Isikeli 15 - Vakavakadewa Makawa

Sa tukuni e na vosa vakatautauvata ni kau ni vaini na nodra sega ni yaga kei na kedra biu na kai Jerusalemi, 1-8.

¹ A sa yaco vei au na vosa i Jiova, ka vaka,

² Ko iko na luve ni tamata, A cava na kena yaga cake na vu ni vaini ki na kau eso, se ki na taba ni kau eso mai na veikau?

³ Me na kau beka e dua na tikina me yaga ki na dua na cakacaka? se na kau beka e dua na tikina mei vako me rube kina e dua nai yaya?

⁴ Raica, sa biu ga ki na bukawaqa me kena buka; sa kania na muana ruarua na bukawaqa, ia na tolona sa yavu. Me na yaga li e na dua na cakacaka?

⁵ Raica, ni sa taucoko, sa sega ni yaga ki na dua na cakacaka: ia ni sa kania na bukawaqa, ka sa yavu, me na qai yaga vakacava ki na dua na cakacaka?

⁶ O koya sa kaya kina na Turaga ko Jiova; Me vaka na vu ni vaini ki na vu ni kau ni veikau, ka'u a solia ki na bukawaqa me kena buka, kau na soli ira vakakina na kai Jerusalemi:

⁷ ia ka'u na vaqaqataka na mataqu vei ira me ra ca; era na lako tani mai na dua na bukawaqa, ia na bukawaqa tani ena kani ira; ia dou na kila ni sai au ko Jiova, ni'u sa vaqaqataka na mataqu vei ira me ra ca.

⁸ Ia ka'u na vakalalataka sara na vanua ni ra sa dautalaidredre vakalevu, sa kaya na Turaga ko Jiova.