Isikeli 21 - Vakavakadewa Makawa

Sa ia na parofisai kei Jerusalemi ko Isikeli, ka sa qai vutugu me kenai vakatakilakila, 1-7. Ai seleiwau gata ka makamakalivata, 8-17, na kei Jerusalemi, 18-24, kei na kena matanitu, 25-27, kei na kedra na luve i Amoni, 28-32.

¹ A sa yaco tale vei au na vosa i Jiova, ka vaka,

² Ko iko na luve ni tamata, mo rai mada vaka ki Jerusalemi, ka vakatauca na nomu vosa ki na veiyasana tabu, ka parofisaitaka na ka ca ki na vanua ko Isireli,

³ ka kaya ki na vanua ko Isireli, Sa kaya vakaoqo ko Jiova; Raica, koi au na nomu meca, ka'u na ucuna na noqu i seleiwau mai na kena taga, ka muduki ira tani na yalododonu kei ira na tamata ca era tiko vei iko.

⁴ Ia ni'u na muduka tani vei iko na yalododonu kei na tamata ca, ena ucu kina na noqu i seleiwau mai na kena taga me taya na tamata kecega mai na mata ni ceva ka yacova na mata ni tokalau:

⁵ me ra kila na tamata kecega ni sai au ko Jiova ka'u sa ucuna na noqu i seleiwau mai na kena taga: ka na sega ni dara tale kina

⁶ Ia ko iko, na luve ni tamata, mo vutugu kina, me vaka sa ramusu na tolomu; ia mo vutugu e na rarawa e matadra.

⁷ Ia ni ra sa kaya vei iko, A cava ko sa vutugu kina? mo qai kaya, E na vuku ni dua nai rogorogo; ni sa voleka mai: ia ena waicala na loma ni tamata kecega, ka na wadamele na ligadra kecega, ka na ceguoca na yalodra kecega, ia ena vaka na wai na durudra kecega: raica, sa lako tiko mai, ka na vakayacori, sa kaya na Turaga ko Jiova.

⁸ Sa yaco tale vei au na vosa i Jiova, ka vaka,

⁹ Ko iko na luve ni tamata, mo parofisai mada, ka kaya, Sa vosa vakaoqo ko Jiova; Mo kaya, Ai seleiwau, ai seleiwau sa vagata tu, a sa soloti talega:

¹⁰ sa vagata tu me ia kina na veivakamatei vakaidina; sa soloti oti me sa makamakalivata: me marautaki li na kena kuita na luvequ, oqori sa beca na kau kecega?

¹¹ A sa solia ko koya me soloti, me sa tauri: a ka oqo sa vagatataki kina nai seleiwau, ka sa soloti, me soli ki na ligana na dauveivakamatei.

¹² Mo tagi ka qoqolou, ko iko na luve ni tamata: ni na tauci ira na noqu tamata, ena tauci ira kecega na turaga ni Isireli: ena tauci ira na noqu tamata na rerevaka nai seleiwau: o koya oqo mo lali dibi kina.

¹³ Ni sa qai yaco mai na veivakatovolei, ka na vakaevei kevaka ena beca talega na kuita? ena sega tale, sa kaya na Turaga ko Jiova.

¹⁴ Ia ko iko, na luve ni tamata, mo ia kina na parofisai, ka tavia vata na ligamu, ka me ia vakarua nai seleiwau ka vakatolu, na kedrai seleiwau na moku: sai koya oqo na kedrai seleiwau na turaga e moku, ena curu yani vei ira ki na nodra loqi.

¹⁵ Ka'u sa vaqara nai seleiwau rerevaki ki na nodra matamata-ni-koro kecega me waicala kina na lomadra, ka me vakalevutaki na kedra veivakarusai; io, sa makamakalivata mai, ka soloti tu me ia kina na veivakamatei:

¹⁶ mo lako vaka se vaka, ki nai matau se nai mawi, ki na yasana ga sa qara vakadodonu kina na matamu.

¹⁷ Ia koi au talega, ka'u na tavia vata na ligaqu, ka vakaotia mai na noqu cudru: koi au ko Jiova ka'u sa cavuta.

¹⁸ A sa yaco tale vei au na vosa i Jiova, ka vaka,

¹⁹ O iko talega, na luve ni tamata, mo lesia e rua na sala, me lako yani kina nai seleiwau i tui Papiloni: me dua bau ga na vanua me vu mai kina ruarua: ia mo lewa e dua na tikina, me sa tekivu kina na sala ki na koro:

²⁰ ia mo lesia e dua na sala, me yaco kina nai seleiwau ki Rapa na nodra koro na kawa i Amoni, kei Juta talega, mai Jerusalemi na koro vakabai.

²¹ Ni sa tu ko tui Papiloni e na basoga ni salatu, ni sa basoga rua, me ia mada na veidigidigiyaka: sa vakayavalata na gasau, sa taroga na matakau, sa dikeva na yate ni manumanu.

²² E na ligana i matau sa tu na madigi kei Jerusalemi, me lesi ira na turaga ni valu, me dalaga na gusudra ni sa ia na veivakamatei, me tabalaka na domo ni kaila, me viritura nai tukituki-ni-bai ki na matamata-ni-koro, me viria na suva, me tara na vale ni valu.

²³ Ia ena yaco me sa dua na madigi vakailasu vei ira era sa bubului oti: ia sa na vakananuma ga ko koya ki na nodra caka cala, me ra sa tauri.

²⁴ O koya oqo sa kaya kina na Turaga ko Jiova; Ni dou sa kitaka na nomudou caka cala me sa nanumi, ni sa vakavotui mai na nomudou talaidredre, ka sa kilai na nomudou i valavala ca e na nomudou cakacaka kecega; io e na vuku ni dou sa nanumi, dou na tauri kina e na liga.

²⁵ Ia ko iko, na turaga ni Isireli na tamata be ka ca, ka sa yaco na kemu siga, me tini kina na caka cala,

²⁶ sa kaya vakaoqo na Turaga ko Jiova; Mo luvata tani nai sala dina, ka kauta tani nai sala vakatui: ena sega ni koyakoya tiko: o koya sa vakasivoi, mo toroya cake, kei koya sa levu cake, mo vakasivoya.

²⁷ Au na vukica, io vukica, io vukica, ia ena segasega tale, ka me lako mada mai ko koya sa dodonu me nona; ia ka'u na solia vua.

²⁸ Ia ko iko, na luve ni tamata, mo ia na parofisai ka kaya, Sa kaya vakaoqo na Turaga ko Jiova e na vukudra na kawa i Amoni, kei na nodra veivakalialiai; ia mo kaya, Ai seleiwau, ai seleiwau sa ucu tu me ia na veivakamatei, sa soloti vakalevu sara me sa makamakalivata:

²⁹ ni ra raica tiko na ka wale me nomu, ni ra ia tiko na caka mana vakailasu me nomu, me ra vakabalei iko ki na domodra na moku, era tamata ca, ka sa yaco na kena siga, me tini kina na nodra caka cala.

³⁰ Me'u vakasuka li ki na kena taga? E na yasana ko a buli kina, io e na vanua ko a sucu kina, sai koya ga ka'u na lewai iko kina.

³¹ Ia ka'u na sovaraka vei iko na noqu cudru, ka'u na uvuci iko e na bukawaqa ni noqu cudru, ka soli iko ki na ligadra na dauvakacaca, era daukila na veivakarusai.

³² Ko na kena buka me bukani kina na bukawaqa; ia na kemu dra ena tu ga e na loma ni vanua; ko na sega ni nanumi tale: ni sai au ko Jiova ka'u sa cavuta.