Isikeli 1 - Vakavakadewa Makawa

A gauna ni parofisai i Isikeli mai na uciwai ko Kipa, 1-3. A raivotu ni Jerupi e va, 4-14, kei na yava vakaqiqi e va, 15-25, kei nai ukuuku ni Kalou, 26-28.

¹ E nai katolusagavulu ni yabaki, e nai kava ni vula, e nai kalima ni siga ni vula, ni'u sa tiko vata kei ira na bobula mai na uciwai ko Kipa, sa qai wase rua na lomalagi, ia ka'u sa raica na raivotu ni Kalou.

² E nai kalima ni siga ni vula, sai koya nai kalima ni yabaki ni nona vakabobulataki ko Jioiakini na tui,

³ sa qai yaco sara mai na vosa i Jiova vei Isikeli na bete, na luve i Pusi, e na nodra vanua na kai Kalitia mai na uciwai ko Kipa; a sa tiko vua maikea na liga i Jiova.

⁴ Ia ka'u sa vakaraica, ka raica, e dua na covulaca sa lako mai na tokalau, ka dua na o levu, ka dua na bukawaqa sa veitaravi na kena yameyame, ka sa caudre vakavolivolita, ka sa vaka na parasa matavinaka ka tu mai na lomana, mai na loma ni bukawaqa.

⁵ Ia mai loma, sa vaka e va na ka bula sa rairai mai. Sa vakaoqo na kedratou i rairai; eratou sa dui rairai vakatamata.

⁶ Sa tauyava na matadratou, ka tauyava na tabadratou.

⁷ Ia sa dodonu na yavadratou; na qeteqete ni yavadratou, sa tautauvata kei na qeteqete ni luve ni pulumokau: a sa cila tu me vaka na parasa sa soloti.

⁸ A liga ni tamata sa tu e ruku ni tabadratou e na sarisaridratou vava; a sa dui vakamatana ka dui vakatabana ko iratou na lewe va oqo.

⁹ Sa dui veiuturi na tabadratou; eratou sa sega ni veigoleyaki ni ratou sa lako; eratou sa dui lako vakadodonu ga yani.

¹⁰ Oqo nai tovo ni matadratou, eratou sa dui mata vakatamata, ka dui mata vakalaioni, ki matau, ko iratou vava: a ratou sa dui mata vakapulumokau, ki mawi, ko iratou vava; a ratou sa dui mata vakaikeli ko iratou vava.

¹¹ Sa vakaoqo na matadratou: ia na tabadratou, sa tawase ki cake; e rua na tabadratou yadua sa dui veiuturi, ka rua na tabadratou yadua sa dui ubia na yagodratou.

¹² A ratou sa dui lako vakadodonu ga yani: a vanua sa lako yani kina na yalo, eratou sa dui lako ga kina; eratou sa sega ni veigoleyaki ni ratou sa lako tu.

¹³ Ia na kedratou i rairai na ka bula, eratou sa vaka na qilaiso sa waqa tu, ka vaka na veicina sa caucaudre: sa veilakoyaki tu e na kedratou maliwa na ka bula; a sa caudre tu na buka, ka sa tibi na livaliva mai na loma ni bukawaqa.

¹⁴ Ia ko iratou na ka bula, eratou sa veiciciyaki tu ka sa rairai me vaka na livaliva ni sa tibi mai.

¹⁵ Ia ni'u sa vakaraica na ka bula, raica, sa yadua na yavadratou na yava ni qiqi ka tu e dela ni vanua ka tu vata kei iratou na ka bula, eratou dui yava na matadratou.

¹⁶ A kedratou i rairai sa vaka na yava ni qiqi kei na kedratou i cakacaka sa vaka na roka ni perili: ka sai tovo vata vava: ia na kedratou i rairai kei na kedratou i cakacaka sa vaka e dua na yava ni qiqi e na loma ni dua tani na yava ni qiqi.

¹⁷ Ni ratou sa lako, sa lako e na batidratou vava: a ratou sa sega ni veigoleyaki ni ratou sa lako.

¹⁸ Ia na batidratou, ni sa cecere sa ka rerevaki sara; ia na batidratou vava sa dui vuqa sara kina na matadratou e na veitikina.

¹⁹ Ia ni ratou sa lako na ka bula, sa dui lako talega na yavana sa dui tu vata kei iratou: ka ni sa laveti cake mai vanua na ka bula, sa laveti cake talega kei na yavana.

²⁰ A vanua sa via lako kina na yalo, eratou sa lako kina, io sa lako ga kina na yalodratou; ia na yavana sa dui laveti cake kei iratou: ni sa tiko e na yavana na yalo ni ka bula.

²¹ Ni sa lako oqori, sa qai lako oqo; ni sa tu oqori, sa qai tu oqo; ka ni sa laveti cake mai vanua oqori, sa qai laveti cake na yavana sa tu kei iratou: ni sa tiko e na yavana na yalo ga ni ka bula.

²² Ia na maliwa e dela ni uludratou na ka bula, sa rairai me vaka na mata ni wai cevata e rerevaki, sa tevuki yani e dela ni uludratou ki cake.

²³ Ia na tabadratou e ruku ni maliwa, sa vakatetaba vakadodonu, ka dui veiqaravi: sa tauyarua eratou dui ubia kina na yagodratou vaka, ka tauyarua eratou dui ubia kina vaka.

²⁴ Ia ka'u sa rogoca na carocaroba ni tabadratou, ka sa vaka na vadugu ni wai levu, ka vaka na domo i Koya sa Kaukauwa, ka vaka na rorogo ni ue, ka vaka na rorogo ni valu: ia ni ratou sa tu, eratou sa uruca na tabadratou.

²⁵ A sa dua na domo mai na maliwa e dela ni uludratou, ni ratou sa tu, ka uruca na tabadratou.

²⁶ Ia e cake sara ni maliwa mai dela ni uludratou sa rairai e dua nai vakatakarakara ni tikotiko vakaturaga me vaka na vatu safaia: ia e dela ni vakatakarakara ni tikotiko vakaturaga sa rairai nai vakatakarakara ni dua na tamata e delana e cake.

²⁷ Ia ka'u a raica na rokana sa vaka na mata ni parasa matavinaka, ka rairai me vaka na bukawaqa sa volita, mai na ka sa rairai me vaka sa tolona ka lako ki cake, ka mai na ka sa rairai me vaka sa tolona ka lako sobu, ka'u a raica ka sa rairai me vaka sa bukawaqa, ka sa serau tu na kena veitikina.

²⁸ Me vaka na kenai rairai na drodrolagi e na o e na siga ni uca, sa vakakina na kenai serau e na kena veitikina. Sa vakaoqo na raivotu ni vakatakarakara ni ukuuku i Jiova. Ia ni'u sa raica, ka'u sa cuva vakatoboicu, ka rogoca na domona e dua ka vosa mai.