Isikeli 29 - Vakavakadewa Makawa

Sa cudruvi ko Fero e na vuku ni nona vakaisini ira na Isireli, 1-12. Ni sa oti na yabaki e vasagavulu ena qai vinaka tale ko Ijipita, 13-16. Sa soli ko Ijipita vei Nepukanesa mei voli ni nona cakacaka, 17-20. Ena vakabulai tale ko ira na Isireli, 21.

¹ E nai katini ni yabaki, e nai katini ni vula, e nai katinikarua ni siga ni vula sa yaco vei au na vosa i Jiova, ka vaka,

² Ko iko na luve ni tamata, mo vaqara na matamu vei Fero na tui Ijipita, ka parofisaitaka na ka ena yaco vua, kei na ka ena yaco ki Ijipita taucoko:

³ mo kaya mada, Sa kaya vakaoqo na Turaga ko Jiova; Raica, koi au na nomu meca, ko iko Fero na tui Ijipita, na gata levu sa koto e na maliwa ni nona uciwai, o koya ka kaya, Sa noqu na noqu uciwai, ia koi au ka'u sa cakava ga me noqu.

⁴ Ia ka'u na vakacoba na siwa ki na gusumu, ka vakabita na ika e na nomu uciwai ki na varimu, ka'u na yarataki iko cake mai na loma ni nomu uciwai, ia na ika kecega e na nomu uciwai ena kabita na varimu;

⁵ au na biuti iko laivi talega ki na veikau, ko iko kei na ika kecega e na nomu uciwai: ko na lutu ki na dela ni vanua; dou na sega ni vakasoqoni, se kumuni vata: ka'u sa soli kemudou kina me kedra na manumanu ni vanua kei na manumanu vuka.

⁶ A ra na kila na kai Ijipita kecega ni sai au ko Jiova, ni ra sa nodra i titoko gasau na mataqali i Isireli:

⁷ ni ra sa tauri iko e na ligamu, ko sa qai ramusu, ka sa mavoa sara kina na tabadra: ia ni ra vakaraviti iko ko sa ramusu, ka tu vakadua sara kina na tolodra.

⁸ O koya oqo sa kaya kina na Turaga ko Jiova; Raica, au na vakayacora vei iko nai seleiwau, ka muduka tani vei iko na tamata kei na manumanu.

⁹ Ia na vanua ko Ijipita, ena lala ka lekutu; ka ra na kila ni sai au ko Jiova: ka ni sa kaya ko koya, Sa noqu na uciwai, ia koi au ka'u sa cakava.

¹⁰ O koya oqo, ka'u sa veimecaki kina kei iko kei na nomu uciwai, ia ka'u na vakalalataka sara na vanua ko Ijipita me lekutu tu ga, mai Mikitoli ka yala ki Saiini ka yala ki Iciopea.

¹¹ Ena sega ni lako voli kina e dua na yava ni tamata, se dua na yava ni manumanu, ena sega talega ni tawa ka yabaki vasagavulu.

¹² Ia ka'u na vakalalataka na vanua ko Ijipita me lala sara tu e na maliwa ni veivanua lala, a nona veikoro talega ena lala tu ga e na maliwa ni veikoro rusa ka yabaki vasagavulu: ia ka'u na dui vakasevi ira na kai Ijipita ki na veimatanitu, ka duibiubiuti ira ki na veivanua.

¹³ Ia ka sa kaya vakaoqo na Turaga ko Jiova; Ni sa oti e vasagavulu na yabaki, ka'u na qai vakasoqoni ira na kai Ijipita maivei ira na lewe ni veivanua era dui vakasevi kina:

¹⁴ ia ka'u na kauti ira tale mai na kai Ijipita era a vakabobulataki, ka vakalesui ira ki na vanua ko Pacirosi, ki na vanua era a sucu kina; ka ra na matanitu kaisi maikea.

¹⁵ Ena matanitu kaisi sara vei ira na veimatanitu; ena sega talega ni vakalevulevui koya tale ki na veimatanitu: ni'u na vakalailaitaki ira, me ra kakua ni nodra turaga tale na veimatanitu.

¹⁶ Ia ena sega tale ni nodra ka na mataqali i Isireli me ra vakararavi kina, na ka ga me ra vakananumi kina e na nodra caka cala, ni ra golevi ira: ia era na kila ni sai au na Turaga ko Jiova.

¹⁷ Ia e nai karuasagavulu ka vitu ni yabaki, e nai matai ni vula, e nai matai ni siga ni vula, sa qai yaco vei au na vosa i Jiova, ka vaka,

¹⁸ Ko iko na luve ni tamata, Ko Nepukanesa na tui Papiloni ka lavaka vei ira na nonai valu e dua na cakacaka levu me ca kina ko Taia: era sa ulu cou kece, ka drakulu kece na tabadra: ia ka sa sega na kenai sau vua, se vei ira na nonai valu, mai Taia, e na vuku ni cakacaka sa cakava kina ko koya:

¹⁹ o koya oqo sa kaya kina na Turaga ko Jiova; Raica, au na solia vei Nepukanesa na tui Papiloni na vanua ko Ijipita me kenai sau; ia ena kauta ko koya na kena lewe vuqa, ka tokitaka na kenai toki ni valu, ka kovea na kenai yau; ia oqori sa na kedrai sau na nonai valu.

²⁰ Ka'u sa solia vua na vanua ko Ijipita me kenai sau ni cakacaka sa cakava ko koya, e na vukuqu, sa kaya na Turaga ko Jiova.

²¹ E na siga ko ya ka'u na cakava me kubu na kaukamea ni mataqali i Isireli, ia ka'u na solia vei iko mo vosa doudou e na kedra maliwa; ka ra na kila ni sai au ko Jiova.