Isikeli 33 - Vakavakadewa Makawa

A nona cakacaka dodonu nai vakatawa, 1-6. Sa vakavulici kina ko Isikeli me muria, 7-9. Sa vakatakila na Kalou ni sa dodonu na nonai valavala vei ira era veivutuni, vei ira talega era talaidredre, 10-16. Sa vakadinadina ko koya ni sa dodonu ga na nona lewa, 17-20. Ni sa rogorogo mai vei Isikeli ni sa kabai ko Jerusalemi, sa parofisaitaka na vanua ni na lala ga, 21-29. A nodra cudruvi na tamata era sa vakalialiai ira na parofita, 30-33.

¹ Sa yaco tale vei au na vosa i Jiova, ka vaka,

² Ko iko na luve ni tamata, mo vosa vei ira na luvedra na nomu tamata, ka kaya vei ira, Ni'u sa vakayacora nai seleiwau ki na dua na vanua, ke ra kauta ko ira na lewe ni vanua e dua na nodra tamata, ka lesi koya me nodra i vakatawa:

³ ke sa raica ko koya nai seleiwau ni sa lako tiko mai ki na vanua, ka sa uvuca na davui, ka vakasalataki ira na tamata;

⁴ ke sa rogoca dina e dua na tamata na domo ni davui, ka sega ni vakabauta; ka sa yaco mai nai seleiwau, ka sa mate kina ko koya, sa na baleti koya duaduaga na nona mate.

⁵ Sa rogoca ko koya na domo ni davui, ka sa sega ni vakabauta; na nona mate sa baleti koya. Ia ko koya sa vakabauta sa na vakabula na yalona.

⁶ Ia kevaka sa raica ko koya nai vakatawa ni sa lako tiko mai nai seleiwau, ka sa sega ni uvuca na davui, ka ra sa sega ni vakasalataki na tamata; kevaka sa yaco mai nai seleiwau, ka sa mate kina e dua vei ira na tamata, sa mate yani ko koya e na nonai valavala ca; ia na nona mate ka'u na taroga vua nai vakatawa.

⁷ Ia ko iko, na luve ni tamata, ka'u sa lesi iko mo nodra i vakatawa na mataqali i Isireli; o koya oqo mo rogoca kina na vosa sa tau mai na gusuqu, ka mo vakasalataki ira maivei au.

⁸ Ni'u sa kaya vua na tamata ca, Ko iko na tamata ca, ko na mate vakaidina; kevaka ko sa sega ni vosa vua na tamata ca mo vakasalataki koya me lesu tani mai na nonai tovo ca, sa na mate ga na tamata ca ko ya e na nonai valavala ca; ia na nona mate ka'u na taroga vei iko.

⁹ Ia ko iko, kevaka ko sa vakasalataka na tamata ca e na vuku ni nonai tovo ca me sa biuta sara: ke sega ni biuta ko koya na nonai tovo, ena mate ga ko koya e na nonai tovo ca; ia ko iko, ko sa vakabula na yalomu.

¹⁰ Ia ko iko, na luve ni tamata, mo kaya vei ira na mataqali i Isireli; Dou sa dauvosa vakaoqo, ka vaka, Ia na noda talaidredre kei na nodai valavala ca, sa saumi vei keda, ka da sa uru sobu kina, ia eda na qai bula tale vakaevei koi keda?

¹¹ Mo kaya vei ira, Me vaka na dina ni noqu bula, sa kaya na Turaga ko Jiova, au sa sega ni vinakata me mate na tamata ca; au vinakata ga me lesu mai na tamata ca mai na nonai tovo, ka me bula: dou lesu mai, dou lesu mai mai na nomudou i tovo ca; e na vuku ni cava dou sa via mate kina, koi kemudou na mataqali i Isireli?

¹² O koya oqo, ko iko na luve ni tamata, mo kaya vei ira na luvedra na kai nomu, A nonai valavala dodonu na yalododonu ena sega ni vakabulai koya e na siga sa talaidredre kina ko koya: ia na nona ca na tamata ca, ena sega ni mate kina ko koya e na siga sa lesu kina mai na nona ca; ko koya talega sa yalododonu ena sega ni bula rawa kina e na siga sai valavala ca kina ko koya.

¹³ Ni'u sa kaya vua na tamata yalododonu, ni na bula vakaidina ko koya; ke sa vakararavi ko koya ki na nonai valavala dodonu, ka sai valavala ca, ena sega ni nanumi na nonai valavala dodonu kecega: ia e na vuku ni nonai valavala ca sa cakava, ena mate kina ko koya.

