Isikeli 12 - Vakavakadewa Makawa

Ni sa ia na toki ko Isikeli sa vakatakarakarataki kina na veivakabobulataki i Setekaia, 1-16. Ni sa sautaninini talega sa vakatakarakarataki kina na kedra ca na Juta, 17-20. Era sa vunauci e na vuku ni nodra vosa vakaibalebale ca, 21-25. Ena vakayacori vakusakusa na raivotu, 26-28.

¹ A sa yaco tale vei au na vosa i Jiova ka vaka,

² Ko iko na luve ni tamata, ko sa tiko e na kedra maliwa na mataqali dautalaidredre, era sa vakamatana me ra raica, ka ra sega ni raica; era sa vakadaligana me ra rogoca, ka ra sega ni rogoca: ni ra sa mataqali dautalaidredre.

³ Ia ko iko, na luve ni tamata, mo vakarautaka na nomu i yaya ni toki, ka toki tani e matadra e na siga: ia mo toki tani e matadra mai na nomu tikina ki na tikina tani: era mataqali dautalaidredre, ia de ra na vakanananu beka ga.

⁴ Ia mo kauta ki tuba na nomu i yaya e na siga e matadra, me vaka nai yaya ni toki: ia mo lako tani e matadra e na yakavi, me vaka na nodra lako tani na bobula.

⁵ Ni ra raica tiko, mo kelibasikataka na bai, ka yauta yani kina ki tuba.

⁶ Ni ra raica tiko, mo colata yani, ia ni sa yakavi sobu, mo qai yauta tani: mo puloutaka na matamu, mo kakua ni raica na qele: ni'u sa qisi iko me sai vakatakilakila vei ira na mataqali ni Isireli.

⁷ Ia ka'u a cakava me vaka sa vakaroti vei au: a noqu i yaya ka'u a yauta ki tuba e na siga, me vaka nai yaya ni toki vakabobula, ia e na yakavi, ka'u a kelibasikataka na bai e na ligaqu; ni sa yakavi sobu ka'u a qai yauta yani, ka'u a colata yani e matadra.

⁸ A sa yaco vei au na vosa i Jiova e na mataka, ka vaka,

⁹ Ko iko na luve ni tamata, era sa taroga vei iko, se sega, ko ira na mataqali ni Isireli, na mataqali dautalaidredre ko ya, A cava li ko sa cakava?

¹⁰ Mo kaya vei ira, Sa kaya vakaoqo na Turaga ko Jiova; Sa bale vua na tui mai Jerusalemi na vosa ni parofisai bibi oqo, vei ira kece talega na mataqali ni Isireli era tiko kaya.

¹¹ Mo kaya, Sai au nai vakatakilakila vei kemudou: me vaka na ka ka'u sa cakava, ena caka vakakina vei ira: era na toki tani, ka lako vakabobula yani.

¹² Ia na tui sa tiko vata kei ira ena ia na colacola e na yakavi sobu, ka curu yani: era na kelibasikataka na bai me ra yauta yani kina ki tuba: ena puloutaka na matana me kakua ni raica na qele ko koya.

¹³ Ia ka'u na tevuka vua na noqu lawa, ena coriti talega e na noqu i cori: ia ka'u na kauti koya ki Papiloni ki na nodra vanua na kai Kalitia; ena mate maikea ko koya, ia ena sega ga ni raica.

¹⁴ Ia ko ira kece era tiko vata kaya me vukei koya, kei ira kece na nonai valu, ka'u na dui vakasevi ira ki na mata ni cagi kecega; ia ka'u na ucuna nai seleiwau me muri ira.

¹⁵ Ka ra na kila ni sai au ko Jiova, ni'u sa dui vakasevi ira ki na veimatanitu, ka duibiubiuti ira ki na veivanua.

¹⁶ Ia ka'u na vakavoca vei ira e lewe vica na tamata mai nai seleiwau, kei na dausiga, kei na mate dauveiveitauvi; me ra tukuna na nodra i valavala vakasisila kecega ki na veimatanitu era na dui yaco kina; ka ra na kila ni sai au ko Jiova.

¹⁷ A sa yaco tale vei au na vosa i Jiova, ka vaka,

¹⁸ Ko iko na luve ni tamata, mo kania vata na kemu madrai kei na kidroa, ka mo gunuva na memu wai e na sautaninini kei na nuiqawaqawa;

¹⁹ ka kaya vei ira na lewe ni vanua, Sa kaya vakaoqo na Turaga ko Jiova e na vukudra na lewe i Jerusalemi, kei na vanua ko Isireli; Era na kania na kedra madrai e na nuiqawaqawa, ka gunuva na medra wai ni ra domobula tiko, me yali laivi mai na nodra vanua na ka kece sa oso kina, e na vuku ni nodra i valavala kaukauwa kecega era tiko kina.

²⁰ Ia ena lala mai na veikoro sa tawa, ka na rusa na vanua; ia dou na kila ni sai au ko Jiova.

²¹ A sa yaco vei au na vosa i Jiova, ka vaka,

²² Ko iko na luve ni tamata, a cava na vosa vakaibalebale ko ya sa tu vei kemudou na Isireli, ka vaka, Sa vakadedetaki na gauna, ka sa sega na raivotu me yaco?

²³ O koya oqo mo tukuna kina vei ira, Sa kaya vakaoqo na Turaga ko Jiova; Au na muduka na vosa vakaibalebale ko ya, a ra na sega ni cavuta tale me vosa vakaibalebale e Isireli; ia mo kaya ga vei ira, Sa voleka mai na kena gauna, kei nai vakadinadina ni raivotu kecega.

²⁴ Ni na sega tale na raivotu lasu se na vosamana veicavilaki vei ira na mataqali i Isireli.

²⁵ Ni sai au ko Jiova ka'u na vosa, ia na vosa ka'u na vosataka ena yaco; ena sega ni vakaberaberataki tale: e na nomudou gauna ga, koi kemudou na mataqali dautalaidredre, ka'u na cavuta na vosa, ka vakayacora, sa kaya na Turaga ko Jiova.

²⁶ Sa yaco tale vei au na vosa i Jiova, ka vaka,

²⁷ Ko iko na luve ni tamata, raica, era kaya na mataqali i Isireli, A raivotu sa raica ko koya sa yawa na kena siga, ka sa berabera sara na gauna sa parofisaitaka ko koya.

²⁸ O koya oqo mo kaya kina vei ira, Sa kaya vakaoqo na Turaga ko Jiova; Ena sega ni vakaberaberataki tale e dua na noqu vosa, ia na vosa ka'u sa cavuta ena vakayacori mai, sa kaya na Turaga ko Jiova.