Isikeli 11 - Vakavakadewa Makawa

A nodra vosa ca na turaga, kei na nodra cudruvi, 1-12. Ni sa tagi kina ko Isikeli, sa tukuna vua ko Jiova ni na lomani ira era sa vo tiko, 13-20, ka cudruvi ira na tamata ca, 21. Ai ukuuku i Jiova, sa toki tani, a sa kau tale ki Kalitia ko Isikeli, 22-25.

¹ A sa laveti au cake na yalo, ka kauti au ki na matamata-ni-koro ni vale i Jiova ki na isiti, o koya sa donuya na tu-i-cake: ka raica, sa tu mai na matamata-ni-koro e lewe ruasagavulu ka lima na tamata; ia ka'u a raica e dua vei ira ko Jeesanaia na luve i Asuri, kei Pilataia na luve i Pinaia, erau sa turaga vei ira na tamata.

² A sa kaya vei au ko koya, Ko iko na luve ni tamata, koi rau na tamata oqo erau bosea na caka ca, ka vakavuvulitaka nai vakavuvuli ca e na koro oqo:

³ erau sa kaya, Sa sega ni voleka mai na gauna me da tara vale kina: na koro oqo sa dua na kuro, ia koi keda na lewena.

⁴ O koya oqo mo parofisaitaka kina na ka ca vei ira, parofisaitaka ga, ko iko na luve ni tamata.

⁵ Ka sa yaco vei au na Yalo i Jiova, a sa kaya vei au, Mo tukuna mada; Sa kaya vakaoqo ko Jiova; Dou a kaya vakaoqo, na mataqali i Isireli: ni ka'u sa kila na ka sa tubu e na lomamudou.

⁶ Dou sa vakalevuqataki ira na nomudou era sa vakamatei e na koro oqo, ka vakaosoosoya na kena sala e na moku.

⁷ O koya oqo sa kaya kina na Turaga ko Jiova; A nomudou sa vakamatei dou sa virikotora e loma ni koro, sai ira na lewena, ia na koro oqo na kena kuro: ia ka'u na kauti kemudou tani maikina.

⁸ Dou a rerevaka nai seleiwau, ia nai seleiwau ka'u na vakayacora vei kemudou, sa kaya na Turaga ko Jiova.

⁹ Ia ka'u na kauti kemudou tani maikina, ka soli kemudou ki na ligadra na kai tani, ka cudruvi kemudou.

¹⁰ Dou na bale e nai seleiwau; ia ka'u na lewai kemudou e nai yalayala ni Isireli; ia dou na kila ni sai au ko Jiova.

¹¹ Na koro oqo, ena sega ni kemudou kuro; ia koi kemudou, dou na sega ni lewena; ia ka'u na lewai kemudou e nai yalayala ga ni Isireli:

¹² ia dou na kila ni sai au ko Jiova: ni dou sa sega ni muria na noqu vunau, ka dou sa sega ni cakava na noqu lewa, ia dou sa muria na nodra i tovo na veimatanitu sa tiko voliti kemudou.

¹³ Ia ni'u sa parofisai tiko, sa qai ciba ko Pilataia na luve i Pinaia. Au sa qai bale vakatoboicu, ka tagi vakadomoilevu, ka kaya, Isa le, noqu Turaga Jiova! ko ni na qai vakaotia sara na kedra vo na Isireli?

¹⁴ Sa yaco tale vei au na vosa i Jiova, ka vaka,

¹⁵ Ko iko na luve ni tamata, ko ira na wekamu, io na wekamu, na kai nomu dina, kei ira kece sara na mataqali i Isireli, sa ra kaya kina na lewe i Jerusalemi, Dou lako tani vakayawa vei Jiova: ia sa soli ga vei keimami na vanua oqo me keimami taukena.

¹⁶ O koya oqo mo kaya kina, Sa kaya vakaoqo na Turaga ko Jiova; Ke'u sa biuti ira tani vakayawa ki na veimatanitu, ka dui vakasevi ira ki na veivanua, ke'u na yaco ga me nodra vale tabu lailai e na veivanua era na yaco kina.

¹⁷ O koya oqo mo kaya kina, Sa kaya vakaoqo na Turaga ko Jiova; Io ka'u na vakasoqoni kemudou maivei ira na veimataqali, ka vakasoqoni kemudou mai na veivanua dou sa dui vakasevi kina, ia ka'u na solia vei kemudou na vanua ko Isireli.

¹⁸ A ra na yaco yani ki kea, ka kauta tani maikina na kena ka velavela kecega, kei na kena ka vakasisila kecega.

¹⁹ Ia ka'u na solia vei ira me ra loma vata, ka'u na tugana talega ki na lomamudou na yalo vou; ia ka'u na kauta tani na yalo vatu mai na lomadra, ka solia vei ira na yalo vakalewe:

²⁰ me ra muria kina na noqu vunau, ka vakabauta na noqu lewa, ka cakava: ka ra na qai noqu tamata, ia koi au ka'u na nodra Kalou.

²¹ Ia ko ira sa lomadra ga me ra muria na nodra i valavala velavela kei na nodra ka vakasisila ka'u na sauma ga kivei ira, sa kaya na Turaga ko Jiova.

²² Ia na jerupi eratou sa qai vakatetaba, kei na yava ni qiqi sa tu vata kei iratou; ia nai ukuuku ni Kalou i Isireli sa donui iratou maicake:

²³ a sa lako tani nai ukuuku i Jiova mai na loma ni koro, ka la'ki tu ki na ulu-ni-koro mai na yasa ni koro ki na tu-i-cake.

²⁴ Ia na yalo, sa qai laveti au cake, ka kauti au ki Kalitia, vei ira na bobula, e na raivotu e na Yalo ni Kalou. Ka sa lako cake tani vei au na raivotu ka'u a raica.

²⁵ Au a qai tukuna vei ira na bobula na vosa kece i Jiova sa vakaraitaka vei au ko koya.