Isikeli 16 - Vakavakadewa Makawa

Sa tukuni e na vosa vakatautauvata na nodra i tubutubu ca na kai Jerusalemi, 1-5, kei na loloma ni Kalou vei ira, 6-14, kei na nodra vuki ki na kalou lasu kei nai valavala ca, 15-34, kei na nodra cudruvi vakalevu, 35-43, ni sa uasivi cake na nodra i valavala ca, 44-59. Era na lomani tale emuri, 60-63.

¹ Sa yaco tale vei au na vosa i Jiova, ka vaka,

² Ko iko na luve ni tamata, mo vakatakila ki Jerusalemi na kenai valavala vakasisila,

³ ka vaka, Sa kaya vakaoqo na Turaga ko Jiova ki Jerusalemi; A nomu i tubutubu kei na nomu sucu sa vu mai na vanua ko Kenani; na tamamu na Amoraiti, ia na tinamu na Itaiti.

⁴ Ia e na vuku ni nomu sucu, e na siga ko a sucu kina sa sega ni druti na nomu vicovico, ko a sega talega ni vui e na wai mo savasava, o sa sega talega ni caka e na masima, sa sega talega ni viviraki vei iko nai sulu ni gone.

⁵ Sa sega e dua sa lomani iko, me cakava vei iko e dua na ka vakaoqo, me sa yalovinaka vei iko; ia ko a biu tani ga ki nai bili ni koro e na siga ko a sucu kina ni ko sa vakasisilataki.

⁶ Ia ni'u a lako voli yani vei iko, ka raici iko ni ko sa moqe tu e na nomu dra, ka'u a kaya vei iko ni ko sa davo e na nomu dra, Mo bula; io ka'u a kaya vei iko ni ko sa davo e na nomu dra, Mo bula.

⁷ Au a vakalewevuqataki iko mo vaka na buroro ni vanua, ia ko sa tubu cake me levu mai, ka sa vakaiukuukutaki vakaidina; a sucumu sa levu vinaka mai, kei na drau ni ulumu sa tubu sara, ia ko a luvawale ga ka sega ni vakaisulu.

⁸ Ia ni'u a lako voli yani ka raici iko, sa qai nomu gauna na gauna mo lomani kina; ia ka'u a tevuka yani vei iko na noqu i tutuvi ka vakaisulutaki iko: io, ka'u a bubului vei iko, ka ia na veiyalayalati kei iko, sa kaya na Turaga ko Jiova, ia ko a yaco mo noqu.

⁹ Au a qai silimi iko e na wai; ia ka'u a sava tani vei iko na nomu dra, ka lumuti iko e nai lumu;

¹⁰ ka vakaisulutaki iko e nai sulu veivolavolai, ka vakaivavataki iko e na kuli ni babale, ka vauca vei iko na lineni matailalai, ka puloutaki iko e na pulou silika;

¹¹ au a vakaiukuukutaki iko talega, ka daramaka na qato ki na ligamu, ka vakaitaubetaki iko e na sinucodo;

¹² ka vakaiukuukutaki iko e na mama ni ucu, kei na mama ni daligamu, ka vakaisalataki iko e nai sala lagilagi.

¹³ Ia ko a vakaiukuukutaki e na koula kei na siliva; ia na nomu i sulu na lineni matailalai, kei na silika kei nai sulu veivolavolai; a kemu na madrai droka vinaka, kei na oni, kei na lolo, ia ko sa matavinaka sara mai, ka ko sa yaco talega mo matanitu.

¹⁴ Ka sa rogo yani na yacamu ki na veimatanitu tani e na vuku ni nomu matavinaka: ni ko sa lagilagi sara e na vuku ni noqu i ukuuku, ka'u a solia vei iko, sa kaya na Turaga ko Jiova.

