Isikeli 28 - Vakavakadewa Makawa

A Kalou, sa cudruvi tui Taia ni sa viaviakalou ko koya, 1-10. Sa leleivaki nai ukuuku i tui Taia ni sa vakacacani e na nonai valavala ca, 11-19. Sa cudruvi ko Saitoni, 20-24. Ko ira na Isireli era vakabobulataki era na vakabulai tale, 25,26.

¹ Sa yaco tale vei au na vosa i Jiova, ka vaka,

² Ko iko na luve ni tamata, mo kaya vua na tui Taia, Sa kaya vakaoqo na Turaga ko Jiova; Ni sa viavialevu na lomamu, ka ni ko sa kaya talega, Koi au sa dua na Kalou Ka'u sa tiko e nai tikotiko ni Kalou, e na loma ni wasawasa; ia ko sa tamata ga, ko sa sega ni Kalou, ka ko sa nanuma na lomamu ni sa loma ni Kalou:

³ raica, sa vuku ko iko ka lialia ko Taniela; sa sega e dua na ka vuni me ra vunia vei iko:

⁴ e na nomu vuku kei na nomu yalomatua ko sa rawata kina na nomu i yau, ka ko sa binia na koula kei na siliva ki na nomu vale ni yau:

⁵ ni sa levu na nomu vuku kei na nomu dauveivoli ko sa vakalevutaka kina na nomu i yau, ia sa viavialevu na lomamu e na vuku ni nomu i yau.

⁶ O koya oqo sa kaya kina na Turaga ko Jiova, Ni ko sa nanuma na lomamu ni sa loma ni Kalou;

⁷ raica, au na kauti ira mai vei iko na kai tani, na nodra qaqa na veimatanitu: ka ra na ucuna na nodra i seleiwau me cudruva kina na nomu vuku lagilagi, ka ra na vakacacana na nomu matavinaka.

⁸ Era na biuti iko sobu ki na rusa, ia ko na mate me vakataki ira era vakamatei e na loma ni wasawasa.

⁹ Ko na kaya tiko li e na mata i koya sa vakamatei iko, Sa Kalou koi au? ia ko sa tamata ga, ko sa sega ni Kalou, e na liga i koya sa vakamatei iko.

¹⁰ Na mate era mate kina na tawa cili ko na mate ga kina e na ligadra na kai tani: ni ka'u sa cavuta, sa kaya na Turaga ko Jiova.

¹¹ A sa yaco tale vei au na vosa i Jiova, ka vaka,

¹² Ko iko na luve ni tamata, mo leleivaki koya na tui Taia, ka kaya vua, Sa kaya vakaoqo na Turaga ko Jiova; Sai iko sa vakaotia sara na kenai vakarau, ko sa vutu ni vuku, ko sa lagilagi duaduaga.

¹³ Ko a tiko mai Iteni na were ni Kalou; ko sa ubi ga e na vatu talei kecega na saritiusi, na topasa, na taiamodi, na perili, na onikisa, kei na jasipa, na safaia, na emeralita, kei na rupi, kei na koula: sa mataitaki oti na nomu tibereli kei na nomu bitu-ni-vakatagi sa tu vei iko, ia e na siga ko a buli kina sa vakarautaki tu.

¹⁴ Ko iko na jerupi ka lumuti na kenai vakaruru; ia ka'u a vakatikori iko: ko a tiko e na ulu-ni-vanua tabu ni Kalou; ko a veilakoyaki tu e na loma ni vatu bukawaqa.

¹⁵ Sa dodonu sara ko iko e na nomu i valavala mai na siga ko a buli kina, ni sa bera ni kune vei iko na caka cala.

¹⁶ Ni sa levu na nomu dauveivoli era sa vakasinaiti iko e nai valavala kaukauwa, ia ko sai valavala ca: o koya oqo ka'u na vakacacataki iko tani kina mai na ulu-ni-vanua ni Kalou: ia ka'u na vakarusai iko tani, na jerupi sai vakaruru, mai na loma ni vatu bukawaqa.

¹⁷ Sa laveti cake na lomamu e na vuku ni nomu lagilagi, o sa vakacacataka na nomu vuku ni ko sa matavinaka: ka'u na viritaki iko ki na qele, ka'u na laivi iko tu e matadra na tui, me ra raici iko.

¹⁸ Ni sa levu na nomu caka cala kei na caka cala ni nomu dauveivoli, ko sa vakacacana kina na nomu veiyasana tabu; o koya oqo ka'u na vakayacora kina na bukawaqa mai na kemu maliwa, ka na sa kani iko, ia ka'u na vakamai iko mo sa dravusa e dela i vuravura e matadra kece era raici iko.

¹⁹ O ira kece vei ira na veimataqali era kilai iko era na kidacalataki iko: ko na yaco mo ka ni veivakarerei, ia ko na yali sara.

²⁰ A sa yaco tale vei au na vosa i Jiova, ka vaka,

²¹ Ko iko na luve ni tamata, mo vaqara na matamu ki Saitoni, ka parofisaitaka na ca ena yaco kina,

²² ka kaya, Sa kaya vakaoqo na Turaga ko Jiova; Raica, koi au ka'u sa veimecaki kei iko Saitoni; ia ka'u na vakacaucautaki e na kemu maliwa: ka ra na kila ni sai au ko Jiova, ni'u na ia na veicudruvi vua, ka sa vakarokorokotaki vua.

²³ Ni'u na vakayacora vua na mate dauveiveitauvi, kei na dra ki na nona sala ni koro; ka ra na bale ko ira na vuetaki e na kena maliwa e nai seleiwau sa na lauti koya e na veiyasana; ka ra na kila ni sai au ko Jiova.

²⁴ Ia ena sega tiko vei ira na mataqali i Isireli e dua na kedra soni dauveilau, se dua na kedra wa-vakavotona e dauveivakararawataki vei ira kece era tiko vakavolivoliti ira, ka beci ira; ka ra na kila ni sai au na Turaga ko Jiova.

²⁵ Sa kaya vakaoqo na Turaga ko Jiova; Ni'u na vakasoqoni ira oti na mataqali i Isireli maivei ira na veimataqali era dui vakasevi kina, ka ni'u sa vakarokorokotaki vei ira e matadra na veimatanitu, era na qai tiko ga e na nodra vanua ka'u a solia vei Jekope na noqu tamata:

²⁶ ka ra na tiko vakacegu kina, ka tara vale, ka tea na veiwere-ni-vaini; io, era na qai tiko vakacegu, ni'u sa na cudruvi ira oti kece era beci ira ka ra tiko vakavolivoliti ira; ka ra na kila ni sai au ko Jiova na nodra Kalou.