Isikeli 25 - Vakavakadewa Makawa

Sa cudruvi ira na luve i Amoni na Kalou, ni ra sa rekitaka na ca sa yaco ki Juta, 1-7; sa cudruvi Moapi talega kei Sia, 8-11; kei Itomi, 12-14; kei ira na kai Filisitia, 15-17.

¹ A sa baci yaco tale vei au na vosa i Jiova, ka vaka,

² Ko iko na luve ni tamata, mo vakanamata mada vei ira na luve i Amoni ka parofisaitaka na ca vei ira;

³ ka kaya vei ira na luve i Amoni, Mo rogoca na vosa ni Turaga ko Jiova; Sa kaya vakaoqo na Turaga ko Jiova; Ni ko sa vakaueue ki na noqu vale tabu, ni sa vakacacani; kei na vanua ko Isireli, ni sa lala: kei na mataqali i Juta, ni ra sa vakabobulataki;

⁴ o koya oqo, mo kila ka'u na soli iko kina vei ira na kai na tu-i-cake me ra taukeni iko, ka ra na vakatura na nodra vale vakaturaga e tikimu, ka cakava na nodra i tikotiko e tikimu: era na kania na vuata ni nomu vanua, ka gunuva na memu wai-ni-sucu.

⁵ Ia ka'u na cakavi Rapa me bai ni kameli, kei na nodra vanua na luve i Amoni mei kotokoto ni qele ni sipi: ia dou na kila ni sai au ko Jiova.

⁶ Ni sa kaya vakaoqo na Turaga ko Jiova; Ni ko sa vakasausau ligamu, ka vaka butubutu, ka reki ni ko sa beca sara e na vu ni yalomu na vanua i Isireli;

⁷ o koya oqo, mo kila, au na dodoka yani na ligaqu vei iko, ka soli iko mo nodra i toki ni valu na veimatanitu tani; ia ka'u na muduki iko tani maivei ira na veimataqali, ka vakarusai iko tani mai na veivanua: au na vakawabokotaki iko; ia ko na kila ni sai au ko Jiova.

⁸ Sa kaya vakaoqo na Turaga ko Jiova: Ni sa kaya ko Moapi kei Sia, Raica, sa qai vakataki ira kece na veimatanitu, na mataqali i Juta,

⁹ o koya oqo, mo kila, au na dolava kina nai yalayala i Moapi mai na veikoro, io na nona veikoro mai na nonai yalayala, oqori ka uasivi cake e na vanua, ko Peci-jisimoci, kei Peali-mioni kei Kiri-aceimi,

¹⁰ vei ira na kai na tu-i-cake, kei ira na luve i Amoni, ka solia me ra taukena, me ra kakua ni nanumi tiko na luve i Amoni e na veivanua.

¹¹ Ia ka'u na cudruvi Moapi, ka ra na kila ni sai au ko Jiova.

¹² Sa kaya vakaoqo na Turaga ko Jiova; Ni sa cudruvi ira na mataqali i Juta ko Itomi, ka sa caka cala vakalevu vei ira, ka sa saumi ira ko koya;

¹³ o koya oqo sa kaya kina na Turaga ko Jiova; Au na dodoka talega na ligaqu vei Itomi, ka vakaotia tani maikina na tamata kei na manumanu; ia ka'u na vakalalataka sara mai Temani ka yala ki Titana; era na bale e nai seleiwau.

¹⁴ Ia ka'u na vakayacora na noqu cudru vei Itomi e na ligadra na noqu tamata na Isireli: ka ra na cakacaka mai Itomi me vaka na noqu cudru ka vaka na noqu lesa; ka ra na kila na noqu veicudruvaki, sa kaya na Turaga ko Jiova.

¹⁵ Sa kaya vakaoqo na Turaga ko Jiova; Ni ra ia na veicudruvaki na kai Filisitia, ka ra ia na veicudruvaki e na yalodauveibeci, me ra vakarusa e na vuku ni veicati makawa;

¹⁶ o koya oqo sa kaya kina na Turaga ko Jiova; Raica, au na dodoka na ligaqu vei ira na kai Filisitia, ka muduki ira tani na kai Kireci, ka vakarusai ira era vo mai baravi.

¹⁷ Ia ka'u na vakayacora vei ira na veicudruvaki levu kei na veivunauci vakacudrucudru; ka ra na kila kina ni sai au ko Jiova, ni'u sa vakatauca vei ira na noqu cudru.