Isikeli 20 - Vakavakadewa Makawa

Sa bese ni tarogi na Kalou vei ira na qase ni Isireli, 1-4. Sa tukuna na nodra talaidredre mai Ijipita, 5-9, kei na veikau, 10-26, kei na vanua, 27-32. Sa yalayala ko koya me vakasoqoni ira tale e na gauna ni Mesaia, 33-44. Sa vakatokai ko Jerusalemi me veikau, ka sa tukuni ni na vakamai, 45-49.

¹ A sa yaco e nai kavitu ni yabaki, e nai kalima ni vula, e nai katini ni siga ni vula, era sa lako mai eso na qase ni Isireli me tarogi Jiova, a ra sa mai tiko e mataqu.

² Sa qai yaco vei au na vosa i Jiova, ka vaka,

³ Ko iko na luve ni tamata, mo vosa vei ira na qase ni Isireli, ka kaya vei ira, Sa kaya vakaoqo na Turaga ko Jiova; Dou sa lako mai me tarogi au, ne? Me vaka na dina ni noqu bula, sa kaya na Turaga ko Jiova, au na sega ni tarogi vei kemudou.

⁴ O na sega li ni lewai ira, o na sega li ni lewai ira, ko iko na luve ni tamata? mo vakatakila vei ira nai valavala vakasisila ni nodra qase:

⁵ ka kaya vei ira, Sa vosa vakaoqo na Turaga ko Jiova; E na siga ka'u a digitaki ira kina na Isireli, ka dulaka cake na ligaqu e na vukudra na kawa i Jekope, ka vakatakilai au vei ira e na vanua ko Ijipita, ni'u a dulaka cake na ligaqu vei ira, ka kaya, Oi au ko Jiova na nomudou Kalou;

⁶ e na siga ka'u a dulaka cake kina na ligaqu vei ira, me'u kauti ira tani mai na vanua ko Ijipita ki na dua na vanua ka'u a vakaraica me nodra, sa dave kina na wai-ni-sucu kei na oni, na vanua ka uasivi cake e na veivanua kecega:

⁷ au a qai kaya vei ira, Mo dou dui biuta tani na ka vakasisila ni matamudou, ia mo dou kakua ni vakadukadukalitaki kemudou e na matakau ni Ijipita: koi au ko Jiova na nomudou Kalou.

⁸ Ia era sa talaidredre vei au, ka ra bese ni vakarorogo vei au: era sa sega ni dui biuta tani na ka vakasisila ni matadra, ka ra sa sega ni biuta na matakau ni Ijipita: au a qai kaya, Au na sovaraka na noqu cudru vei ira, me'u vakayacora na noqu cudru vei ira e loma ni vanua ko Ijipita.

⁹ Ia ka'u a cakacaka ga e na vuku ni yacaqu, me kakua ni vakacacani e matadra na veimatanitu, era sa tiko kina kei ira, ka'u a vakatakilai au vei ira e matadra, ni'u a kauti ira tani mai na vanua ko Ijipita.

¹⁰ Ia ka'u a kauti ira tani mai na vanua ko Ijipita, ka kauti ira ki na vanua liwa lala.

¹¹ Au a solia talega vei ira na noqu vunau, ka vakatakila vei ira na noqu lewa, o koya ke cakava e dua na tamata, ena bula kina.

¹² Ia ka'u a solia talega vei ira na noqu siga tabu, me noqu i vakatakilakila vei ira, me ra kila ni sai au ko Jiova ka vakatabui ira.

¹³ Ia sa talaidredre vei au na mataqali ni Isireli mai na vanua liwa lala; ka ra sega ni muria na noqu vunau, ka ra sa beca na noqu lewa, o koya ke cakava e dua na tamata, ena bula kina; ia na noqu siga tabu era sa vakacacana sara: au a qai kaya, Au na sovaraka na noqu cudru vei ira e na vanua liwa lala, me'u vakarusai ira.

¹⁴ Ia ka'u a cakacaka ga e na vuku ni yacaqu, me kakua ni vakacacani e matadra na veimatanitu, ka'u a kauti ira tani mai e matadra.

¹⁵ Ia koi au, ka'u a dulaka cake talega na ligaqu vei ira mai na vanua liwa lala, me'u kakua ni kauti ira ki na vanua ka'u a solia, ka sa dave kina na wai-ni-sucu kei na oni, oqori sa uasivi cake ki na veivanua kecega:

¹⁶ ka ni ra sa beca na noqu lewa, ka ra sega ni muria na noqu vunau, ka ra vakacacana na noqu siga tabu: ia e na lomadra era sa goleva na nodra matakau.

