Isikeli 23 - Vakavakadewa Makawa

Era dauqarava na kalou lasu e na matanitu ko Juta kei Isireli, ka sa vakatokai me nodrau dautagane ko Aola kei Aolipa, 1-21. Ena cudruvi Aolipa ko ira na nonai tau, 22-35. Sa vunauca ko koya na parofita na nodrau dauveibutakoci ruarua, 36-44, ka sa vakatakila na nodrau cudruvi, 45-49.

¹ Sa yaco tale vei au na vosa i Jiova, ka vaka,

² Ko iko na luve ni tamata, sa lewe rua na yalewa, erau tina vata:

³ ka rau sa ia na dautagane mai Ijipita; ni rau sa goneyalewa tiko erau sa ia na dautagane: sa bikai maikea na sucudrau, io maikea sa rau tabaka na mata-ni-sucudrau vagoneyalewa.

⁴ Ia na yacadrau ko Aola sa qase vei rau, kei Aolipa na tacina: a rau a noqu ga, ka rau vakasucuma na luvedrau tagane kei na luvedrau yalewa. Ia na yacadrau; ko Samaria ko Aola, ia ko Jerusalemi ko Aolipa.

⁵ Ka sa ia na dautagane ko Aola ni sa noqu tiko; ka sa domoni ira na nonai tau, na kai Asiria era tiko voleka,

⁶ ka ra vakaisulu e nai sulu pelu, na kapiteni ni valu kei na turaga era lewa, era cauravou vinaka kecega, ka dauvodo ose.

⁷ Ia sa soli koya me ia na veibutakoci kei ira, era gone digitaki kecega ni Asiria, kei ira kece talega sa gagano kina ko koya: sa vakadukadukalitaki koya kei na nodra matakau kecega.

⁸ Ia sa sega ga ni biuta na nona dautagane mai Ijipita: ni ra a moce kaya ni sa goneyalewa ko koya, ka ra tabaka na sucuna vagoneyalewa, ka sova vua na nodra dauyalewa.

⁹ O koya oqo ka'u sa soli koya kina ki na ligadra na nonai tau ki na ligadra na kai Asiria, sa gagano kina ko koya.

¹⁰ Ko ira oqo era sa vakaraitaka na nona luvawale: ka ra sa kauta na luvena tagane kei na luvena yalewa, ka ra sa vakamatei koya e nai seleiwau: ka sa rogo kina na yacana vei ira na yalewa; e na vuku ni veicudruvi sa ra ia vua.

¹¹ Ia ni sa raica ko tacina ko Aolipa, sa qai ca vakalevu cake vei rau ko koya e na nona daugagano, ia na nona dautagane sa qai levu mai ka lailai na nona dautagane na tuakana.

¹² Sa daudomoni ira na gone ni Asiria ko koya, na kapiteni ni valu kei na turaga era lewa, era tiko voleka, ka ra sa vakaisulu vakaiukuuku sara, ka dauvodo ose, ka ra cauravou vinaka kecega.

¹³ Au a qai raica ni sa vakadukadukalitaki ko koya, ni rau sai valavala vata ga,

¹⁴ ni sa vakaikuritaka ko koya na nona dautagane: ka ni sa qai raica ko koya na tagane era volai e na lalaga ni vale, io na kedrai vakatakarakara na kai Kalitia era volai e nai qumu,

¹⁵ sa vauci na tolodra e nai vau, ka vakaisalataki e nai sala veivolavolai na uludra, era rairai vakaturaga kecega, me vakataki ira na gone ni Papiloni mai Kalitia, na vanua era sucu kina:

¹⁶ sa domoni ira sara ko koya ni sa qai raici ira, ka sa vakatadu mata vei ira ki Kalitia.

¹⁷ A ra sa qai lako mai vua ko ira na gone ni Papiloni ki nai mocemoce ni loloma, ka vakadukadukalitaki koya e na nodra dauyalewa, a sa vakadukadukalitaki kina ko koya, ka sa vuki tani maivei ira na lomana.

