Isikeli 10 - Vakavakadewa Makawa

A raivotu ni qilaiso sa waqa tu, me duibiubiuti ki dela ni koro, 1-7. A raivotu ni jerupi, 8-22.

¹ Au a qai vakaraica, ka kunea mai na maliwa e cake e na uludratou na jerupi sa dua na ka e votu mai ka vaka na vatu safaia, ka rairai me vaka nai vakatakarakara ni tikotiko vakaturaga.

² A sa vosa ko koya vua na tamata sa vakaisulu e na lineni, ka kaya, Mo curu mada ki na maliwa ni yava ni qiqi e ruku ni jerupi, ka yakuta e na ligamu na qilaiso sa waqa tu mai na kedratou maliwa na jerupi, ka duibiubiuta ki na dela ni koro. A sa curu kina ni'u sa raica tiko.

³ Ia na jerupi eratou sa tu e na yasa ni vale ki nai matau, ni sa curu kina na tamata; ia sa curuoso na lomanibai eloma e na o.

⁴ Ka sa lako cake mai nai ukuuku i Jiova mai na jerupi, ki dela ni lago ni vale; ka sa curuoso na vale e na o, ia na lomanibai sa curuoso e na serau ni ukuuku i Jiova.

⁵ Ia na rorogo ni tabadratou na jerupi sa yaco yani ki na lomanibai ki sau, me vaka na domo ni Kalou Kaukauwa ni sa vosa ko koya.

⁶ Ia ni sa vakarota ko koya na tamata sa vakaisulu e na lineni, ka kaya, Mo kauta na bukawaqa mai na maliwa ni yava ni qiqi, mai na maliwa ni jerupi; sa qai curu ko koya, ka tu voleka ki na yava ni qiqi.

⁷ A sa dodoka na ligana e dua na jerupi mai na kedratou maliwa na jerupi, ki na bukawaqa e na maliwa ni jerupi, ka lavita, ka tauca ki na liga i koya sa vakaisulu e na lineni: ka sa taura ko koya, ka curu ki tautuba.

⁸ Ka sa votu maivei iratou na jerupi, e dua na ka sa vaka na liga ni tamata e ruku ni tabadratou.

⁹ Ia ka'u sa vakaraica, ka raica e va na yava ni qiqi sa tu vata kei iratou na jerupi, e dua na yava ni qiqi sa tu vata kei na dua na jerupi, ka dua tale na yava ni qiqi sa tu kei na dua tale na jerupi: ia na kedratou i rairai na yava ni qiqi sa vaka na roka ni vatu perili.

¹⁰ Ia na kedratou i rairai, sa tautauvata vava, ka sa vaka e tu e dua na yava ni qiqi e na veimama ni dua na yava ni qiqi.

¹¹ Ni ratou sa lako, eratou sa lako e na batidratou vava; eratou sa sega ni veigoleyaki ni ratou sa lako, ia na yasana sa namata kina na uludratou eratou sa muri kina; eratou sa sega ni veigoleyaki ni ratou sa lako tu.

¹² Ia na yagodratou taucoko, kei na dakudratou, kei na ligadratou, kei na tabadratou, kei na yava ni qiqi, sa vakamatana sara, ka volita talega na yava ni qiqi vava.

¹³ Ia sa kacivaki e daligaqu ki na yava ni qiqi, Dou qiqi mada ga.

¹⁴ A sa tauyava na matadratou: na kenai matai ni mata na mata ni jerupi, na kenai karua na mata ni tamata, na kenai katolu na mata ni laioni, na kenai kava na mata ni ikeli.

¹⁵ A ratou sa laveti cake na jerupi. Oqo na ka bula ka'u a raica mai na uciwai ko Kipa.

¹⁶ Ia ni ratou sa lako na jerupi, sa lako vata talega na yava ni qiqi ka tu vata: ka ni ra sa vakatetaba ko iratou na jerupi me vuka cake tani e vuravura, sa sega talega ni vuki tani na yava ni qiqi ko ya vei iratou.

¹⁷ Ni sa tu oqori, sa tu talega oqo; ni sa laveti cake oqori, sa laveti cake talega oqo: ni sa tiko vei ira na yalo ni ka bula.

¹⁸ Sa qai lako tani nai ukuuku i Jiova mai nai lago ni vale, ka tu ki dela ni jerupi.

¹⁹ A ratou sa vakatetaba ko iratou na jerupi, a sa vuka cake tani e vuravura e mataqu: ni ratou sa lako yani, sa lako vata kei iratou na yava ni qiqi, ka ratou sa la'ki tu ki na matamata-ni-koro ni vale i Jiova vaka ki na tu-i-cake; ia nai ukuuku ni Kalou i Isireli sa donui iratou maicake.

²⁰ Oqo na ka bula ka'u a raica e ruku ni Kalou ni Isireli mai na uciwai ko Kipa; ia ka'u a kila ni sai iratou oqo na jerupi.

²¹ Sa tauyava na matadratou, ka tauyava na tabadratou; a sa dua na ka e vaka na liga ni tamata sa tiko e ruku ni tabadratou.

²² Ia nai tovo ni matadratou, sai koya ga ka'u a raica mai na uciwai ko Kipa, na kedratou i rairai talega kei iratou dina: eratou sa dui lako vakadodonu ga ki liu.