¹⁷ Ia ka sa vosoti ira na mataqu me'u kakua ni vakarusai ira, ka'u a sega kina ni vakaoti ira mai na vanua liwa lala.

¹⁸ Ia ka'u a kaya vei ira na luvedra e na vanua liwa lala, Mo dou kakua ni muria na nodra vunau na nomudou qase, kakua ni vakabauta na nodra lewa, kakua talega ni vakadukadukalitaki kemudou e na nodra matakau:

¹⁹ oi au ko Jiova na nomudou Kalou; mo dou muria na noqu vunau, mo dou vakabauta na noqu lewa ka cakava;

²⁰ mo dou vakatabuya na noqu siga tabu; ia oqo sa na noqu i vakatakilakila vei kemudou, mo dou kila ni sai au ko Jiova na nomudou Kalou.

²¹ Ia ka sa talaidredre vei au ko ira na luvedra: ka ra sega ni muria na noqu vunau, ka ra sega ni vakabauta na noqu lewa, me ra cakava, ia ke sa cakava e dua na tamata, ena bula kina; era sa vakacacana talega na noqu siga tabu; au a qai kaya, Au na sovaraka na noqu cudru vei ira, me'u vakayacora na noqu cudru vei ira e na vanua liwa lala.

²² Ia ka'u a tarova na ligaqu, ka cakacaka e na vuku ni yacaqu, me sa kakua ni vakacacani e matadra na veimatanitu tani, ia ka'u a kauti ira tani mai e matadra.

²³ Au a dulaka cake talega na ligaqu vei ira e na vanua liwa lala, me'u dui vakasevi ira ki na veimatanitu tani, ka duibiubiuti ira ki na veivanua;

²⁴ ka ni ra sega ni muria na noqu lewa, ka ra sa beca na noqu vunau, ka ra vakacacana na noqu siga tabu, ka sa goleva na matakau ni nodra qase na matadra.

²⁵ O koya oqo ka'u a solia kina vei ira na vunau e sega ni vinaka, kei na lewa era na sega ni bula kina;

²⁶ ia ka'u a vakacacani ira e na nodra i solisoli, ni ra sa vakacabora kecega na ulumatua e loma ni bukawaqa, me'u vakacacani ira, me ra kila kina ni sai au ko Jiova.

²⁷ O koya oqo ko iko na luve ni tamata, mo vosa kina, vei ira na mataqali i Isireli, ka kaya vei ira, Sa vosa vakaoqo na Turaga ko Jiova; A ka talega oqo era sa vosavakacacataki au kina ko ira na nomudou qase, ni ra sa talaidredre vakalevu vei au.

²⁸ Ia ni'u a kauti ira ki na vanua, ka'u a dulaka cake kina na ligaqu me'u solia vei ira, era sa qai raica na veiulu-ni-koro cecere kecega, kei na kau rugurugua kecega, a ra vakacabora maikea na nodra i soro, kei na nodra i madrali talega sa ka ni veivakacudrui: ka ra sa tauca maikea na nodra ka boi vinaka, ka sova maikea na nodra i sevu.

²⁹ Au a qai kaya vei ira, A cava na yasana cecere oqo dou sa lakova? Ka sa vakatokai na yacana Ko Pama ka yacova na siga oqo.

³⁰ O koya oqo mo kaya kina ki na mataqali i Isireli, Sa kaya vakaoqo na Turaga ko Jiova; Dou sa vakadukadukalitaki talega e na nodra i valavala na nomudou qase, ne? ka dou sa ia talega na veibutakoci ka muria na nodra ka vakasisila, ne?

³¹ Ka ni dou sa cabora na nomudou i solisoli, ni dou vakacabori ira na luvemudou e loma ni bukawaqa, dou sa vakadukadukalitaki e na nomudou matakau kecega, ka yacova sara na siga oqo: ia me'u tarogi li koi au vei kemudou, na mataqali i Isireli? Me vaka na dina ni noqu bula, sa kaya na Turaga ko Jiova, au na sega ni tarogi vei kemudou.

³² Ia na ka sa tubu e na lomamudou ena sega sara ni yaco, ni dou sa kaya, Keimami na vakataki ira na lewe ni veimatanitu tani, kei na veimataqali ni veivanua me keimami qarava na kau kei na vatu.

