Isikeli 17 - Vakavakadewa Makawa

A vosa vakatautauvata ni ikeli e rua kei na vaini, 1-10, sa vakatakilai kina na ca me yacovi Jerusalemi ni sa vuki tani mai Papiloni ki Ijipita, 11-21. Sa yalayala na Kalou me tea e dua na vu ni sitari dina sara, 22-24.

¹ A sa yaco vei au na vosa i Jiova, ka vaka,

² Ko iko na luve ni tamata, mo cavuta yani e dua na vosa vakaibalebale, ka tukuna e dua na vosa vakatautauvata ki na mataqali i Isireli;

³ ka kaya, Sa vosa vakaoqo na Turaga ko Jiova; E dua na ikeli levu, ka vakatabana lelevu, ka vakatabana balavu, ka ka levu na lawena, ka veivolavolai, sa lako mai ki Lepanoni, ka kauta tani na vuso ni dua na taba ni sitari:

⁴ sa cova ko koya na ulu ni tabana lalai, ka kauta ki na dua na vanua dauveivoli; ka sa tea ko koya e na dua na koro ni tamata dauveivoli.

⁵ Sa kauta talega eso na sore ni kau ni vanua, ka tea e na dua na were bulabula; sa kauta ko koya ki na bati ni wai levu, ka tea me vaka na vu ni wilou.

⁶ A sa tubu, ka yaco me vaini leka e dautete yani, sa golevi koya na ikeli na kena tubucoke, ia na wakana, sa tu e rukuna: ka sa yaco me vaini, ka vakatabana mai, ka tubu na tabana lalai.

⁷ Ka sa qai dua tale na ikeli levu, ka vakatabana lelevu, ka levu na lawena: ka raica, na vaini oqo sa vaqara yani na wakana vua, ia na tabana sa sala yani vua, me vakasuasuataka ko koya e na tova ni nonai teitei:

⁸ sa tei e na qele vinaka e na bati ni wai levu, me tubu na tabana, ka vuataka na vuana, me sa vaini vinaka.

⁹ Mo kaya, Sa vosa vakaoqo na Turaga ko Jiova; Ena tubu vinaka tiko li? ena sega beka ni cavuta na wakana ko koya, ka cebeta na vuana, me malai? ena malai ga na drauna kece e qai tubu, ia ka sega e na vuku ni kaukauwa levu se na kedra lewe levu na tamata e rawa kina na kenai cavuivuvu.

¹⁰ Ia raica, ni sa tei, ena tubu vinaka tiko li? ni sa qai liwavi koya na cagi mai na tu-i-cake, ena sega beka ni malai sara yani? ena malai ga e na tova ka tubu kina.

¹¹ Ia sa yaco vei au na vosa i Jiova, ka vaka,

¹² Mo kaya mada ki na mataqali dautalaidredre, Dou sa kila se segai, nai balebale ni ka oqo? mo tukuna vei ira, Raica, sa lako mai ki Jerusalemi ko tui Papiloni, ka sa tauri koya na kena tui, kei ira na kena turaga, ka kauti ira vata kaya ki Papiloni;

¹³ ka sa kauta e dua vei ira na kawa ni tui, ka ia na veiyalayalati kaya, ka sa vakabubuluitaki koya: ka sa kauti ira talega na qaqa ni vanua:

¹⁴ me sa matanitu kaisi mai, me kakua ni vueti cake, ia me sa vakabau ga na nona veiyalayalati me sa dei kina:

¹⁵ ia sa vuki tani vua ko koya ni sa talai ira na nona mata ki Ijipita, me ra solia vua na ose ka lewe vuqa talega na tamata. Sa na vakayacori li ko koya? sa na bula beka ko koya sa cakava na ka vakaoqo? Se me vakacacataka li na veiyalayalati, ka bula ga?

¹⁶ Sa kaya na Turaga ko Jiova, me vaka na dina ni noqu bula, e na yasana dina ga ni tui ka buli koya me tui, ka sa beca na nona bubului, ka sa vakacacana na nona veiyalayalati, ni sa tiko ko koya e na loma i Papiloni ena mate ga.

¹⁷ Ena sega talega ni yaga vua ko Fero, kei na nonai valu kaukauwa kei na nonai vavakoso levu, ni ra viri suva, ka tara na vale ni valu, me muduka laivi kina na tamata e lewe vuqa:

¹⁸ ni sa beca ko koya na bubului e na nona vakacacataka na veiyalayalati, io, ni sa solia oti na ligana, ka cakava na ka kece oqo, ena sega ni bula ko koya.

¹⁹ O koya oqo sa kaya kina na Turaga ko Jiova; Me vaka na dina ni noqu bula, ni sa beca ko koya na noqu bubului ko ya, ka sa vakacacataka na noqu veiyalayalati ko ya, ka'u na sauma dina ga vua.

²⁰ Ia ka'u na tevuka vua na noqu lawa, ena coriti talega e na noqu i cori, ia ka'u na kauti koya ki Papiloni, ka ia na veilewai kaya maikea e na vuku ni nona lasu sa lasu kina vei au.

²¹ Ia ko ira kecega era dro vata kaya kei ira kecega na nonai valu era na mate e nai seleiwau, ia ko ira sa vo era na dui vakasevi ki na mata ni cagi kecega: ia dou na kila ni sai au ko Jiova ka'u sa cavuta.

²² Sa kaya vakaoqo na Turaga ko Jiova; Koi au ka'u na kauta na vuso ni sitari cecere, ka tea; ka'u na cova mai na ulu ni tabana lalai e dua sa malumalumu, ia ka'u na tea e na dua na ulu-ni-vanua cecere ka rewa-i-cake:

²³ ia ka'u na tea e na ulu-ni-vanua cecere nei Isireli: ka na tubu cake na tabana, ka vuataka na vuana, me sa vu ni sitari vinaka sara: ena tiko talega e rukuna na yavusa manumanu vuka kecega; ka ra na tiko ga e na rurugu ni tabana.

²⁴ Ka ra na kila kecega na kau ni vanua ni sai au ko Jiova ka'u sa vakabalea na vu ni kau cecere, ka vakalevulevuya na vu ni kau lekaleka, ka vakamalaitaka na kau bulabula, ka vakabulabulataka na kau malai: koi au ko Jiova ka'u sa cavuta ka'u sa cakava talega.