¹⁵ Ia ko a vakararavi ga e na nomu matavinaka, ka sa ia na dautagane e na vuku ni kemui rogorogo, ka sa ia vakalevu na nomu dautagane kei ira kecega era sa lako voli yani, ko sa dui nodra yadua ga.

¹⁶ Ia ko a kauta eso na nomu i sulu, ka cakava na nomu veiyasana cecere e na ka e veivolavolai, ka sa ia kina na dautagane: sa sega na ka me vakakina, ena segasega talega.

¹⁷ Ia ko a kauta na nomu i yaya vakaiukuuku, na noqu koula kei na noqu siliva, ka'u a solia vei iko, ka sa cakava kina na nomu i vakatakarakara ni tagane, ka ia kaya na dautagane,

¹⁸ ka sa kauta na nomu i sulu veivolavolai, ka vakaisulutaki ira: ia ko sa tauca e matadra na noqu waiwai kei na noqu ka boi vinaka:

¹⁹ a noqu kakana talega ka'u a solia vei iko, na madrai droka vinaka, kei na lolo, kei na oni, ka'u a vakani iko kina, ko sa tauca tale e matadra me ka boi vinaka: io sa vaka ga kina, sa kaya na Turaga ko Jiova.

²⁰ Ia ko a kauta talega na luvemu tagane kei na luvemu yalewa, o ira ko a vakasucuma vei au, ka sa vakacabora vei ira me ra kania. Sa ka lailai beka na nomu dautagane,

²¹ mo kuria ni ko sa vakamatei ira talega na luvequ, ka soli ira me ra vakacabori e loma ni buka waqa me nodra?

²² Ia e na nomu i valavala vakasisila kecega kei na nomu dautagane ko sa sega ni nanuma na gauna ko a gone kina, ka ko sa luvawale ka sega ni vakaisulu, ka moqe tu e na nomu dra.

²³ Ka sa yaco ni sa caka oti na nomu i valavala ca kecega, (ena ca, ena ca ko iko! sa kaya na Turaga ko Jiova;)

²⁴ ko sa qai tara na nomu bure cecere, ka cakava na nomu yasana cecere e na saqata ni koro kecega.

²⁵ E na mua ni sala kecega ko sa tara na nomu yasana cecere, ka vakasisilataka na nomu matavinaka me cati, ka vakarawarawataka na yavamu vei ira yadua sa lako voli yani, ka vakalevutaka na nomu dautagane.

²⁶ Ia ko a ia na dautagane kei ira na kai Ijipita na wekamu yagolevu; ka sa vakalevutaka na nomu dautagane, mo vakacudrui au.

²⁷ Ia raica, au a dodoka yani kina na ligaqu vei iko, ka vakalailaitaka na kemu kakana, ka soli iko ki na nodra veitalia na goneyalewa ni Filisitia era cati iko, ko ira ka maduataka sara na nomu i valavala ca.

²⁸ O sa ia talega na dautagane kei ira na kai Asiria, ni ko a sega ni mamau rawa; io, ko sa ia na dautagane kei ira, ka sega ga ni ko mamau kina.

²⁹ Ia ko sa vakalevutaka na nomu dautagane e na vanua ko Kenani ka yacovi Kalitia; ka sega talega ni ko mamau kina.

³⁰ Ko sa yalowai vakaidina, sa kaya na Turaga ko Jiova, ka ni ko sa cakava na ka kece oqo, sai valavala ni yalewa dautagane e yalolevu;

³¹ ni ko sa tara na nomu bure cecere e na mua ni sala kecega, ka cakava na nomu yasana cecere e na saqata ni koro kecega; ia ko a sega ni vakataki ira na yalewa dautagane, ka ni ko sa beca ga nai solisoli;

³² me vakataki koya ga na yalewa dauveibutakoci sa vakabauta na kai tani mei sosomi ni watina!

³³ Era sa dausolia nai solisoli vei ira kecega na dautagane: ia ko iko, ko sa solia na nomu i solisoli vei ira kecega na nomu i tau, ka voli ira, me ra lako mai vei iko mai na veiyasana kecega me ra ia na veibutakoci kei iko.

