Isikeli 18 - Vakavakadewa Makawa

Sa vunauca na Kalou na tamata era sa cavuta na vosa vakatautauvata ni vua-ni-vaini wiwi, 1,2. Sa tukuna ko koya na nonai valavala vua na tamata yalododonu, 3-9; vua na gone ca ni tamata yalododonu, 10-13; vua na gone yalododonu ni tamata ca, 14-18; vua na tamata sa qai veivutuni, 19-23; vua talega na tamata yalododonu ni sa vuki tani tale, 24. Sa tukuna ni sa dodonu na nonai valavala, 25-28. Sa vunauci ira me ra veivutuni, 29-32.

¹ Sa yaco tale vei au na vosa i Jiova, ka vaka,

² A cava dou sa taura kina na vosa vakaibalebale oqo, e na vuku i Isireli ka kaya, O ira na qase era sa kania na vua-ni-vaini, ia na batidra na luvedra sa mucu kina?

³ Sa kaya na Turaga ko Jiova, me vaka na dina ni noqu bula, ena sega tale na ka mo dou taura kina na vosa vakaibalebale oqo e Isireli,

⁴ Raica, sa noqu na yalo kecega: na yalo ni qase, kei na yalo ni luvena, sa noqu ga: ia na yalo ga sai valavala ca ena mate.

⁵ Ia kevaka sa yalododonu e dua na tamata, ka sa cakava na ka sa dodonu ka vinaka,

⁶ ka sega ni kana e na veiulu-ni-vanua, se ta cake ki na nodra matakau na mataqali i Isireli, se vakacacana na wati ni kai nona, se torova e dua na yalewa sa tauva na nona mate vakavula,

⁷ ka sega ni vakasaurarataka e dua, ka sa vakasuka na kenai vakadinadina vua sa kerea e dua na ka, ka sega ni koveraka e dua, sa soli kakana vua sa viakana, ka sa vakaisulutaki koya sa luvawale;

⁸ sa sega ni soli ka me saumi vakatawadodonu kina, ka sa sega ni taura na kenai kere, ka sa tarova na ligana mai na caka cala, ka sa lewa vakadodonu vei ira na tamata,

⁹ sa muria na noqu vunau ko koya, ka sa vakabauta na noqu lewa, me ia na cakacaka dina; sa qai tamata yalododonu ko koya, sa na bula vakaidina ga, sa kaya na Turaga ko Jiova.

¹⁰ Kevaka ena sucu e dua na luvena tagane sa dauvakacaca, se daulaba, se cakava e dua na ka vakaoqo,

¹¹ ka sa sega ni cakava ko koya e dua na ka dodonu ko ya, ia ka sa kana e na veiulu-ni-vanua, ka vakacacana na wati ni kai nona,

¹² ka vakasaurarataka na dravudravua kei na luveniyali, ka ia na dauveikoveraki, ka sa sega ni vakasuka na kenai vakadinadina, ia sa ta cake ki na matakau ka sa cakava ga na ka vakasisila,

¹³ ka solia nai yau me saumi vakatawadodonu, ka sa taura ga na kenai kere: ena bula li ko koya? ena sega ni bula: sa cakava na ka vakasisila kecega oqo; ena mate vakaidina ko koya: ena baleti koya ga na nona mate.

¹⁴ Ka raica, kevaka ena sucu e dua na luvena tagane, ka sa raica kecega nai valavala ca sa cakava ko tamana, ka sa veinanuyaka, ka sega ni cakava na ka e vakakina,

¹⁵ ka sa sega ni kana e na veiulu-ni-vanua, se ta cake ki na nodra matakau na mataqali i Isireli, se vakacacana na wati ni kai nona,

¹⁶ se vakasaurarataka e dua, se bureitaka nai vakadinadina, se ia na dauveikoveraki, sa soli kakana vua sa viakana, ka vakaisulutaki koya sa luvawale,

¹⁷ sa tarova na ligana mai vua sa dravudravua, sa sega ni taura nai voli ni ka e kerei kei nai yau e tubu kina; sa cakava ga na noqu lewa, ka sa muria na noqu vunau; ena sega ni mate ko koya oqo e na vuku ni caka cala i tamana, ena bula vakaidina ko koya.

