Isikeli 26 - Vakavakadewa Makawa

Ko Taia, ni sa vosalevutaki Jerusalemi, sa cudruvi kina, 1-6. Ena gumatua ko Nepukanesa ni sa veivaluti kaya, 7-14. O ira kece na turaga ni veivanua era dausokota era na tagicaki koya ni sa bale, 15-21.

¹ Ia e nai katinikadua ni yabaki, e nai matai ni siga ni vula, sa yaco vei au na vosa i Jiova, ka vaka,

² Ko iko na luve ni tamata, ni sa vosataki Jerusalemi ko Taia, ka kaya, Ue, sa ramusu ko koya ka nodra matamata-ni-koro ko ira na veimataqali; sa vuki mai vei au ko koya: au na vakavutuniyautaki, ni sa lala mai ko koya:

³ o koya oqo sa kaya kina na Turaga ko Jiova, ka vaka; Mo kila, au sa veimecaki kei iko, Taia, ia ka'u na kauta cake mai vei iko na veimatanitu e vuqa, me vaka na ua ni sa se mai ki na wasawasa.

⁴ A ra na vakarusa na bai kei Taia, ka basuka sobu na kena veivale cecere: ia ka'u na taviraka tani na kena kuvu-ni-soso, ka vakatautauvatataki koya kei na dela ni vatu.

⁵ Ka na yaco mei sasau ni lawa e loma ni wasawasa: ni sai au ka cavuta, sa kaya na Turaga ko Jiova: ia ena yaco ko koya me nodra i toki ni valu na veimatanitu.

⁶ A luvena yalewa talega mai tailevu era na mate e nai seleiwau, ka ra na kila ni sai au ko Jiova.

⁷ Ni sa kaya vakaoqo na Turaga ko Jiova; Raica, au na kauti Nepukanesa na tui Papiloni ki Taia, mai na mata ni tokalau, ko koya na nodra tui na tui, kei na ose, kei na qiqi-ni-valu, kei nai valu e vodo ose, kei nai vavakoso, kei na tamata e lewe vuqa.

⁸ Na luvemu yalewa mai tailevu ena vakamatea ko koya e nai seleiwau: ia ena cakava na kemu vale ni valu, ka viria na kemu suva, ka vakaduria na kemui vakaruru.

⁹ Ia na kemui tukituki ni bai ena vakaduria ko koya ki na nomu bai, ka basuka sobu na nomu vale-cecere e na nona matau.

¹⁰ Ni sa levu na nona ose ena kuvuci iko taucoko na nodra kuvu-ni-soso: e na vuku ni domo ni valu sa vodo ose, kei na qiqi-ni-yaya, kei na qiqi-ni-valu, ena yavala kina na nomu bai, ni sa curu ko koya ki na nomu matamata-ni-koro, me vaka ni sa curumi na koro sa kabasu.

¹¹ E na ququ ni nona ose ena butuka kece kina na nomu sala: ena vakamatei ira na nomu tamata e nai seleiwau, kei na nomu bai ni valu kaukauwa ena bale sobu ga ki na qele.

¹² A ra na tokitaka na nomu i yau, ka koveraka na nomu ka ni veivoli: ka ra na basuka sobu na nomu bai, ka vakacacana na nomu veivale domoni: ia era na viritaka ki loma ni wai na nomu veivatu kei na nomu kau ni vale kei na nomu kuvu-ni-soso.

¹³ Ia ka'u na vakaotia na domo ni nomu meke: ia na domo ni nomu api ena sega tale ni rogo.

¹⁴ Ia ka'u na cakavi iko mo tautauvata kei na dela ni vatu: ko na yaco mei sasau ni lawa; ko na sega tale ni tara; ni sai au ko Jiova ka'u sa cavuta, sa kaya na Turaga ko Jiova.

¹⁵ Sa kaya vakaoqo na Turaga ko Jiova ki Taia; Ni sa rorogo na nomu bale, ka ni ra vutugu tiko ko ira na vuetaki, ni sa ia na veivakamatei e na kemu maliwa, me na qai sega li ni yavavala kina na veiyanuyanu?

¹⁶ Era na qai lako sobu mai na nodra i tikotiko na turaga kece ni wasawasa, ka biuta na nodra i tutuvi, ia era na luvata tani na nodra i sulu veivolavolai: era na vakaisulu e na sautaninini; era na tiko sobu ki na qele, ka sautaninini tikoga, ka kidacalataki iko.

¹⁷ A ra na taurivaka na lele e na vukumu, ka kaya vei iko, Na kemu rusa, ko iko ka tawa e na kai wai, na koro rogo, ka daugumatua mai na wasawasa, ko koya kei na lewena, ka ra dauveivakarerei vei ira kecega era tiko kina!

¹⁸ Ena qai sautaninini na veiyanuyanu e na siga ni nomu bale; io, ena kidroa na veiyanuyanu e na loma ni wasawasa ni ko sa lako tani.

¹⁹ Ni sa kaya vakaoqo na Turaga ko Jiova; Ni'u na vakalalataki iko, me vaka na veikoro sa sega tiko ni tawa; ni'u na kauta cake mai vei iko na wasa titobu, ka na sa luvuci iko na wai levu;

²⁰ ni'u na kauti iko sobu kei ira era lako sobu ki nai keli, vei ira na tamata eliu, ka vakatikori iko e na ruku i vuravura, e na veitikina sa rusa makawa, kei ira era lako sobu ki nai keli, mo kakua ni tawa tale; ni'u na vakatikora talega nai ukuuku e na nodra vanua na bula;

²¹ ka'u na qai cakavi iko mo ka rerevaki, ia ko na qai yali sara: ia kevaka ko sa dauqarai, ko na sega sara ni kune tale, sa kaya na Turaga ko Jiova.