³⁴ Ka sa dua tani ko iko e na nomu dautagane, ka dua tani ko ira na yalewa tani, ni sa sega e dua sa muri iko me ia na veibutakoci: ni ko sa solia nai solisoli, ia nai solisoli sa sega ni soli vei iko, oqo ko sa cakacaka vakatani kina.

³⁵ O koya oqo, ko iko na dautagane, mo rogoca kina na vosa i Jiova:

³⁶ Sa kaya vakaoqo na Turaga ko Jiova; Ni ko sa vakalevutaka na nomu ka velavela, ka vakaraitaka na nomu luvawale e na nomu dautagane kei ira na nomu i tau, kei na nomu matakau kecega ko sa vakasisila kina, e na vuku talega ni kedra dra na luvemu, ko a solia vei ira;

³⁷ raica, au na vakasoqoni ira kece kina na nomu i tau, dou a veitau kei ira, kei ira kece ko sa lomana, kei ira kece vata talega ko sa cata; io, ka'u na vakasoqoni ira vakaca vei iko mai na veiyasana, ka vakavotuya vei ira na nomu luvawale, me ra kunea kecega na nomu luvawale.

³⁸ Ia ka'u na lewai iko me vaka era lewai ko ira era dautagane ka vakadave dra; ka'u na vakayacora vei iko na dra ni cudru kei na vuvu:

³⁹ ka'u na soli iko talega ki na ligadra, ka ra na talaraka sobu na nomu bure cecere, ka basuka sobu na nomu veiyasana cecere: ka ra na luvata tani vei iko na nomu i sulu, ka kauta tani na nomu i yaya vakaiukuuku, ka biuti iko mo luvawale tu ka sega ni vakaisulu:

⁴⁰ ka ra na kauta cake mai na kemui valu, ka ra na vakaviriki iko e na vatu, ka laubasikataki iko e na nodra i seleiwau:

⁴¹ ka ra na vakama na nomu veivale e na bukawaqa, ka cudruvi iko e matadra na yalewa e lewe vuqa: ia ka'u na vakaotia sara na nomu dautagane, ia ko na sega tale ni solia nai solisoli.

⁴² Ia ena vakamalumutaki kina na noqu cudru vei iko, ena mudu talega vei iko na noqu vuvu, ia ka'u na cegu, ka sega ni cudru tale.

⁴³ Ni ko sa sega ni vakananuma na gauna ko a gone kina, ka sa vakararawataki au tikoga e na ka kece oqo; raica, koi au ka'u na sauma talega kina na nomu i valavala ki na ulumu, sa kaya na Turaga ko Jiova: ia ko na sega ni cakava tiko na ca oqo mei kuri ni nomu i valavala vakasisila kecega.

⁴⁴ Raica, o ira kece era taurivaka nai bole era na taurivaka na kemui bole oqo, ka kaya, Sa tautauvata ga koi rau na veitinani yalewa.

⁴⁵ Sai iko na luve i tinamu, ka sa cata na watina kei na luvena; sai iko talega dou veitacini kei tacimu, era sa cata na watidra kei na luvedra: sa tinamu na Itaiti, a tamamu na Amoraiti.

⁴⁶ Sa tuakamu talega ko Samaria, ko koya kei na luvena yalewa era tiko ki na nomu i mawi: ia ko Sotoma kei ira na luvena yalewa ka tiko ki na nomu i matau sa tacimu.

⁴⁷ Ia ko a sega ni muria na nodra i valavala, se cakava me vaka na nodra i valavala vakasisila: ia ni vaka sa ka lailai ga ko ya, ko sa vakacacataki iko vakalevu e na nomu i valavala kecega ka vakalailai ga ko ira.