³³ Me vaka na dina ni noqu bula, sa kaya na Turaga ko Jiova, e dina kau na lewai kemudou e na liga kaukauwa, kei na liga sa dodo yani, kei na cudru sa sovaraki:

³⁴ ia ka'u na kauti kemudou tani mai na veimataqali, ka vakasoqoni kemudou mai na veivanua dou sa dui vakasevi kina, e na ligaqu kaukauwa, kei na ligaqu sa dodo yani, kei na cudru sa sovaraki.

³⁵ Ia ka'u na kauti kemudou ki na veikau ni veimataqali, ka ia na veilewai kei kemudou maikea ni da veirai mata.

³⁶ Me vaka ka'u a ia na veilewai kei ira na nomudou qase e na vanua liwa lala mai na vanua ko Ijipita, ka'u na ia vakakina na veilewai kei kemudou, sa kaya na Turaga ko Jiova.

³⁷ Ia ka'u na vakalakovi kemudou e ruku ni titoko, ka kauti kemudou mai mo dou vauci e na veiyalayalati:

³⁸ ia ka'u na wasei ira tani maivei kemudou ko ira na dauvuki, kei ira sa talaidredre vei au: ia ka'u na kauti ira tani mai na vanua era sa dui tiko vulagi kina, ka ra na sega ni curuma na nodra vanua na Isireli: ia dou na kila ni sai au ko Jiova.

³⁹ Ia vei kemudou, na mataqali ni Isireli, sa kaya vakaoqo na Turaga ko Jiova; Dou dui la'ki qarava yadua na nona matakau, ka ia emuri talega, kevaka dou na sega ni vakarorogo vei au: ia na yacaqu tabu dou kakua ni vakacacana tale e na nomudou i solisoli, kei na nomudou matakau.

⁴⁰ Ia sa kaya na Turaga ko Jiova era na qaravi au ko ira kece na mataqali ni Isireli mai na noqu ulu-ni-vanua tabu mai na ulu-ni-vanua cecere ni Isireli, kei ira kece talega na lewe ni vanua: ka'u na vinakati ira maikea, ka'u na taroga talega maikea na nomudou i madrali, kei nai sevu ni nomudou i cabocabo, kei na nomudou ka tabu kecega.

⁴¹ Ka'u na vinakati kemudou e na nomudou i madrali boi vinaka, ni'u na kauti kemudou maivei ira na veimataqali, ka vakasoqoni kemudou mai na veivanua dou a dui vakasevi kina; ia ka'u na vakarokorokotaki vei kemudou e matadra na veimatanitu tani.

⁴² Ia dou na kila ni sai au ko Jiova, ni'u na kauti kemudou ki na vanua ni Isireli, ki na vanua ka'u a dulaka cake kina na ligaqu me'u solia vei ira na nomudou qase.

⁴³ Ia dou na nanuma maikea na nomudou i valavala, kei na nomudou cakacaka kecega, dou sa vakadukadukalitaki kina; ia dou na beci kemudou vakataki kemudou e na vuku ni nomudou ca kecega dou sa kitaka.

⁴⁴ Ia dou na kila ni sai au ko Jiova, ni'u sa qai cakacaka vei kemudou e na vuku ni yacaqu, ka sega ni vaka na nomudou i tovo ca, kei na nomudou i valavala velavela, oi kemudou na mataqali i Isireli, sa kaya na Turaga ko Jiova.

⁴⁵ A sa yaco tale vei au na vosa i Jiova, ka vaka,

⁴⁶ Ko iko na luve ni tamata, mo rai mada vaka ki na mata ni ceva, ka vakatauca na nomu vosa ki na ceva, ka parofisaitaka na ka ca ki na veikau mai na vanua vakaceva;

⁴⁷ ka kaya ki na veikau mai na ceva, Mo rogoca na vosa i Jiova; Sa kaya vakaoqo na Turaga ko Jiova; Raica, au na tutuvaka na buka vei iko, ia ena kama kina na nomu kau bulabula kecega, kei na kau malai kecega sa tu vei iko, ena sega ni bokoci na yameyame ni bukawaqa, ia ena kama kina na matadra kecega mai na ceva ka yacova na tokalau.

⁴⁸ Ka ra na raica na tamata kecega ni sai au ko Jiova ka tutuvaka: ka na sega talega ni bokoci.

⁴⁹ Au a qai kaya, Ulei Turaga Jiova! era sa vosataki au, ka kaya, Sa vosa e na vosa vakatautauvata ko koya oqo se segai?