Isikeli 27 - Vakavakadewa Makawa

A kena vutuniyau ko Taia, 1-25. A kena rusa vakaidina sara, 26-36.

¹ A sa yaco vei au na vosa i Jiova, ka vaka,

² Ia ko iko, na luve ni tamata, mo taurivaka na lele e na vuku i Taia;

³ ka kaya ki Taia, Ko iko ka toka mai na toba, ka nodra koro dauveivoli na tamata mai na veiyanuyanu e vuqa, sa kaya vakaoqo na Turaga ko Jiova; Ko iko Taia, ko sa kaya, Au sa koro lagilagi duadua.

⁴ Sa tu mai na loma ni wasawasa na nomu i yalayala, ko ira na kemu matai era sa tarai iko mo koro lagilagi duadua.

⁵ Era sa cakava kece na papa ni nomu waqa e na damanu ni Siniri: era sa taura na sitari ni Lepanoni me caka kina na nomu i vana.

⁶ Na oki ni Pasani era sa taya kina na nomu i voce; a nomu i tikotiko era sa cakava e na dakua e vono tabua, ka kau mai na veiyanuyanu ko Kitimi.

⁷ A lineni matailalai ni Ijipita ka veivolavolai sai koya ko sa vakarewataka me nomu laca; ai sulu pelu ka lokaloka e kau mai na veiyanuyanu i Ilaisa sa nomu i vakaruru.

⁸ O ira na kai Saitoni kei na kai Arivati sa ra nomu lewe ni waqa: ko ira na nomu vuku, era tiko vei iko Taia, sa ra nomu turaga ni waqa.

⁹ O ira na qase ni Kipali kei ira na kena tamata vuku sa ra tiko vei iko me ra nomu dausaubulu: na waqa kecega ni wasawasa kei ira na lewe ni waqa sa ra tiko vei iko me ra oga e na nomu i yau ni ra dauveivoli kei iko.

¹⁰ O ira na kai Perisia kei na kai Luti kei na kai Futi era sa tiko me ra nomu bati, ka me ra nomu tamata i valu: nai sasabai kei nai vakaruru-ni-ulu era sa rubeca e tikimu, era sa vakaraitaka na kemui ukuuku.

¹¹ O ira na kai Arivati kei na nomu bai era sa tu e dela ni nomu bai e na veiyasana, kei ira na tamata qaqa era sa tiko e na nomu veivale cecere: na nodra i sasabai era rubeca e na kena lalaga e na veitikina; era sa cakava na nomu lagilagi me sa uetaki sara.

¹² O Tasisi, sa dauveivoli kei iko e na vuku ni kena levu ni yau kecega; na siliva, na aironi, na tini, kei na uma, era sa veivolitaka e na nomu rara ni veivoli.

¹³ O Javana, kei Tupali, kei Meseki, era dauveivoli kei iko: na tamata kei nai yaya parasa era sa veivolitaka e na nomu rara ni vovoli.

¹⁴ O ira na mataqali ni Tokama era sa veivolitaka na ose, kei na ose ni valu, kei na meule, e na nomu rara ni veivoli.

¹⁵ O ira na kai Titana, era dauveivoli kei iko; na lewe ni yanuyanu e vuqa, era dauvolia na ka ko sa rawata: nai leu tabua kei na eponi era kauta vei iko me kenai voli.

¹⁶ Ko Siria, sa dauveivoli kei iko ni sa ka levu nai yaya ko sa cakava: na emeralita, kei nai sulu lokaloka, kei nai sulu veivolavolai, kei na lineni matailalai, kei na lase damudamu kei na rupi, era veivolitaka e na nomu rara ni vovoli.

¹⁷ Ko Juta, kei na vanua ko Isireli, era dauveivoli kei iko: na witi ni Minici, kei Panake, kei na oni, kei na waiwai, kei na drega, era sa volitaka e na nomu rara ni vovoli.

