Isikeli 13 - Vakavakadewa Makawa

Sa ra vunauci ko ira na parofita lasulasu e na vuku ni nodra vosa lasu, kei na nodra sega ni yaga, kei na nodra i boro ca, 1-16. O ira talega na parofita yalewa e na vuku ni nodra dauvere, 17-23.

¹ A sa yaco vei au na vosa i Jiova, ka vaka,

² Ko iko na luve ni tamata, mo parofisaitaka na ca vei ira na parofita i Isireli era ia na parofisai, ia mo kaya vei ira era ia na parofisai sa vu ga mai lomadra, Dou rogoca na vosa i Jiova.

³ Sa kaya vakaoqo na Turaga ko Jiova; Ena ca ko ira na parofita lialia, era muria na yalodra ka segai na ka era raica!

⁴ Era sa vaka na fokise ni veikau ko ira na nomu parofita, i Isireli.

⁵ Dou a sega ni cabe cake ki na tiki ni bai e basuki, se viria na nodra bai na mataqali i Isireli me ra tu rawa ni sa ia nai valu e na siga i Jiova.

⁶ Era sa raica na ka wale kei na vosa mana lasu, ka vaka, Sa kaya ko Jiova: ia ko Jiova sa sega ni talai ira: a ra dauvakauqeti ira na tamata me ra nuitaka na kena vakadinadinataki na vosa.

⁷ Sa sega beka ni raivotu wale dou sa raica, ka sa sega beka ni vosamana lasu dou sa cavuta, ka kaya, Sa kaya ko Jiova; ia koi au, ka'u a sega ni vosataka?

⁸ O koya oqo sa kaya kina vakaoqo na Turaga ko Jiova; Ni dou sa cavuta na ka wale, ka raica na ka lasu, au sa nomudou meca, sa kaya na Turaga ko Jiova.

⁹ Ia na ligaqu ena tarai ira na parofita era sa raica na ka wale, ka vosataka na vosamana lasu: era na sega ni tiko e na nodra i soqosoqo na noqu tamata, era na sega talega ni volai e nai vola ni mataqali ni Isireli, era na sega talega ni curu ki na nodra vanua na Isireli; ia dou na kila ni sai au na Turaga ko Jiova.

¹⁰ E na vuku ni ka oqo, io, ni ra sa vakacalai ira na noqu tamata, ka kaya, Sa da tiko vakacegu; ka sa sega na vakacegu; ia sa viria na bai vatu e dua, ka raica, eso tani era sa boroya e nai boro ca.

¹¹ Mo kaya vei ira era sa boroya e nai boro ca, Ena bale ga: ena tau bi mai na uca; ia koi kemudou, na uca-cevata ka mata lelevu, dou na tau mai, ka dua na cava levu ena basuraka.

¹² Raica, ni sa bale mai na bai vatu, ena sega beka ni kainaki vei kemudou, Sa evei li nai boro dou a boroya kina?

¹³ O koya sa vosa kina vakaoqo na Turaga ko Jiova; Au na basuraka e na cava levu e na noqu cudru: ia ena yaco mai e na noqu lesa na uca tau bi, kei na uca-cevata ka mata lelevu e na noqu cudru levu me kenai vakaoti:

¹⁴ ia ka'u na basuraka sobu na bai vatu dou sa boroya e nai boro ca, ka biuta sobu ki na qele, na kena yavu talega ena vakarairaitaki, ena bale sara ga, dou na vakaoti vata kaya talega: ia dou na qai kila ni sai au ko Jiova.

¹⁵ Au na vakayacora vakaoqo na noqu cudru ki na bai vatu, vei ira talega era boroya e nai boro ca, ka'u na kaya vei kemudou, A bai vatu sa yali, ka sa yali talega ko ira era boroya;

¹⁶ io, ko ira na parofita ni Isireli era parofisaitaki Jerusalemi, ka raica na kena raivotu ni vakacegu, ka sa sega na vakacegu, sa kaya na Turaga ko Jiova.

¹⁷ Ia ko iko, na luve ni tamata, mo vaqaqataka na matamu vei ira na goneyalewa ni kai nomu, era ia na parofisai e vu ga mai na lomadra; ia mo parofisaitaka na ca vei ira,

¹⁸ ka kaya, Sa kaya vakaoqo na Turaga ko Jiova, Ena ca ko ira na yalewa era sa dauvauca nai lokoloko ki na duruduru-ni-liga kecega, ka cakava nai sala ni ulu vei ira nai tabayalewa kecega me vakasasa yalo kina! Mo dou vakasava li na yalodra na noqu tamata, ia dou na vakabula beka na yalodra me nomudou?

¹⁹ Mo dou vosavakacacataki au talega beka vei ira na noqu tamata, me nomudou kina na parile eso e na qeteqete ni ligamudou ka so na kemudou tiki ni madrai, mo dou vakamatea eso na yalo sa sega ni dodonu me mate, ka vakabula eso na yalo sa sega ni dodonu me bula, ni dou lasutaki ira na noqu tamata era vakarorogo ki na ka lasu?

²⁰ O koya oqo sa kaya kina na Turaga ko Jiova; Raica, au sa cata na nomudou i lokoloko, dou sa vakasasa yalo kina maikea mo dou tudaitaka, ia ka'u na dresulaka tani mai na ligamudou, ka vakabula na yalo dou sa vakasasa, na yalodra sa tudaitaki.

²¹ Au na dresuka talega na nomudou i sala, ka kaliraki ira na noqu tamata mai na ligamudou, ka ra na sega ni tiko tale e na ligamudou me ra vakasavi; ia dou na kila ni sai au ko Jiova.

²² Ka ni dou a vakararawataka na lomana na yalododonu e na nomudou lasu, ia koi au, ka'u a sega ni vakararawataka; ka dou sa vakaukauwataka na ligana na tamata ca, me kakua ni lesu mai ko koya mai na nonai valavala ca, ni dou sa yalataka vua na bula:

²³ ia dou na sega kina ni raica tale na ka wale; ka dou na sega talega ni cakava na ka mana lasu: ni'u na kaliraki ira na noqu tamata mai na ligamudou: ia dou na kila ni sai au ko Jiova.