sega ni vakania na noqu sipi;

⁹ o koya oqo, koi kemudou nai vakatawa, dou rogoca kina na vosa i Jiova;

¹⁰ sa kaya vakaoqo na Turaga ko Jiova; Raica, koi au sa qai veimecaki kei ira nai vakatawa, ia ka'u na taroga na noqu sipi vei ira, ka muduki ira me ra kakua ni vakania tiko na sipi; me ra kakua talega ni vakani ira tiko vakataki ira nai vakatawa; ni'u na kaliraka na noqu qele ni sipi mai na gusudra, me kakua ni kedra kakana.

¹¹ Ni sa kaya vakaoqo na Turaga ko Jiova; Raica, koi au, io koi au, ka'u na taroga na noqu sipi, ka vakasaqarai ira.

¹² Me vaka sa vakasaqara na nona qele ni sipi nai vakatawa e na siga sa tiko kina e na kedra maliwa na nona sipi sa veiseyaki; au na vakasaqara vakakina na noqu qele ni sipi, ka kaliraki ira mai na veiyasana kecega era sa dui veiseyaki kina e na siga loaloa ka butobuto.

¹³ Ia ka'u na kauti ira tani maivei ira na veimataqali, ka vakasoqoni ira mai na veivanua, ka kauti ira ki na nodra vanua, ka vakani ira e na veiulu-ni-vanua i Isireli e na bati ni uciwai, kei nai tikotiko kece ni vanua.

¹⁴ Ka'u na vakani ira e na vanua veico vinaka, e na veiulu-ni-vanua cecere talega i Isireli ena tu kina na kedra bai: era na davo no maikea e na lomanibai vinaka, ia era na kana voli e na vanua veico bulabula e na dela ni veiulu-ni-vanua ni Isireli.

¹⁵ Oi au, ka'u na vakania na noqu qele ni sipi, io koi au, ka'u na vakadavori ira tiko, sa kaya na Turaga ko Jiova.

¹⁶ Ka'u na vakasaqara oqori sa yali, ka vakauta tale mai oqori sa vakasevi, ka'u na vauca oqori sa ramusu, ka'u na vakaukauwataka oqori sa malumalumu: ia ka'u na vakarusa oqori sa dro ka kaukauwa; ka'u na vakani ira e na cudru.

¹⁷ Ia koi kemudou, na noqu qele ni sipi, sa kaya na Turaga ko Jiova; Raica, au na veilewayaka na sipi eso kei na sipi eso, kei na sipi tagane kei na me tagane.

¹⁸ E ka lailai beka vei kemudou ni dou sa kania oti na veico vinaka, ia na vo ni nomudou vanua veico dou sa buturaka li e na yavamudou? ka gunuva talega na kena wai makare, ia mo dou sa vuvuta li na kena vo e na yavamudou?

¹⁹ Ia na noqu qele ni sipi, era sa kania na ka dou sa butuka e na yavamudou; kei na ka dou sa vuvuta e na yavamudou, era sa gunuva.

²⁰ O koya oqo sa kaya kina na Turaga ko Jiova vei ira; Raica, koi au, io koi au, ka'u na veilewayaka na sipi uro kei na sipi suivotu.

²¹ Ka ni dou sa ia na veibiliyaki e na sarisarimudou, kei na tabamudou, ka culai ira kece era tauvi mate e na nomudou i leu, ka dou sa dui vakasevi ira mada kina;

²² o koya oqo ka'u na vakabulai ira kina na noqu qele ni sipi, ka ra na sega ni tokitaki tale; ia ka'u na dui veilewayaka na sipi eso kei na sipi eso.

²³ Ia ka'u na lesia e dua me nodra i vakatawa, ia ena vakani ira ko koya, io, na noqu tamata ko Tevita; ena vakani ira ko koya, ena lesi talega ko koya me nodra i vakatawa.

²⁴ Ia koi au ko Jiova ka'u na yaco me'u nodra Kalou, ka sa na nodra Turaga na noqu tamata ko Tevita; koi au ko Jiova ka'u sa cavuta.

²⁵ Ia ka'u na ia vata kei ira e dua na veiyalayalati ni veivinakati, ka vakaotia tani na manumanu ca e na vanua: ka ra na tiko vinaka mai na veico, ka moce e na veikau.

²⁶ Ia ka'u na cakavi ira kei na veiyasana sa tiko volita na noqu ulu-ni-koro me ka ni veivakalougatataki; au na vakatauca talega na uca e na kena gauna; ena tau mai na uca ni veivakalougatataki.

²⁷ Na kau talega ni vanua ena vuataka na vuana, ia ko vuravura ena vuataka na kena vuata, ka ra na tiko vinaka e na nodra vanua, ka ra na kila ni sai au ko Jiova, ni'u sa cavuka nai vau ni kedrai vua, ka kaliraki ira mai na ligadra era a vakabobulataki ira.

²⁸ Ka ra na sega ni yaco tale me nodra i toki ni valu na veimatanitu, a manumanu talega ni vanua ena sega ni kani ira; era na tiko vinaka ga, ka na sega e dua me vakarerei ira.

²⁹ Ia ka'u na vakatubura e dua na nodra coke sa na rogo, ka ra na sega ni takali tani tale e na vuku ni sa dausiga na vanua, se vakamaduataki tale vei ira na veimatanitu.

³⁰ Ka ra na kila kina ni sai au ko Jiova na nodra Kalou ka'u sa tiko vata kei ira, ka ni ra sa noqu talega ko ira na mataqali i Isireli, sa kaya na Turaga ko Jiova.

³¹ Ia koi kemudou na noqu qele ni sipi, na sipi ni noqu vanua veico, dou sa tamata ga, ia koi au, au sa nomudou Kalou, sa kaya na Turaga ko Jiova.