Isikeli 30 - Vakavakadewa Makawa

Ena vakalalataki ko Ijipita kei na veivanua sa totaka, 1-19. Ena vakaukauwataki ko Papiloni me musuka na kaukauwa ni Ijipita, 20-26.

¹ Sa yaco tale vei au na vosa i Jiova, ka vaka,

² Ko iko na luve ni tamata, mo ia na parofisai, ka kaya, Sa kaya vakaoqo na Turaga ko Jiova; Dou qoqolou, Ulei na siga ko ya!

³ Ni sa voleka mai na siga, io, sa voleka mai na siga i Jiova, na siga loaloa; ena kedra gauna na veimatanitu.

⁴ Ia ena tau ki Ijipita nai seleiwau, kei na rarawa levu ena tauvi Iciopea, ni ra qai bale na moku mai Ijipita, ni ra kauti ira tani talega na kena lewe vuqa ka sa talaraki sobu na kena yavu.

⁵ Ko Iciopea, kei Futi, kei Lipea, kei ira kece era dui kaikai, kei Kupi, kei ira na nodra i to na lewe ni vanua, era na qai bale vata kei ira e nai seleiwau.

⁶ Sa kaya vakaoqo ko Jiova; Era na bale talega ko ira era totaki Ijipita; ia ena yali sobu na nona kaukauwa sa viavialevu kina: mai Mikitoli ka yala ki Saiini era na bale maikina e nai seleiwau, sa kaya na Turaga ko Jiova.

⁷ Ena qai lala tu oqori e na maliwa ni veivanua lala, a nona veikoro talega ena qai tu vata kei na veikoro sa rusa.

⁸ A ra na kila ni sai au ko Jiova, ni'u sa tutuvaka na bukawaqa mai Ijipita, ka ni ra sa vakarusai kece na nonai to.

⁹ E na siga ko ya era na lako yani maivei au eso nai talaki e na waqa me vakarerei ira na kai Iciopea era tiko wele, ia ena tauvi ira na rarawa levu me vaka e na siga kei Ijipita: ka raica, sa lako tu mai.

¹⁰ Sa kaya vakaoqo na Turaga ko Jiova; au na vakaotia talega na lewe vuqa mai Ijipita e na liga i Nepukanesa na tui Papiloni.

¹¹ O koya vata kei ira na nona tamata, na bati qaqa ni veimatanitu, era na kau mai me vakarusa na vanua; ka ra na ucuna na nodra i seleiwau me yaviti Ijipita, ka vakasinaita na vanua e na moku.

¹² Ia ka'u na vakadiva na uciwai, ka volitaka na vanua ki na ligadra na tamata ca: ia ka'u na vakacacana na vanua kei na ka kece sa tiko kina, e na ligadra na kai tani: koi au ko Jiova ka'u sa cavuta.

¹³ Sa kaya vakaoqo na Turaga ko Jiova; Au na vakarusa talega na matakau, ka muduka tani na nodra veika lasu mai Nofi: ia ena sega tale e dua na tui ni vanua ko Ijipita: au na vakatubura talega na rere e na vanua ko Ijipita.

¹⁴ Ia ka'u na vakalalataki Pacirosi, ka tutuvaka na bukawaqa mai Soani, ka ia na veicudruvi mai No;

¹⁵ ka sovaraka na noqu cudru ki Sini, na vu ni nodra kaukauwa na kai Ijipita; ka muduka laivi na kena lewe vuqa ko No;

¹⁶ au na tutuvaka talega na bukawaqa mai Ijipita: ena rarawa vakalevu ko Sini, ia ko No ena basubasuki, ka vakararawataki ko Nofi e na veisiga.

¹⁷ O ira na cauravou ni Eveni kei Pi-piseci era na bale e nai seleiwau: ia na lewe ni veikoro oqo ena vakabobulataki.

¹⁸ Ia mai Tapanesi, ena butobuto mai na siga, ni'u sa qai musuka maikea na matanakilagi ni Ijipita: io, ena mudu mai vua na kena kaukauwa sa viavialevu: ia ko koya, ena tabonaki koya sara e dua na o, ko ira talega na luvena yalewa era na vakabobulataki.

¹⁹ Au na ia vakaoqo na veicudruvi mai Ijipita: ka ra na kila ni sai au ko Jiova.

²⁰ Ia e nai katinikadua ni yabaki, e nai matai ni vula, e nai kavitu ni siga ni vula, sa qai yaco vei au na vosa i Jiova, ka vaka,

²¹ Ko iko na luve ni tamata, Au sa musuka na liga i Fero na tui Ijipita; ka raica, ena sega ni vivi me bula, se viviraki kina e dua na wa me vauci, me kaukauwa kina me taura tale nai seleiwau.

²² O koya sa kaya kina na Turaga ko Jiova, Raica, sai au na meca i Fero na tui Ijipita, ia ka'u na musuka ruarua na ligana, ko ya sa kaukauwa, ko ya talega sa ramusu; ia ka'u na vakalutuma tani mai na ligana nai seleiwau.

²³ Ia ka'u na dui vakasevi ira na kai Ijipita ki na veimatanitu, ka duibiubiuti ira ki na veivanua.

²⁴ Ia ka'u na vakaukauwataka na liga i tui Papiloni, ka solia na noqu i seleiwau ki na ligana: ia ka'u na musuka ga na liga i Fero, ena vutugu talega e matana e na vutugu ni tamata sa vuetaki vakaca sara.

²⁵ Ia ka'u na vakaukauwataka na liga i tui Papiloni, ia na liga i Fero ena lutu sobu; ka ra na kila ni sai au ko Jiova, ni'u sa solia na noqu i seleiwau ki na liga ni tui Papiloni, ka sa dodoka ko koya ki na vanua ko Ijipita.

²⁶ Ia ka'u na dui vakasevi ira na kai Ijipita ki na veimatanitu, ka duibiubiuti ira ki na veivanua; ka ra na kila ni sai au ko Jiova.