⁴⁸ Sa kaya na turaga ko Jiova me vaka na dina ni noqu bula, sa sega ni cakava ko Sotoma na tacimu, se ko ira na luvena yalewa, me vaka na ka dou sa cakava, ko iko kei ira na luvemu yalewa.

⁴⁹ Raica, oqo na caka cala i Sotoma na tacimu, na viavialevu, kei na daumamau e na kakana, kei na dautiko vakacegu wale ka tu vua kei ira na luvena yalewa, ia sa sega ni vakaukauwataka ko koya na ligadra na malumalumu kei na dravudravua.

⁵⁰ A ra viaviamarama talega, ka ra cakava na ka vakasisila e mataqu: o koya oqo ka'u a kauti ira tani kina ni'u a raica.

⁵¹ Ia sa lailai sobu nai valavala ca i Samaria ka sa levu cake na nomu i valavala ca; ia ko sa vakalevutaka na nomu i valavala vakasisila ka vakalailai ko ira, ka sa vakadonui ira na tacimu e na nomuni valavala vakasisila kecega ko sa cakava.

⁵² Io ko iko talega, ko daulewai ira na tuakamu, mo colata na nomu madua e na vuku ni nomu i valavala ca ko sa cakava me vakasisila vakalevu cake e na nodra: era sa dodonu cake vei kemudou: io mo taqaya talega ko iko, ka mo luvu e na madua, ni ko sa vakadonui ira na tacimu.

⁵³ Ni'u na kauti ira tale mai era vakabobulataki, io ko Sotoma kei ira na luvena yalewa era vakabobulataki, kei Samaria kei ira na luvena yalewa era vakabobulataki ka'u na qai kauti ira tale mai na nomu bobula era sa vakabobulataki e na kedra maliwa:

⁵⁴ mo luvuci kina e na nomu madua, ka mo vakataqayataki e na ka kecega ko sa cakava, ni ko sa vakacegui ira.

⁵⁵ Ia ni ra na lesu tale na tacimu, ko Sotoma kei ira na luvena yalewa, me ra mai tiko me vaka eliu, ka sa lesu ko Samaria kei na luvena yalewa, me ra mai tiko me vaka eliu, dou na qai lesu talega kei ira na luvemu yalewa mo dou mai tiko me vaka eliu.

⁵⁶ Ia ko sa sega ni cavuta na tacimu ko Sotoma e na siga ni nomu viavialevu,

⁵⁷ ni sa bera ni vakavotui na nomu ca; me vaka e na gauna era vakarogocataki iko kina ko ira na goneyalewa ni Siria, kei ira kece era tiko voliti koya, kei ira na goneyalewa ni Filisitia, era beci iko mai na veiyasana:

⁵⁸ na nomu i valavala ca kei na nomu i valavala vakasisila, sa baleti iko ga, sa kaya ko Jiova.

⁵⁹ Ni sa kaya vakaoqo na Turaga ko Jiova; Io ka'u na cakava vei iko me vaka na ka ko sa cakava, ni ko sa beca na bubului ni ko sa vakacacana na veiyalayalati.

⁶⁰ Ia ka'u na nanuma na noqu veiyalayalati kei iko e na gauna ko a gone kina, ka vakataudeitaka vei iko na veiyalayalati tawa mudu.

⁶¹ O na qai nanuma na nomu i valavala, ka madua sara kina, ni ko na bauti ira na tacimu, ko ira era qase vei iko kei ira era gone vei iko: ia ka'u na soli ira vei iko me ra luvemu yalewa; ia ka segai e na nomu veiyalayalati.

⁶² Ia ka'u na vakataudeitaka na noqu veiyalayalati kei iko; io ko na kila ni sai au ko Jiova:

⁶³ mo nanuma kina, ka mo taqaya, ka sega ni rawa tale ni dalaga e na vuku ni nomu madua, ni'u sa bokoca kecega na ka ca ko sa cakava oti, sa kaya na Turaga ko Jiova.