¹⁸ Ia sa vakaraitaka vakaoqo ko koya na nona dautagane, ka vakatakila na nona luvawale: ka sa qai vuki tani mai vua na lomaqu, me vaka ni sa vuki tani na lomaqu mai vua na tuakana.

¹⁹ Ia ka sa vakalevutaka tiko na nona dautagane, ni sa vakananuma ko koya na gauna sa goneyalewa kina, ka ia na dautagane mai na vanua ko Ijipita.

²⁰ Ni sa domoni ira ko koya era nodra i tau, na lewedra sa vaka na lewe ni asa, ka sa vaka na kedrai vurevure na ose na kedrai vurevure.

²¹ Ia ko a vakananuma vakakina na nomu i valavala velavela ni ko a gone, ni ra tabaka na sucumu mai Ijipita e na vuku ni sa mata-ni-sucu vagoneyalewa.

²² O koya oqo, ko iko Aolipa, sa kaya kina na Turaga ko Jiova, Raica, au na vakauqeti ira na nomu i tau me ra vala kei iko, o ira sa vuki tani kina vei ira na lomamu, ia ka'u na kauti ira mai na veiyasana kece me ra vala kei iko:

²³ ko ira na kai Papiloni, kei ira kece na kai Kalitia, ko Pikoti, kei Soa, kei Koa, kei ira vata kecega na kai Asiria: era cauravou vinaka kecega, na kapiteni ni valu kei na turaga era lewa, na turaga levu ka rogo, era vodo ose kecega.

²⁴ Ia ena lako mai na kemui valu era vakaiyaragi, kei na qiqi-ni-valu, kei na qiqi-ni-yaya, kei nai vavakoso e lewe vuqa; era na tuvai ira vakaivalu, ka me vakavolivoliti iko, ka ra na vakaisasabai, ka vakaivakaruru, ka vakaisala ni valu: ia ka'u na solia vei ira me ra lewa, ka ra na lewai iko me vaka na nodra lewa:

²⁵ ia ka'u na tuva na noqu vuvu me kemui valu, ka ra na valavala vakararawa sara vei iko: era na cebeta laivi na ucumu kei na daligamu; ia na nomu kawa sa vo era na bale e nai seleiwau: era na kauti ira na luvemu tagane kei na luvemu yalewa; ia na nomu kawa e vo era na vakamai e na bukawaqa.

²⁶ Ka ra na luvata tani vei iko na nomu i sulu, ka kauta tani na kemui yaya vakaiukuuku.

²⁷ Ia oqo ka'u na vakaotia kina vei iko na nomu i valavala velavela, kei na nomu dautagane e kau mai na vanua ko Ijipita: ko na sega kina ni ta cake vei ira, io ko Ijipita, ko na sega ni nanuma tale kina.

²⁸ Ni sa kaya vakaoqo na Turaga ko Jiova; Raica, au na soli iko ki na ligadra na tamata ko sa cata, ki na ligadra sa vuki tani vei ira na lomamu:

²⁹ ka ra na kitaki iko e na yaloca, ka kauta tani na ka kece ko sa oca kina, ka laivi iko mo luvawale ka luveniyali: ena vakaraitaki talega na nomu luvawale ni dautagane, ia na nomu i valavala velavela kei na nomu dautagane.

³⁰ Au na cakava vei iko na ka oqo, ni ko sa muri ira na veimatanitu tani, mo dautagane vata kei ira ka ko sa vakadukadukalitaki e na nodra matakau.

³¹ Ko sa muria ga nai valavala ni tuakamu; o koya oqo ka'u na solia kina na mena bilo ki na ligamu.

³² Sa kaya vakaoqo na Turaga ko Jiova; A mena bilo na tuakamu ko na gunuva, ka sa titobu ka levu: ko na dredrevaki ka vakalialiai; sa dua na bilo tawa sara.