¹⁴ Ia, ni'u sa kaya vua na tamata ca, Ko na mate vakaidina; ke sa lesu mai ko koya mai na nonai valavala ca, ka cakava na ka dodonu ka vinaka;

¹⁵ ke sa vakasuka na tamata ca na kenai vakadinadina, ka vakasuka talega na ka sa butakoca, ka sa muria na vunau ni bula, ka sega ni cakava na ka ca; ena bula vakaidina ko koya, ena sega ni mate.

¹⁶ Ena sega e dua na nonai valavala ca sa kitaka oti me na beitaki vua: sa qai cakava na ka dodonu ka vinaka; ena bula vakaidina ko koya.

¹⁷ Ia era kaya ko ira na luve ni kai nomu, Sa sega ni dodonu nai valavala ni Turaga: ia ko ira ga, sa sega ni dodonu na nodra i valavala.

¹⁸ Ni sa lesu tani na yalododonu mai na nonai valavala dodonu, ka sa cakava na ka ca, ena mate kina ko koya.

¹⁹ Ia ni sa lesu na tamata ca mai na nona ca, ka cakava na ka sa dodonu ka vinaka, ena bula kina ko koya.

²⁰ Ia dou sa kaya tiko, Sa sega ni dodonu nai valavala ni Turaga. Oi kemudou na mataqali i Isireli, au na dui lewai kemudou yadua me vaka na nomudou i valavala.

²¹ Ia e nai tinikarua ni yabaki ni neimami tiko vakabobula, e nai katini ni vula, e nai kalima ni siga ni vula, sa qai lako mai vei au e dua sa dro mai Jerusalemi, ka sa kaya, Sa samu na koro.

²² Ia na liga i Jiova sa tu vei au e na yakavi, ni sa bera ni tadu mai ko koya sa dro mai, ka sa dalaga na gusuqu, ka sa bera ni lako mai vei au ko koya e na mataka; ia sa dalaga na gusuqu, ka'u sa qai sega ni galu tiko.

²³ Sa qai yaco vei au na vosa i Jiova, ka vaka,

²⁴ Ko iko na luve ni tamata, o ira sa vakatawa na veitikina lala e na vanua ko Isireli era sa vosa, ka kaya, Sa lewe dua ga ko Eparaama, ni sa taukena na vanua: ia koi keda, eda sa lewe vuqa; ia sa soli ga vei keda na vanua me da taukena.

²⁵ O koya oqo mo kaya kina vei ira, Sa kaya vakaoqo na Turaga ko Jiova; dou sa kania na dra mei coi ni kemudou, dou sa ta cake talega ki na nomudou matakau, ka ia talega na veivakamatei: ia mo dou taukena li na vanua?

²⁶ Dou sa ravita tu na nomudou i seleiwau, dou sa cakava na ka vakasisila, dou sa dui vakacacana na watina na kai nona: ia mo dou taukena li na vanua?

²⁷ Mo vosa vakaoqo vei ira, Sa kaya vakaoqo na Turaga ko Jiova, Me vaka na dina ni noqu bula, ko ira era vakatawa na veitikina lala era na mate ga e nai seleiwau, ia ko koya talega mai nai bili ka'u na soli koya ki na manumanu me ra kania, ko ira talega mai na uluvatu kei na qara-vatu era na mate e na mate dauveiveitauvi.

²⁸ Ni'u na vakalalataka sara na vanua, ena mudu talega na nona kaukauwa sa viavialevu; ena lala talega na veiulu-ni-vanua i Isireli, me sega e dua na tamata me lakova.

²⁹ Era na qai kila ni sai au ko Jiova, ni'u sa vakalalataka sara na vanua e na vuku ni nodra i valavala vakasisila kecega era sa cakava.

³⁰ Ko iko talega, na luve ni tamata, ko ira na luvedra na kai nomu era sa veivosakitaki iko tikoga mai na lalaga ni veivale kei na kena katuba talega, ka ra sa dui veivosaki vakataki ira na veiwekani, ka kaya, Tou mai rogoca mada, se vosa cava sa yaco maivei Jiova.

³¹ Ka ra sa lako mai vei iko me vaka ni ra curu mai ko ira na tamata, ka ra sa mai tiko e matamu me vakataki ira na noqu tamata, ka ra rogoca na nomu vosa, ka ra sa sega ni cakava: ni sa tiko e na gusudra na vosa vakayalololoma, ia na lomadra sa muria na nodra daukocokoco ga.

³² Ka raica, ko sa tautauvata vei ira kei na nona meke ni veilomani e dua sa domo vinaka, ka sa qiria vakavinaka nai qiriqiri: ni ra sa rogoca na nomu vosa, ka sega ni cakava.

³³ Ia ni sa qai yaco na ka oqo, (raica, ena yaco ga,) era na qai kila ni ka tiko e na kedra maliwa e dua na parofita.