Iperiu 6 - Vakavakadewa Makawa

Sa vakarota vei ira ko koya me ra vuku sara e na lotu, de ra ca tale, 1-8.

¹ Sa vakavulici ira me ra tu dei, ka gumatua sara, me ra kakua ni yalowai, ni sa vosa dina sara na Kalou ni sa yalataka na ka vinaka, 9-20. O koya oqo me da qai laiva nai vakatekivu ni vakavuvuli kei Karisito me da toro cake me da matua sara; me da kakua ni tauyavutaka tale e na veivutuni e na vuku ni valavala eda mate kina, e na vakabauta talega na Kalou,

² ai vakavuvuli ni veipapitaisotaki, kei na veitabaki liga, kei na nodra tu cake talega, ko ira na mate, kei na lewa ka sega ni mudu.

³ Ia na ka oqo eda na cakava, kevaka e vinaka vua na Kalou.

⁴ Ni sa dredre sara me vakavoui tale me ra veivutuni ko ira ka vakararamataki eliu, era a tovolea nai solisoli vakalomalagi, ka rawata na Yalo Tabu,

⁵ ka tovolea na vosa vinaka ni Kalou, kei na kaukauwa ni bula ena muri mai,

⁶ a ra sa qai vuki tale; ni ra sa vakota tiko vakai ira na Gone ni Kalou ki na kauveilatai, ka beci koya e na matanavotu.

⁷ Ni sa vakalougatataka na Kalou na qele sa gunuva na uca sa lako wasoma kina, sa vakatubura na kau sa yaga vei ira era sa kelia:

⁸ ia sa sega ni vakabau ka sa vo e lailai me biu sara oqori sa vakatubura na kau votovotoa kei na soni; ia na kenai otioti me visa.

⁹ Ia koi kemudou ga, sa lomani, e dina ga keitou sa vosa vakaoqo, ia keitou sa nanumi kemudou ni dou sa vinaka cake, ka ni na tu vei kemudou na ka sa lako vata kei na bula.

¹⁰ Ni sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana ni dou a qaravi ira era sa lotu, ia dou sa qarava tikoga.

¹¹ Ia keitou sa vinakata mo dou dui gugumatua vakakina, mo dou vakanuinui matua sara kina ka me yacova nai vakataotioti:

¹² mo dou kakua ni vucesa, mo dou muri ira ga era sa qai taukei ni veika ka yalataki ni ra a vakabauta ka vosota vakadede.

¹³ Ia ni sa yalayala vei Eparaama na Kalou, ka ni sa sega ni cavuta rawa e dua sa uasivi cake, sa qai cavuti koya ga e na nona bubului,

¹⁴ ka kaya, E dina ka'u na vakalougatataki iko vakalevu, ka vakalewevuqataki iko vakalevu sara.

¹⁵ Sa vaka ga kina, ni sa vosota vakadede mada ko koya, sa qai yaco mei taukei ni ka ka yalataki.

¹⁶ Ia ni sa bubului ko ira na tamata, era sa daucavuta na ka sa levu cake: a sa oti vei ira na veileti e na bubului mei vakadinadina.

¹⁷ Sa vakakina na Kalou, ni sa vinakata ko koya me vakatakila dina sara kivei ira era na taukena na ka ka yalataki ni sa tu dei na nona lewa, sa vakadinadinataka e na bubului:

¹⁸ me rua kina na ka sa tu dei sara, sa sega ni rawa kina me vosa lasu na Kalou, me da vakacegui sara kina, koi keda eda sa laki vakaruru ni da sa taura nai nuinui sa viritu e matada:

¹⁹ ko ya sa tu vei keda mei kelekele ni yaloda, ni sa dina ka kaukauwa, ia ka sa curu sara ki loma ni lati:

²⁰ a tikina ko ya sa curu kina e na vukuda ko Jisu, me nodai liuliu, ni sa qisi me bete levu ka tawa mudu me vaka nai valavala i Melikiseteki.