³³ Ko na vakamamautaki e na mateni kei na rarawa, e na bilo ni veivakidacalataki kei na veivakarusai, e na mena bilo na tuakamu ko Samaria.

³⁴ Ia ko na gunuva ka vakamaca sara, ko na vorolaka talega na kenai caca, ia na sucumu ko na cavuka: ni'u sa cavuta, sa kaya na Turaga ko Jiova.

³⁵ O koya oqo sa kaya kina na Turaga ko Jiova; Ni ko sa guilecavi au, ka vakanadakui au, me yaco vei iko na kenai sau ni nomu i valavala velavela kei na nomu dautagane.

³⁶ Sa kaya tale vei au ko Jiova, Ko iko na luve ni tamata, ko na sega beka ni lewai Aola kei Aolipa? io, mo tukuna vei rau na nodraui valavala vakasisila;

³⁷ ni rau sa ia na dautagane, a dra talega sa tu e na ligadrau, erau sa ia talega na dautagane kei na nodrau matakau, a luvedrau tagane talega, erau vakasucuma vei au, erau sa vakacabora e loma ni bukawaqa, me vakayavuna.

³⁸ A ka talega oqo erau sa cakava vei au: erau sa vakavelavelataka na noqu vale tabu e na siga ko ya, ka vakacacana talega na noqu siga tabu.

³⁹ Ka ni rau a vakacabori ira oti na luvedrau ki na nodrau matakau, erau sa qai lako mai e na siga dina ko ya ki na noqu vale tabu me vakavelavelataka; io, sa vakaoqo na ka erau sa cakava e na noqu loma ni vale.

⁴⁰ Ia oqo talega, ni dou a talakitaki ira na tamata era tiko vakayawa, ka vakatadu mata vei ira; ka raica, era sa lako mai: ko sa qai vakasilimi iko e na vukudra, ka qumuta na matamu, ka vakaiukuukutaki iko e nai yaya ni ukuuku,

⁴¹ ka sa tiko e nai mocemoce vakaturaga, ia na tepeli sa vakarau tu e matana, ko sa viritura kina na noqu ka boi vinaka kei na noqu waiwai:

⁴² a domodra talega na lewe vuqa era wele tiko sa tiko kaya: ia na tamata wale kei na daumateni era sa kau vata mai, mai na veikau, ka ra daramaka na qato ki na ligadra, ka vakaisalataki ira e nai sala vakaiukuuku.

⁴³ Au a qai kaya e na vukuna sa madra e na dautagane, Era na qai ia li na veibutakoci kei koya oqo?

⁴⁴ Ia era sa curu vua, me vaka era curu vua na yalewa sa ia na dautagane: io sa vakaoqo na nodra curu vei Aola kei Aolipa, koi rau na yalewa velavela.

⁴⁵ Ia ko ira na tamata yalododonu, era na lewai rau me vaka era lewai ko ira na yalewa dautagane, kei ira na yalewa sa vakadave dra; ni rau sa yalewa dautagane, ka sa tauvi dra talega na ligadrau.

⁴⁶ Ni sa kaya vakaoqo na Turaga ko Jiova; Au na kauta cake mai kivei rau e dua nai vavakoso, ka soli rau me rau kau tani ka vakacacani.

⁴⁷ Ena vakaviriki rau talega e na vatu ko ira nai vavakoso, ka suaki rau e na nodra i seleiwau; era na vakamatea talega na luvedrau tagane kei na luvedrau yalewa ka ra na vakama na nodrau veivale.

⁴⁸ Ia ka'u na muduka tani vakaoqo nai valavala velavela mai na vanua, me ra vakavulici kece kina ko ira na yalewa me ra kakua ni muria na nomudrau i valavala velavela.

⁴⁹ Ia era na sauma vei kemudrau na nomudrau i valavala velavela, ena tau talega vei kemudrau nai sau ni valavala ca ni nomudrau matakau: ka drau na kila ni sai au na Turaga ko Jiova.