¹⁸ Ko Tamasiko, sa dauveivoli kei iko e nai yaya levu ko sa cakava, e na vuku ni levu ni yau kecega; e na waini ni Eliponi, kei na vutika ni sipi sa vulavula.

¹⁹ Ko Tani talega kei Javana, era dauveivoli e na nomu rara ni vovoli: na aironi makamakalivata, kei na kasia, kei na kalamo, sa tu e na nomu rara ni vovoli.

²⁰ Ka Titana, sa dauveivoli kei iko e nai sulu me tevuki e na qiqi-vakaturaga.

²¹ Ko Arepea, kei na turaga kecega ni Kitari, era sa dauveivolitaka kei iko na lami, kei na sipi tagane, kei na me: ena ka oqo era dauveivoli kei iko.

²² Ko ira na dauveivoli mai Sipa kei Reama, era sa dauveivoli kei iko: na vua ni kau kecega e boi vinaka sara, kei na vatu talei kecega, kei na koula, era sa volitaka e na nomu rara ni vovoli.

²³ Ko Karana, kei Kane, kei Iteni, kei ira na dauveivoli mai Sipa, kei Asuri, kei Kilimati, era dauveivoli kei iko:

²⁴ o ira oqo era sa dauveivoli kei iko e nai yaya kecega, e nai tutuvi pelu, kei nai sulu veivolavolai, kei na kato i sulu talei, sa vau e na dali, ka caka e na sitari, kei na ka eso ko sa dauveivolitaka.

²⁵ A waqa ni Tasisi, sa dauusai yau ki na nomu rara ni vovoli: ia ko sa vakavutuniyautaki, ka sa rogo sara e loma ni wasawasa.

²⁶ Era sa kauti iko ki na dua na wasa levu ko ira na nomu dauvoce; ko sa kasere e na tokalau e loma ni wasawasa.

²⁷ A nomu i yau, kei na nomu rara ni vovoli, na nomu ka ni veivoli, na nomu lewe ni waqa, kei na nomu turaga ni waqa, na nomu dausaubulu, kei ira era oga e na nomu i yau e dauveivolitaki, kei ira kecega na nomu tamata i valu, ka tiko vata kei iko, kei ira kecega na nomu era tiko e na kemu maliwa, era na lutu dromu e loma ni wasawasa e na siga ko sa rusa kina.

²⁸ Ena yavala na biau ni sa rogo na nodra tagi na nomu turaga ni waqa.

²⁹ Ka ra na sobu mai na nodra waqa ko ira kece era dauvoce, kei ira na lewe ni waqa, kei ira kece era turaga ni waqa, ka ra na tu e vanua;

³⁰ ka ra na tabalaka na domodra e na vukumu, ka tagi vakalevu, ka kabua ki na uludra na kuvu-ni-soso, era na qiqi voli tiko e na dravusa:

³¹ ka ra na tasia sara na uludra e na vukumu, ka vauci ira e nai sulu taga, ka ra na tagicaki iko, ni sa rarawa na lomadra, ka ra na qoqolou e na rarawa.

³² Ka, ni ra ia na tagi yaso, era na leleivaki iko e na dua na lele, ka kaya, Na koro cava me rau vakatauvatani kei Taia, sa vagalui vakaoqo mai na loma ni wasawasa?

³³ Ni sa yau ki vanua na nomu kamunaga mai na veiwasawasa, ko a vakasaututaki ira kina na veimataqali e vuqa; ko a vakavutuniyautaki ira na tui kei vuravura e na kena levu ni nomu i yau kei na nomu ka e dauveivolitaki.

³⁴ E na siga ko a kasere kina e na ua e na wai titobu, sa qai rusa vata na nomu i yau e dauveivolitaki kei ira na nomu e na kemu maliwa.

³⁵ O ira kece na lewe ni veiyanuyanu era sa kidacalataki iko, o ira talega na nodra tui era sa rere vakalevu sara, era sa vakaveveku mata.

³⁶ O ira na dauveivoli e na veimataqali era na vakasiusiutaki iko; ia ko sa yaco mo ka rerevaki, ia ko na qai yali sara.