Isikeli 22 - Vakavakadewa Makawa

Sa vakamacalataki na nodra i valavala ca na kai Jerusalemi, 1-12. Sa na vakamai ira na Kalou e na nona lovo me vaka na de ni kaukamea, 13-22. Era sa tamata ca vata na parofita, kei na bete, kei na turaga, kei na lewe ni koro, 23-31.

¹ A sa yaco tale vei au na vosa i Jiova, ka vaka,

² Ia ko iko, na luve ni tamata, ko na sega li ni lewa, ko na sega li ni lewa na koro oqo sa dauvakadave dra, ka vakatakila vua na nonai valavala vakasisila kecega?

³ Mo qai vaka, Sa kaya vakaoqo na Turaga ko Jiova, Na koro oqo sa vakadavea kina na dra, me yaco kina na kena gauna, ka sa cakava eso na matakau me ca kina ko koya ka ni sa vakadukadukalitaki kina.

⁴ Ko sa cala e na nomu dra ko sa vakadavea; ko sa vakadukadukalitaki iko kina talega na nomu matakau ko sa cakava; ia ko sa vakavolekata na kemu gauna, ka sa yacova na kemu yabaki: o koya oqo ka'u sa soli iko kina mo vakalialiai e na veimatanitu tani, ka mo dredrevaki e na veivanua kecega.

⁵ O ira sa voleka vei iko kei ira era sa yawa vei iko, era na dredrevaki iko, ko iko sa daurogorogo ca ka dauvakararawataki.

⁶ Raica, ko ira kecega na turaga ni Isireli, era sa dui tiko vei iko, me vaka na ka era sa dui rawata era sa vakadavea na dra.

⁷ Ko ira era sa tiko vei iko era sa beca na tamadra kei na tinadra: ka ra sa vakasaurarataki ira na nomu vulagi: ka ra sa vakararawataka na luveniyali kei ira na yada era tiko vei iko.

⁸ Ko sa beca na noqu ka tabu, ka sa vakacacana na noqu siga tabu.

⁹ Era sa tiko vei iko na tamata daukakase era vakadavea kina na dra: ka ra sa kana voli e na nomu veiulu-ni-vanua: kai valavala vakavelavela e na kemu maliwa.

¹⁰ A nodra luvawale na tamadra era sa vakaraitaka: ka ra sa kucuva na yalewa era sa tawase ni ra sa sega ni savasava e na kemu maliwa.

¹¹ Ia e dua sa kitaka na ka vakasisila kei na wati ni kai nona; ka dua tale sa vakadukadukalitaka vakaca na vugona yalewa; ka dua tani tale e na kemu maliwa sa kucuva na ganena, na luve ni tamadrau:

¹² ka so era taura nai yau me kenai sau ni nodra vakadave dra; ka ko sa taura nai voli ni ka e kerei kei na kenai kere; ia e na nomu yalokocokoco ko sa taura vakaukauwa na nodra i yau na kai nomu, ka ko sa guilecavi au, sa kaya na Turaga ko Jiova.

¹³ Ka raica, ka'u sa tavia vata na ligaqu e na vuku ni nomu i yau ni kocokoco ko sa rawata, e na vuku talega ni kedra dra na kai nomu sa bale vei iko.

¹⁴ Ena dei beka na lomamu, se kaukauwa na ligamu, e na gauna ka'u na tarai iko kina? Oi au ko Jiova ka'u sa cavuta, ka'u na cakava talega.

¹⁵ Ia ka'u na vakasevi kemudou ki na veimatanitu, ka duibiubiuti kemudou ki na veivanua, ka vakaotia tani na nomu dukadukali maivei iko;

¹⁶ ko na qai vakavelavelataki e matadra na veimatanitu, ia ko na kila ni sai au ko Jiova.

¹⁷ A sa yaco vei au na vosa i Jiova, ka vaka,

¹⁸ Ko iko na luve ni tamata, sa yaco na mataqali i Isireli me de ni kaukamea vei au: ko ira kece era sa parasa walega, ka tini, ka aironi, ka uma, e na loma ni lovo; io era sa de ni siliva.

¹⁹ O koya oqo sa kaya kina na Turaga ko Jiova; Ni dou sa yaco kecega mo dou de ni kaukamea, raica, au na soqoni kemudou kina ki na loma i Jerusalemi.

²⁰ Me vaka era sa kumuna vata na siliva, kei na parasa, kei na aironi, kei na uma, kei na tini, ki na loma ni lovo, me uvuca kina na kena bukawaqa, me vakawaicalataki; au na soqoni kemudou vakakina e na noqu cudru kei na noqu lesa, ka'u na qai biuti kemudou kina, ka vakawaicalataki kemudou.

²¹ Io, ka'u na vakasoqoni kemudou, ka uvuci kemudou e na bukawaqa ni noqu cudru, mo dou vakawaicalataki kina.

²² Me vaka sa vakawaicalataki na siliva e na loma ni lovo, dou na vakawaicalataki vakakina; ia dou na kila ni sai au ko Jiova ka sovaraka na noqu cudru vei kemudou.

²³ A sa yaco vei au na vosa i Jiova, ka vaka,

²⁴ Ko iko na luve ni tamata, mo kaya vei koya, Sai iko na vanua sa sega ni vakasavasavataki, se sa tau kina na uca e na siga ni cudru.

²⁵ Sa dua na nodra vere na parofita e loma ni koro, me vaka na laioni e tagi ni sa dresulaka na kena; era sa kania na yalo ni tamata; era sa taura nai yau kei na ka talei; era sa vakalevuqataka na kena yada.

²⁶ O ira na nona bete era sa vakacataka na noqu vunau, ka vakacacana na noqu ka tabu: era sa vakatautauvatataka na ka sa tabu kei na ka sa sega ni tabu; kei na ka sa sega ni savasava kei na ka sa savasava, ka ra sa tabonaka talega na matadra mai na noqu siga tabu, ia ka'u sa vosavakacacataki vei ira.

²⁷ O ira na kena turaga era sa vaka na wolifa e dresulaka na kedra, me ra vakadavea na dra, me vakarusa na yalo, me ia na veikoveraki.

²⁸ Ia ko ira na kena parofita era sa boroi ira e nai boro ca, ni ra sa raica na ka wale, ka ia na caka mana vakailasu vei ira, ka vaka, Sa kaya vakaoqo na Turaga ko Jiova, ia ko Jiova sa sega ni vosa kina.

²⁹ O ira na lewe ni vanua era sai valavala vakaukauwa, ka ia na veikoveraki, era sa vakararawataki ira talega na dravudravua kei na luveniyali: io, era sa vakasaurarataki ira na vulagi vakatawadodonu.

³⁰ Ia ka'u a qara vei ira e dua na tamata, me cakava na bai ni were, ka tu e na tiki ni bai e basuki me soro vei au e na vuku ni vanua, me'u kakua ni vakarusa: ia ka'u sega ni kunea e dua.

³¹ O koya oqo ka'u sa sovaraka kina vei ira na noqu cudru; ka'u sa vakarusai ira e na bukawaqa ni noqu cudru: ka'u sa sauma kivei ira na nodra i valavala, sa kaya na Turaga ko Jiova.