¹⁸ Ia na tamana, ni sa dauia na veivakasaurarataki, ka daukoveraka na wekana, ka sa cakava na ka sa sega ni vinaka e na kedra maliwa na kai nona, raica, ena mate ga ko koya e na nona caka cala.

¹⁹ Ia ka dou sa kaya, Sa vakaevei? sa sega ni cudruvi li na gone e na vuku ni caka cala ni tamana? Ke cakava na luvena na ka sa dodonu ka vinaka, ka vakabauta kecega na noqu vunau, ka cakava, sa na bula vakaidina ga ko koya.

²⁰ Na yalo sai valavala ca, ena mate ga, Ena sega ni cudruvi na gone e na caka cala i tamana, a tamana talega ena sega ni cudruvi e na caka cala ni luvena: a nona caka dodonu na yalododonu ena tu ga vua, kei na nona ca na tamata ca ena tu ga vua.

²¹ Ia kevaka ena saumaki mai na tamata ca mai na nonai valavala ca kecega sa kitaka, ka vakabauta kecega na noqu vunau, ka cakava na ka sa dodonu ka vinaka, ena bula vakaidina ko koya, ena sega ni mate.

²² Na nona talaidredre kecega ena sega ni cavuti vua: ena bula ga ko koya e na nonai valavala dodonu.

²³ Me'u vinakata vakalailai na nona mate na tamata ca, sa kaya na Turaga ko Jiova: au sega beka ni vinakata cake ni sa saumaki ko koya mai na nona sala ca, ka me bula?

²⁴ Ia ni sa suka tani na tamata yalododonu, mai na nona caka dodonu, ka kitaka na ka ca, ka cakava me vaka nai valavala vakasisila kecega sa cakava na tamata ca, ena bula li ko koya? A nonai valavala dodonu kece sa cakava oti ena sega ni nanumi tale: na nona talaidredre sa talaidredre kina, kei na nonai valavala ca sai valavala ca kina, ena mate ga kina ko koya.

²⁵ Ia dou sa kaya, Sa sega ni dodonu na lewa ni Turaga. Dou rogoca mada, na mataqali i Isireli; Sa sega li ni dodonu na noqu lewa? sa sega beka ni tawa dodonu na nomudou lewa?

²⁶ Ni sa vuki na tamata yalododonu mai na nona caka dodonu, ka la'ki cakava na ka ca, ka qai mate; ena mate e na vuku ni nona ca sa cakava.

²⁷ Ia, ni sa saumaki mai na tamata ca mai na nona ca sa kitaka, ka cakava na ka sa dodonu ka vinaka, ena vakabula na yalona ko koya:

²⁸ ni sa vakananuma, ka saumaki mai na nonai valavala ca kecega, ena bula vakaidina ko koya, ena sega ni mate.

²⁹ Ia ka sa kaya tiko na mataqali i Isireli, Sa sega ni dodonu na lewa ni Turaga. Sa sega li ni dodonu na noqu i valavala, oi kemudou na mataqali i Isireli? Sa sega beka ni tawa dodonu na nomudou lewa?

³⁰ O koya oqo ka'u na lewai kemudou yadua kina, na mataqali i Isireli, me vaka na nomudou i valavala yadua, sa kaya na Turaga ko Jiova. Dou veivutuni, ka saumaki mada mai na nomudou i valavala ca kecega; ena qai sega ni vu ni nomudou rusa na caka ca.

³¹ Dou biuta tani vei kemudou na nomudou i valavala ca kecega, dou sa daucala kina; ka vakavouya na lomamudou kei na yalomudou: a cava dou via mate kina oi kemudou na mataqali i Isireli?

³² Ni'u sa sega ni vinakata na nona mate e dua na tamata sa mate, sa kaya na Turaga ko Jiova: o koya oqo mo dou saumaki mada mai, mo dou bula.