Iperiu 3 - Vakavakadewa Makawa

Sa tukuna ko koya ni sa uasivi cake vei Mosese ko Jisu, e na lotu, 1-6. Ia kevaka eda sa sega ni vakabauti Jisu, eda na sega ni curuma na nonai vakavakacegu, 7-19.

¹ O koya oqo, kemudou na veiwekani yalosavasava, sa kacivi mei taukei ni ka vakalomalagi, dou vakananuma nai Apositolo kei na Bete Levu eda sa vakatusa tiko, ko Jisu:

² o koya ka lomadina vua sa lesi koya, me vakataki Mosese talega e na nona mataqali taucoko.

³ A sa dodonu me dokai vakalevu ko koya ka vakalailai ko Mosese, ni sa dokai vakalevu ko koya sa tara na vale, ia ka vakalailai ga na vale.

⁴ Ni sa dua e tara na vale yadua; ia ko koya sa tara na ka kecega sa Kalou.

⁵ Ia e dina ga sa lomadina ko Mosese e na nona mataqali taucoko, me vaka sai talatala, me vakatakilai kina na ka ena tukuni maimuri;

⁶ ia na Karisito sa dina me vaka sa Gone e na nona mataqali; ia sa nona mataqali koi keda, kevaka eda sa taura matua na noda doudou kei na reki ni nuinui me tu dei, me yacova nai vakataotioti.

⁷ O koya oqo, me vaka sa kaya na Yalo Tabu, E na siga oqo kevaka dou sa via rogoca na domona,

⁸ Kakua ni vakaukauwataka na yalomudou, me vaka e na veivakacudrui, Me vaka e na siga ni dauvere e na lekutu:

⁹ Era sa dauveretaki au kina ko ira na nomudou qase, era sa vakatovolei au vakaca, Ni ra sa raica tiko na noqu cakacaka ka yabaki vasagavulu.

¹⁰ O koya oqo ka'u a cudru kina vei ira nai tabatamata ko ya, Ka kaya, Era sa cala tikoga e lomadra; Ia era a sega ni kila na noqu i valavala.

¹¹ Au a bubului kina e na noqu cudru, Ni ra na sega sara ni curu ki na noqu i vakavakacegu.

¹² Dou raici kemudou vinaka, na veiwekani de tiko e na lomadra eso vei kemudou na yalo sa ca e sega ni vakabauta, dou sa biuta laivi kina na Kalou bula.

¹³ Ia dou dui veivakatavulici vakai kemudou e na veisiga kecega, ni sa vakatokai ga, Na siga edaidai; de vakayalokaukauwataki e dua vei kemudou e na vuku ni sa dauveivakaisini nai valavala ca.

¹⁴ Ni sa noda ga na Karisito, kevaka eda sa taura matua nai vakatekivu ni noda dinata me tu dei, me yacova nai vakataotioti.

¹⁵ Ni sa tukuni tiko vakaoqo, E na siga oqo, kevaka dou sa via rogoca na domona, Dou qai kakua ni vakaukauwataka na yalomudou, me vaka e na veivakacudrui.

¹⁶ Ia ko cei ko ira era a vakacudruya ni ra sa rogoca oti? ko ira kecega era sa lako vata kei Mosese mai Ijipita se segai?

¹⁷ Ia sa cudru vei cei ko koya ka yabaki vasagavulu? vei ira sai valavala ca, ka bale na yagodra e na lekutu se segai?

¹⁸ Ia ko cei sa bubului kina ko koya me ra kakua ni curu ki na nonai vakavakacegu, vei ira ga sa sega ni vakabauta?

¹⁹ Ia eda sa raica, ni ra sa sega ni curu rawa kina, ni ra sega ni vakabauta.